ខេត្តសៀមរាប ៖ ករណីគ្រោះថ្នាក់ចរាចរណ៍រវាងម៉ូតូ និងម៉ូតូ បើកបរបញ្ច្រាសទិសគ្នា ពីទិសខាងកើតទៅលិច បណ្តាលឱ្យស្លាប់ម្នាក់ និងរបួសធ្ងន់២នាក់ ព្រមទាំងខូចខាតម៉ូតូទាំងសងខាង បង្កឱ្យមានការភ្ញាក់ផ្អើលដល់អ្នកធ្វើដំណើរ នាំគ្នាចោមរោមឈរមើលកកស្ទះចរាចរណ៍មួយសន្ទុះផងដែរ ទើបសមត្ថកិច្ចមកដល់។ ហេតុការណ៍គ្រោះថ្នាក់ចរាចរណ៍រនោះបានកើតឡើងនៅវេលាម៉ោង១០ និង៣០នាទីព្រឹក ថ្ងៃច័ន្ទ១៣កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៩ ខែមករា ឆ្នាំ២០១៨ ស្ថិតនៅចំណុចលើដងផ្លូវជាតិលេខ៦ ក្នុងភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប។ លោកវរសេនីយ៍ឯក មិន ចន្ថា អធិការស្រុកប្រាសាទបាគងបានប្រាប់នៅល្ងាចថ្ងៃទី២៩ ខែមករា ឆ្នាំ២០១៨នេះថា បន្ទាប់ពីមានព័ត៌មានពីប្រជាពលរដ្ឋបានរាយការណ៍មកសមត្ថកិច្ចមូលដ្ឋានថា៖
មានករណីគ្រោះថ្នាក់ចរាចរណ៍លើកំណាត់ផ្លូវជាតិលេខ៦ រវាងម៉ូតូ និងម៉ូតូបើកបរច្រាសទិសគ្នា បណ្តាលឱ្យស្លាប់ម្នាក់ និងរបួសធ្ងន់២នាក់ទាំងសងខាង ព្រមទាំងខូចខាតម៉ូតូយ៉ាងដំណំផងដែរ ទើបលោកបានឱ្យកម្លាំងនគរបាលជំនាញបានចុះទៅពិនិត្យ និងវាស់វែង ដើម្បីយកម៉ូតូទាំងសងខាង ចេញកុំឱ្យកកស្ទះចរាចរណ៍។ លោកបានបញ្ជាក់ទៀតថា៖ ជនរងគ្រោះដែលស្លាប់នោះមាន ឈ្មោះ ប៉ុន ប៉ុក ភេទស្រី អាយុ៣៤ឆ្នាំ រស់នៅភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប(ជាអ្នកឌុប) បើកបរពីកើតមកលិច ម៉ូតូម៉ាកហុងដា ផលិតឆ្នាំ២០១៧ គ្មានស្លាកលេខ។ ចំណែកអ្នកជិះពីក្រោយ ឈ្មោះ ហៀង ភេទស្រី រស់នៅភូមិដូចគ្នា(រងរបួសធ្ងន់)។
រីឯជនបង្ក មានឈ្មោះ ចាន់ ចិន្តាភក្តី ភេទប្រុស អាយុ២៧ឆ្នាំ រស់នៅភូមិដូនស្វា ឃុំចាឈូក ស្រុកអង្គរជុំ ខេត្តសៀមរាប (របួសធ្ងន់) បើកបរពីលិចមកកើត ម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ សៀមរាប១o-០៧៧៥ ត្រូវបានសមត្ថកិច្ចជួយ ហៅរថយន្តសង្គ្រោះបន្ទាន់បញ្ជូនទៅសង្គ្រោះនៅមន្ទីរពេទ្យក្នុងខេត្តសៀមរាប។ មូលហេតុ ជនបង្ក ចាន់ ចិន្តាភក្តី ភេទប្រុស បើកបរមិនប្រកាន់ស្តាំ ទើបបង្កឱ្យមានករណីគ្រោះថ្នាក់ចរាចរណ៍នេះ កើតឡើងផង ដែរ។ បច្ចុប្បន្ន សពស្ត្រីជនរងគ្រោះ ត្រូវបានសមត្ថកិច្ចជំនាញប្រគល់ឱ្យក្រុមគ្រួសារដឹកយកទៅធ្វើបុណ្យ តាមប្រពៃណី។ ចំណែកវត្ថុតាងទាំងសងខាង យកមករក្សាទុកនៅអធិការដ្ឋាននគរបាលស្រុក ដើម្បីរៀបចំកសាងសំណុំរឿងបញ្ជូនទៅការិយាល័យជំនាញ ចាត់ការបន្តទៅតាមផ្លូវច្បាប់។ រីឯ ជនរងគ្រោះ សងខាង ប្រុស ស្រី ទាំង២នាក់កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប៕ មី
ចែករំលែកព័តមាននេះ