ខេត្តបាត់ដំបង ៖ ចំណេះដឹងបានបង្ហាញពីសមត្ថភាពការងារឲ្យមានប្រសិទ្ធភាព នេះជាគោលបំណងជំរុញបន្ថែម របស់លោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ដែលបានមានមតិសំណេះ សំណាលដល់មន្ត្រីរាជការ លោកគ្រូ អ្នកគ្រូចំនួន២១៧នាក់ មកពី៣វិទ្យាស្ថាន គឺវិទ្យាស្ថានជាតិវិជ្ជាជីវៈ ខេត្តបាត់ដំបង វិទ្យាស្ថានពហុបច្ចេកទេសភូមិភាគតេជោសែនបាត់ដំបង និងវិទ្យាស្ថានបច្ចេកវិទ្យាបាត់ដំបង របស់ថ្នាក់ដឹកនាំជាន់ខ្ពស់ ក្រសួងការងារ បានធ្វើឡើងនៅក្នុងវិទ្យាស្ថានជាតិវិជ្ជាជីវៈបាត់ដំបង នៅក្នុងសង្កាត់ឪម៉ាល់ ក្រុង-ខេត្តបាត់ដំបង នៅវេលាព្រឹកថ្ងៃទី៦ ខែកុម្ភៈ ឆ្នាំ២០១៨។ លោក មាស តារា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តបាត់ដំបង បានរាយការណ៍អំពីវឌ្ឍនភាពនៃមន្ទីរការងារសកម្មភាពដឹកនាំរៀបចំ ដល់វិទ្យាស្ថានទាំង៣ នៅបាត់ដំបងឲ្យទទួលបានការ បណ្តុះបណ្តាលដល់យុវជន យុវតី ដែលបាត់បង់ឱកាសការងារ ជនទីទ័លក្រ និងសិស្សបោះបង់ការសិក្សា ឲ្យមានចំណេះ ដឹងដើម្បីមានការងារធ្វើប្រកបដោយគុណភាព និងមានប្រសិទ្ធភាព តម្រូវតាមទីផ្សារដែលកំពុងត្រូវការបម្រើការ គ្រប់ស្ថាប័ន ក្រុមហ៊ុន ប្រកបដោយគុណភាព។
បន្ទាប់មកលោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្តោះបណ្តាលវិជ្ជាជីវៈបានថ្លែងថា ដោយសារឃើញការរីកចម្រើនរបស់ប្រទេសជាតិយើងមានសុខសន្តិភាព ពេលនេះមានសិស្ស និស្សិត មកអង្គុយរៀនសូត្របានដោយស្រួលគ្មានបារម្ភអំពីការភ័យខ្លាចដូចកាលសម័យ មានសង្គ្រាម ឈ្លោះគ្នាក្នុងស្រុកកន្លងមក នោះក៏ដោយសារសម្តេចតេជោ ហ៊ុន សែន ជានាយករដ្ឋមន្ត្រី បានស្តារប្រទេសជាតិឲ្យបានរួចចាកផុតពីភាពខ្ទេចខ្ទាំ ដោយសារសង្គ្រាមកន្លងមកទើបក្មួយៗបានសាលារៀន ផ្លូវថ្នល់ គ្រប់ហេដ្ឋារចនាសម្ព័ន្ធដើម្បីឲ្យក្មេងៗជំនាន់ក្រោយបានរៀនសូត្រ ក្រេបយកចំណេះដឹងសម្រាប់ទ្រទ្រង់អភិវឌ្ឍ ប្រទេសកម្ពុជាបន្តទៅទៀត។ ពីព្រោះប្រទេសដែលក្រីក្រ មានកម្លាំងពលិកម្មច្រើន បានប្រាក់ខែតិច គឺមកពីមនុស្សគ្មានធនធាន គ្មានចំណេះដឹង ទើបទទួលបានប្រាក់ចំណូលតិច បើមនុស្សមានចំណេះដឹងគឺបានទទួល ប្រាក់ខែច្រើនតាមតម្រូវការទីផ្សារមិនត្រឹមតែក្នុងស្រុក រហូតដល់មានការងារធ្វើនៅក្រៅប្រទេសទៀតផង។
