ក្រុមអភិរក្សបរិស្ថាន«Landscape»បានឱ្យដឹងកាលពីថ្ងៃទី១៣ មករា ២០១៨ ថា ប្រទះឃើញឆ្កែចចកជាសត្វព្រៃនៅភូមិភាគ«Flander»ភាគខាងជើងប្រទេសបែលហ្ស៊ិកជាលើកដំបូងក្នុងអំឡុងពេលជាង១០០ឆ្នាំក្រោយពីវាបាត់ខ្លួនពីភូមិភាគអឺរ៉ុបខាងលិចតាំងពីដើមសតវត្សទី២០មក ។
ចចកជាសត្វព្រៃស្ថិតក្រោមការគ្រប់គ្រងតាមកិច្ចព្រមព្រៀងនៅឆ្នាំ១៩៧៩ បានបាត់ខ្លួនពីភូមិភាគអឺរ៉ុបខាងលិចកាលពីជាង១០០ឆ្នាំមុន ដោយសារការបរបាញ់ ការអភិវឌ្ឍតំបន់ឧស្សាហកម្ម និងពង្រីកទីក្រុង ក្រោយមកចាប់ផ្តើមបង្ហាញមុខជាថ្មីនៅបែលហ្ស៊ិក។
«Landscape»បញ្ជាក់ថាបែលហ្ស៊ិកជាប្រទេសតែមួយនៅអឺរ៉ុប ដែលនៅមានរបាយការណ៍ពីការប្រទះឃើញចចកដែលមកតាំងលំនៅក្នុងភូមិភាគនេះ ។ ចំពោះចចកដែលប្រទះឃើញជាចចកមានបំពាក់ក្រវាត់កអេឡិចត្រូនិកសម្រាប់តាមដានពីការបន្លាស់ទី ។ កន្លងមកចចកមួយក្បាលនោះបានប្រទះឃើញនៅហូឡង់កាលពីចុងឆ្នាំកន្លងមក បន្ទាប់មកឆ្លងចូលដែនដីអាល្លឺម៉ង់ និងបែលហ្ស៊ិក ។
ប្រទេសនៅអឺរ៉ុបខាងកើតដូចជារ៉ូម៉ានី និងប៉ូឡូញ ពលរដ្ឋរមែងសម្របខ្លួនទៅនឹងការរស់នៅរបស់ចចកដោយពួកគេរមែងបញ្ជាក់ថាការវាយប្រហារដោយសត្វព្រៃគឺជាឧប្បត្តិហេតុខុសពីប្រទេសដទៃទៀតដូចជាបារាំង អ៊ីតាលី ឬផ្នែកខ្លះរបស់អេស្ប៉ាញដែលសម្លឹងឃើញថា ចចកបានបង្ហាញខ្លួនជាថ្មីគឺជាបញ្ហាដល់ពលរដ្ឋ ។
សម្រាប់ក្រុមអភិរក្សសត្វបានបង្ហាញភាពត្រេកអរចំពោះការប្រទះឃើញចចកនៅបែលហ្ស៊ិក និងអំពាវនាវឱ្យមានបទដ្ឋានការពារឲ្យបានម៉ត់ចត់ ៕
ចែករំលែកព័តមាននេះ