រាជធានីភ្នំពេញ៖ សន្និសីទអាស៊ានលើកទី១៥ ស្តីពីចំណីអាហារដែលបានរៀបចំក្នុងប្រទេសវៀតណាមកាលពីខែវិច្ឆិកា ឆ្នាំ២០១៧ កន្លងទៅនេះ បានប្រគល់ពានរង្វាន់មេដាយមាសសម្រាប់ផលិតឆ្នើមអាស៊ានឆ្នាំ២០១៧ ដល់ផលិតផលស្ករត្នោតសរីរង្គរបស់កម្ពុជាផលិតដោយក្រុមហ៊ុនខនហ្វីរេល។
នេះគឺមោទនភាពថ្មីមួយទៀតសម្រាប់ប្រទេសកម្ពុជា ពិសេសក្រុមហ៊ុនខនហ្វីរេល និងកសិករផលិតស្ករត្នោតនៃខេត្តកំពង់ស្ពឺ បន្ទាប់ពីស្ករត្នោតរបស់យើងទទួលបានពានរង្វាន់ Palme d’Or (ត្នោតមាស) ក្នុងឱកាសតាំងពិព័រណ៍ណាត់អ៊ិកស្ពូ (Natexpo) នៅទីក្រុងប៉ារីស កាលពី១២ឆ្នាំមុន។
ស្ករត្នោតសរីរាង្គរបស់ក្រុមហ៊ុនខនហ្វីរេល ដែលមានម៉ាក Thnot Organic Sugar គឺជាប្រភេទស្ករក្រហមពណ៌ទង់ដែងស្រាល ដែលផលិតចេញពីទឹកត្នោតធម្មជាតិទទួលបានវិញ្ញាបនបត្របទដ្ឋានអន្តរជាតិមកពីអង្គការ ECOCERT NOP (អេកូស៊ែក NOP) ស្លាកសម្គាល់ CE និង JAS។ ផលិតផលដែលមានគុណប្រយោជន៍សម្រាប់សុខភាពនេះរលាយស្ទើរតែដូចស្ករអំពៅពណ៌ស ឬពណ៌ក្រហមដែរ ប៉ុន្តែវាជាផលិតផលធម្មជាតិ១០០% មិនបានឆ្លងកាត់ការចម្រាញ់សម្រិតសម្រាំងអ្វីឡើយ ព្រមទាំងមានក្លិនប្រហើរនិងមានរសជាតិឈ្ងុយឆ្ងាញ់ជាងស្ករអំពៅ ហើយផ្ទុកទៅដោយសារធាតុរ៉ែ និងអំបិលរ៉ែ សារធាតុប៉ូលីហ្វេណុល (សារធាតុប្រឆាំងនឹងអុកស៊ីតកម្ម)។
ស្ករត្នោតសរីរាង្គ គឺជាផ្លែផ្កានៃការងារស្រាវជ្រាវជាច្រើនឆ្នាំរបស់ក្រុមហ៊ុនខនហ្វីរេលដែលបានសហការជាមួយក្រុមអ្នកស្រាវជ្រាវជនជាតិបារាំង ហើយផលិតផលមួយនេះបានធ្វើឱ្យអ្នកធ្វើស្ករទទួលបានប្រាក់កម្រៃច្រើនជាងមុន ដោយសារទទួលបានទីផ្សារថ្មីនៅបរទេស ជាពិសេសនៅទ្វីបអឺរ៉ុប និងអាស៊ី។
Thnot Organic ដែលជាផលិតផលសរីរាង្គមានគុណប្រយោជន៍សម្រាប់សុខភាព និងផលិតតាមទំនៀមទម្លាប់ពីបរមបុរាណរបស់ខ្មែរមកនោះ មិនត្រឹមតែមានរសជាតិឆ្ងាញ់តែម្យ៉ាងប៉ុណ្ណោះទេ តែវាជានិមិត្តរូបនៃការអភិវឌ្ឍន៍នៅទីជនបទប្រទេសកម្ពុជា ដោយផ្សាភ្ជាប់ធម្មជាតិ ទៅនឹងមនុស្សជាតិ ដើម្បីឈានទៅចែករំលែកសម្បត្តិធម្មជាតិដ៏ល្អប្រពៃមួយនេះទៅដល់អ្នកប្រើប្រាស់នៅលើពិភពលោកទាំងមូល៕
ចែករំលែកព័តមាននេះ