លោកបណ្ឌិតបានប្រៀបធៀបពីកំណើនសេដ្ឋកិច្ចនៅក្នុងប្រទេសកម្ពុជាសព្វថ្ងៃកំពុងមានការកើនឡើង ដែលពិភពលោកកំពុងចាប់អារម្មណ៍ដោយមានការសង្កេតអង្កការពលិកម្មអន្តរជាតិ(ILO)ដែលប្រាក់ខែកម្មករ កម្មការនី ពីមុនមានតែ៤០ដុល្លារក្នុង១ខែ តែចេះតែឡើងបន្តបន្ទាប់មករហូតពេលនេះឡើងដល់១៧៥ទៅជាង២០០ដុល្លារ និងកំពុងបន្តដំឡើងបន្ថែមទៀត នាឆ្នាំខាងមុខនេះ ពីព្រោះតែស្រុកទេសមានសុខសន្តិភាព ទើបមានកត្តាសេដ្ឋកិច្ចបាន ហក់ឡើងបានយ៉ាងឆាប់រហ័សបែបនេះ។ លោកបណ្ឌិតបានប្រៀបធៀបប្រទេសកម្ពុជា ធ្លាប់ជួបភាពក្រីក្រដោយសារ សង្គ្រាមកន្លងមក ហើយមានការរីកចម្រើនដល់ថ្ងៃនេះក៏មានអ្នកនយោបាយមួយចំនួនកំពុងអូសទាញ ដោយប្រើវិធីសាស្ត្របង្កើតសកម្មភាពធ្វើបដិវត្តន៍ពណ៌ប្រៀបធៀបជាមួយប្រទេសលីប៊ី ប្រទេសទុយនេស៊ី ដែលកំពុងរងគ្រោះ បង្កចលាចលក្នុងសង្គមបំផុសរឿងក្បត់ជាតិដោយមានបរទេសនៅពីក្រោយខ្នង ព្រោះតែចង់ផ្តួលរំលំបំផ្លាញការរីកចម្រើននេះ។ តែវាជាបទពិសោធន៍ដែលកូនខ្មែរធ្លាប់ជួបរួចហើយ ទើបទប់ស្កាត់មិនឲ្យភាពអន្តរាយដោយសារសង្គ្រាមវិលត្រឡប់មករកកម្ពុជាវិញបានឡើយ។
លោកបានបន្តពីសេដ្ឋកិច្ចនៅកម្ពុជាសព្វថ្ងៃកំពុងតែមានការទទួលស្គាល់ពីពិភពលោកថាកម្ពុជាបានចាកចេញពីភាពក្រីក្រ មកនៅមធ្យមក្នុងឆ្នាំនេះ ព្រោះចំណូលសេដ្ឋកិច្ចមានការកើនឡើង ហើយក្នុងឆ្នាំ២០៣០នឹងឈានទៅរកលំដាប់ខ្ពស់ ទៅតាមផែនការអភិវឌ្ឍន៍របស់សម្តេចតេជោ ប្រែប្រួលពីវិស័យកសិកម្ម ឆ្ពោះទៅវិស័យឧស្សាហកម្ម ហើយបន្តទៅរកសេវាកម្មបន្ថែមទៀត។ លោកបណ្ឌិតបានផ្តាំផ្ញើដល់មន្ត្រីរាជការលោកគ្រូ អ្នកគ្រូទាំងអស់ ឲ្យខិតខំជំរុញបង្កើនប្រសិទ្ធភាពនៃការងារ ឲ្យមានប្រសិទ្ធភាព ពីព្រោះតម្រូវការពេលនេះពិភពលោកត្រូវការ អ្នកមានចំណេះដឹង ធនធានមនុស្សដោយពិតប្រាកដ ហើយអង្កការអន្តរជាតិបានទទួលស្គាល់វិទ្យាស្ថានជាតិ វិជ្ជាជីវៈនៅបាត់ដំបងនេះពិតជាទទួលបានគុណភាពល្អមែនទើបចេញសេចក្តីប្រកាសទទួលស្គាល់គុណភាពដឹកនាំការងារលំដាប់ (ISO- 9001-2015)ដល់លោក នៅ ញ៉ិន នាយវិទ្យាស្ថានជាតិ វិជ្ជាជីវៈនៅទីនេះផងដែរ។ ចុងក្រោយលោកបណ្ឌិត បានផ្តាំផ្ញើឲ្យគ្រប់មន្ត្រីទាំងអស់ត្រូវគិតពីបញ្ហាសុខភាពចៀសវាងការប្រើប្រាស់គ្រឿងញៀន សូមគោរពច្បាប់ចរាចរណ៍ បើកបរត្រូវប្រើប្រាស់មួកសុវត្ថិភាព និងប្រើខ្សែក្រវាត់ ព្រោះអត្រាស្លាប់ច្រើនសព្វថ្ងៃមិនមែននៅ លើជំងឺអេដស៍ និងផ្ទុះគ្រាប់មីនទៀតឡើយ ហើយសូមមានការរួបរួមសាមគ្គីផ្ទៃក្នុងឲ្យបានល្អប្រសើរ៕
ចែករំលែកព័តមាននេះ