រាជធានីភ្នំពេញ ៖ បុរសជនសង្ស័យជាជនជាតិអាមេរិកម្នាក់ ដែលជាជនសង្ស័យជាប់ពាក់់ព័ន្ធទៅនឹងបទល្មើសបំពានផ្លូវភេទលើកុមារនៅប្រទេសរបស់ខ្លួន ត្រូវបានកម្លាំងនគរបាល នៃអគ្គនាយកដ្ឋានអន្តោប្រសវេសន៍ សហការណ៍ជាមួយនឹងតំណាង Regional Security Office…
រាជធានីភ្នំពេញ ៖ បុរសជនសង្ស័យជាជនជាតិអាមេរិកម្នាក់ ដែលជាជនសង្ស័យជាប់ពាក់់ព័ន្ធទៅនឹងបទល្មើសបំពានផ្លូវភេទលើកុមារនៅប្រទេសរបស់ខ្លួន ត្រូវបានកម្លាំងនគរបាល នៃអគ្គនាយកដ្ឋានអន្តោប្រសវេសន៍ សហការណ៍ជាមួយនឹងតំណាង Regional Security Office (RSO) របស់ស្ថានទូតសហរដ្ឋអាមេរិក ប្រចាំនៅរាជធានីភ្នំពេញ បានធ្វើការបញ្ជូនទៅកាន់ប្រទេសកំណើតវិញ កាលពីយប់ថ្ងៃទី២៤ ខែមករា ឆ្នាំ២០១៨ ទៅតាមអាកាសយានដ្ឋានអន្តរាជាតិភ្នំពេញ ក្រោយពីរត់គេចខ្លួនមកលួចស្នាក់នៅប្រទេសកម្ពុជានោះ ។
តាមប្រភពព័ត៌មានពីសម្ថកិច្ចបានប្រាប់ឱ្យដឹងថា បុរសជាជនសង្ស័យដែលបានចាប់បញ្ជូនទៅនេះមានឈ្មោះ LOVEJOY SAMUEL DOUDLAS អាយុ៣២ឆ្នាំ ជនជាតិអាមេរិកកាំង កាន់លិខិតឆ្លងដែនលេខ ៥៤៨៥៥២៥០៤ ។ កាលពីពេលកន្លងមក បុរសជាជនសង្ស័យខាងលើបានប្រព្រឹត្តិអំពើមិនគាប់បីបំពានផ្លូវភេទទៅលើក្មេងស្រីដែលមិនទាន់គ្រប់អាយុ ហើយរត់គេចខ្លួនចូលមកសម្ងំលាក់ខ្លួននៅក្នុងប្រទេសកម្ពុជារបស់យើង ។ តាមប្រភពដដែលបានប្រាប់បន្តទៀតថា ក្រោយពីបុរសជាជនសង្ស័យប្រព្រឹត្តិបទល្មើសនៅឯប្រទេសអាមេរិក រួចហើយលួចរត់ចូលមកស្នាក់នៅប្រទេសកម្ពុជារបស់យើងនោះ ដោយមានការសហការណ៍អំពីសំណាក់កម្លាំង Regional Security Office (RSO) របស់ស្ថានទូតសហរដ្ឋងាមេរិកប្រចាំនៅរាជធានីភ្នំពេញ និងនគរបាលនាយកដ្ឋានស៊ើបអង្កេត និងអនុវត្តន៍នីតិវិធី បានស្រាវជ្រាវតាមចាប់បានកាលពីថ្ងៃទី០៩ ខែមករា ឆ្នាំ២០១៨ នៅឯខេត្តកំពត កន្លងមកនេះ ។
ក្រោយពេលដែលកម្លាំងមានសម្ថកិច្ច នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការណ៍ជាមួយនឹងកម្លាំង Regional Security Office (RSO) ស្រាវជ្រាវរកចាប់ខ្លួនបុរសជនជាតិអាមេរិកកាំង ពីបទបំពានផ្លូវភេទលើកុមារនៅឯប្រទេសរបស់ខ្លួន និងរត់គេចចូលមកលាក់ខ្លួន រួចហើយក៏បានធ្វើការបញ្ជូនទៅកាន់ប្រទេសកំណើតវិញ ដើម្បីចាត់ការទៅតាមផ្លូវច្បាប់ផងដែរ ៕
ចែករំលែកព័តមាននេះ