ខេត្តក្រចេះ ៖ មនុស្សប្រុសស្រី៣នាក់ ត្រូវបានកម្លាំងនគរបាលស្រុកសំបូរឃាត់ខ្លួនពីបទឆបោក បន្ទាប់ពីពួកគេបានប្រើល្បិចបោកបញ្ឆោតអ្នកស្រុកនៅតំបន់ដាច់ស្រយាលដោយដើរលក់ទឹកអប់ថា ជារបស់ក្រុមហ៊ុន និងមានរង្វាន់ហើយនៅពេលដែលអ្នកភូមិដែលទិញត្រូវរង្វាន់ទូរស័ព្ទ បែរជាមិនបើកឲ្យ និងជំរិតទាលុយថ្លៃសំណងទឹកអប់ទៅវិញ ។
អំពើឆបោករបស់ពួកក្រុមមនុស្សប្រុសស្រីទាំង៣នាក់ ដែលតែងតែទទួលជោគជ័យ លើរបររកស៊ីឆបោកគ្រប់រូបភាពទៅប្រជាពលរដ្ឋនៅតាមភូមិដាច់ស្រយាល និងត្រូវបានអស់លក្ខណ៍ ក្រោយពីពួកគេបានប្រព្រឹត្តសកម្មភាពលើកចុងក្រោយកាលពីថ្ងៃទី២៨ ខែមករានេះ ទៅលើពលរដ្ឋចំនួន៣គ្រួសារ រស់នៅភូមិសំភិន ឃុំកំពង់ចាម ត្រើយម្ខាងស្រុកសំបូរ ។
អធិការរងនគរបាលស្រុកសំបូរ លោកវរសេនីយ៍ត្រី នួន សារិន បានឲ្យដឹងថា មានជន រងគ្រោះជាអ្នកភូមិ៣គ្រួសារបានរងគ្រោះដោយអំពើឆបោករបស់ពួកគេ ។ ការឆបោករបស់ពួកគេទាំងបីនាក់ គឺបានរៀបចំគម្រោងទិញទឹកអប់ជាច្រើនដប និងបានកៃច្នៃធ្វើក្រដាស់រង្វាន់ រួមមានរង្វាន់ទូរស័ព្ទ និងរង្វាន់សម្ភារផ្សេងទៀត ។ ក្រោយពីពួកគេបានដើរបំផុសឲ្យពលរដ្ឋទិញ ដោយថា មានរង្វាន់ អ្នកភូមិ៣គ្រួសាររស់នៅតំបន់ដាច់ស្រយាលទាំងនោះក៏ជឿ ហើយបានហែកទឹកអប់ក៏ត្រូវរង្វាន់ទូរស័ព្ទ១គ្រឿង តែពួកគេមិនព្រមបើករង្វាន់ឲ្យទេដោយតម្រូវឲ្យអ្នកភូមិបង់លុយចំនួន១៥០ដុល្លារទើបគេបើកឲ្យ ។ ប្រសិនបើមិនព្រមបង់លុយ១៥០ដុល្លារឲ្យមកពួកគេ ដើម្បីបើករង្វាន់ទូរស័ព្ទ ពួកគេបានសម្លុតគម្រាមអ្នកភូមិឲ្យចេញថ្លៃសំណងខូចខាតទឹកអប់នោះ ដោយម្នាក់ចាប់ពី១៥ម៉ឺនរៀលឡើងទៅ ។ ក្នុងហេតុការណ៍នោះក៏មានការឈ្លោះប្រកែកគ្នា រវាងក្រុមជនប្រុសស្រីឆបោកជាមួយ និងអ្នកភូមិ ។ អ្នកភូមិក៏ព្រមបង់លុយឲ្យទៅពួកគេក្នុងម្នាក់ៗចំនួនជាង១០ម៉ឺនរៀល ដូចតាមការសម្លុតគម្រាម ។
លោកអធិការរងបានបញ្ជាក់ទៀតថា ក្រោយពីមានអំពើរបែបនេះអ្នកភូមិបានរាយការណ៍មកនគរបាល ទើបកម្លាំងនគរបាលចុះទៅចាប់ខ្លួនជនប្រុសស្រីទាំង៣នាក់នេះបាន ។ ជនសង្ស័យជាមុខសញ្ញាជំនាញខាងឆបោកដែលត្រូវបាននគរបាលស្រុកសំបូរចាប់ខ្លួន និងត្រូវបញ្ជូនខ្លួនមកស្នងការដ្ឋាននៅថ្ងៃទី២៩ ខែមករានេះ ដែលមានទី១- ឈ្មោះ សុខ ឡេង អាយុ២៧ឆ្នាំ មានស្រុកកំណើតនៅរាជធានីភ្នំពេញ និងទី២- ឈ្មោះ ជុំ ថៃ ភេទស្រី អាយុ១៩រស់នៅខេត្តព្រៃវែង និងទី៣- ឈ្មោះ ប៊ិន សឿង អាយុ២៧ឆ្នាំ រស់នៅខេត្តកោះកុង ។
នគរបាលបានអះអាងថា ក្រុមជនទាំងប្រុសស្រីទាំង៣នាក់នេះ ជាមុខសញ្ញាឆបោកយ៉ាងសកម្ម ក្នុងរូបភាពផ្សេងៗពីគ្នា ៕
ចែករំលែកព័តមាននេះ