រាជធានីភ្នំពេញ ៖ សម្តេចក្រុមព្រះនរោត្តមរណឫទ្ធិ ប្រធានគណបក្សហ្វ៊ុនស៊ិនប៉ិចបានសេចក្តីណែនាំមួយ បើកផ្លូវឱ្យថ្នាក់ដឹកនាំគណបក្សហ្វ៊ុនស៊ិនប៉ិចទាំងអស់ចាត់វិធានការវិន័យចំពោះសមាជិកទាំងឡាយដែលបានញុះញង់បំបែកបំបាក់ផ្ទៃក្នុងរបស់គណបក្សរាជានិយម នេះជាថ្មីម្តងទៀត ។
យោងតាមសេចក្តីណែនាំរបស់សម្តេចក្រុមព្រះដែលអ្នកសារព័ត៌មានទទួលបាននៅថ្ងៃទី២៦ ខែមករា ឆ្នាំ២០១៨ បានធ្វើឡើងបន្ទាប់ពីមានសមាជិកមួយចំនួនដែលគេសង្ស័យដឹកនាំដោយ លោក សេង ហាក់ស្រ៊ុន អគ្គលេខាធិការងនៃគណបក្សហ្វ៊ុនស៊ិនប៉ិច បានបង្កើតញត្តិជាបន្តបន្ទាប់ ដើម្បីស្នើសម្តេចក្រុមព្រះនរោត្តម រណឫទ្ធិ ដកតំណែង ប៉ោ ប៊ុនស្រ៊ឺ អនុប្រធានគណបក្ស និងលោក យឹម សាវី អគ្គលេខាធិការគណបក្ស ដោយចោទប្រកាន់មន្ត្រីជាន់ខ្ពស់គណបក្សហ្វ៊ុនស៊ិនប៉ិចទាំង២រូបនេះថា ប្រកាន់បក្ខពួកនិយម និងមានអំពើពុករលួយ ។ សេចក្តីណែនាំរបស់សម្តេចក្រុមព្រះបានមានព្រះបន្ទូលតាមសេចក្តីណែនាំនេះថា ៖ «ដើម្បីជៀសវាងការញុះញង់ បំបែកបំបាក់សាមគ្គីផ្ទៃក្នុង ឬការបំផ្លាញរចនាសម្ព័ន្ធរបស់គណបក្សហ្វ៊ុនស៊ិនប៉ិច ដូចដែលពួកគេធ្លាប់បានធ្វើកន្លងមកតាមរយៈការផ្តិតមេដៃលើញត្តិ ឬការជួបប្រជុំសម្ងាត់ ឬការធ្វើសមាជខុសច្បាប់ » ។
ពេលបច្ចប្បន្ននេះមានព័ត៌មានក្រៅផ្លូវការ និងផ្លូវការតាមបណ្តាញសង្គមមានជនអសកម្មមួយចំនួននៅក្នុងគណបក្សហ្វ៊ុនស៊ិនប៉ិចតែងបន្តភាពអនាធិបតេយ្យ ញុះញង់ បំបែកបំបាក់សាមគ្គីផ្ទៃក្នុង គោលបំណងបំផ្លាញចលនាសម្ព័ន្ធគណបក្ស ។ សម្តេចក្រុមព្រះបានបញ្ជាក់ថា ករណីរបៀបនេះធ្លាប់បានកើតឡើងជារឿងៗតាំងអតីតកាល ដែលបង្កដោយជនមួយក្រុមតូចគិតតែផលប្រយោជន៍ផ្ទាល់ខ្លួនតែប៉ុណ្ណោះ ។ ដូច្នេះដើម្បីជៀសវាងការញុះញង់បំបែកបំបាក់សាមគ្គីផ្ទៃក្នុង ដូចដែលពួកគេបានធ្វើកាលពីអតីតកាល តាមរយៈការផ្តិតមេដៃលើញត្តិ ឬការជួបជុំសង្កាត់ ឬការធ្វើសមាជខុសច្បាប់ ។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិចបានថ្លែងប្រាប់កោះសន្តិភាពតាមទូរស័ព្ទថា គណបក្សហ្វ៊ុនស៊ិនប៉ិចជា គណបក្សប្រកាន់លទ្ធិប្រជាធិបតេយ្យ និងនាំមកនូវលទ្ធិប្រជាធិបតេយ្យនៅកម្ពុជា ។ លោកបន្តថា៖ «សេចក្តីណែនាំនេះមានបំណងទប់ស្កាត់ជនអនាធិបតេយ្យក្នុងបក្សដែលជនខ្លះនោះមិនបំរើគណបក្សហ្វ៊ុនស៊ិប៉ិចទេ គឺបំរើគណបក្សផ្សេង » ។ លោកអ្នកនាំពាក្យបានលើកឡើងថា តាមលោកដឹង អ្នកទាំងនោះមិនមែនជាក្រុមទេ គឺមានតែមួយចំនួនប៉ុណ្ណោះ ។ លោកថា៖ «បើពួកគេចង់ចេញពីគណបក្សហ្វ៊ុនស៊ិប៉ិចគួរដាក់ញតិ្តមកគណបក្សលាលែងមិនត្រូវផ្សាយតាមបណ្តាញព័ត៌មានបែបនេះទេ» ៕
ចែករំលែកព័តមាននេះ