រាជធានីភ្នំពេញ ៖ ក្នុងអំឡុងឆ្នាំ២០១៧ ដែលកៀកនឹងបញ្ចប់នេះ គេឃើញមានអត្តពលិកឆ្នើមៗជាច្រើននាក់បានបង្ហាញស្នាដៃលេចធ្លោខ្លាំងតាមរយៈសកម្មភាពប្រកួត និងទទួលបានមេដាយឬខ្សែក្រវាត់ក្នុងព្រឹត្តិការណ៍ប្រកួតទាំងថ្នាក់តំបន់និងពិភពលោកជា
ហូរហែ ។ យ៉ាងណាក៏ដោយ កោះសន្ដិភាពសូមលើកយកតែអត្តពលិកដែលមានប្រជាប្រិយភាពខ្លាំងក្នុងស្រទាប់មហាជនប៉ុន្មានរូបដែលត្រូវបានបណ្ដាញព័ត៌មានចាប់អារម្មណ៍ខ្លាំងក្នុងអំឡុងឆ្នាំ២០១៧នេះជូនប្រិយមិត្តបានជ្រាបប៉ុណ្ណោះ ។
+ ចាន់ វឌ្ឍនាកា ៖ កីឡាករឆ្នើមប្រចាំពិភពបាល់ទាត់រូបនេះគ្រាន់តែបើកឆាកឆ្នាំ២០១៧ភ្លាមក៏មានឱកាសបានចេញទៅកាន់ប្រទេសជប៉ុនតែម្ដងក្នុងរយៈពេលប្រមាណជាង១០ខែ ដោយទើបតែបានបញ្ចប់កុងត្រាមុននេះ ដើម្បីត្រៀមខ្លួនទៅលេងឱ្យក្លិបថ្មីមួយនៅក្នុងប្រទេសម៉ាឡេស៊ី ។
លោកទទួលបានការចាប់អារម្មណ៍មិនតិចទេ នៅដើមឆ្នាំ២០១៧នេះ ដោយត្រូវអ្នកគាំទ្រតាមដានតាំងពីការចាកចេញ ការរស់នៅ និងការមិនបានប្រកួតរបស់លោកជាដើម ទើបធ្វើឱ្យលោកកាន់តែលេចធ្លោពេញមួយឆ្នាំ២០១៧នេះ ។ ដ្បិតថាលោកមិនមានស្នាដៃណាមួយជាដុំកំភួនសម្រាប់ឆ្នាំនេះ ប៉ុន្តែលោកនៅតែឈរជើងជាកីឡាករល្បីឈ្មោះលំដាប់ជួរមុខនៅក្នុងវិស័យបាល់ទាត់ដដែល ដោយមានទាំងទីផ្សារចេញប្រកួតក្នុងព្រឹត្តិការណ៍ធំៗធ្វើឱ្យមានការចាប់អារម្មណ៍ខ្ពស់ក្នុងចំណោមអ្នកគាំទ្រដ៏ច្រើនលើសលប់ ។
មកទល់ចុងឆ្នាំនេះ ចាន់ វឌ្ឍនាកា នៅតែមានភាពលេចធ្លោជាពិសេសក្នុងពេលលោកត្រូវគេតាមដានពីការត្រៀមចេញទៅប្រកួតឱ្យក្រុមម៉ាឡេស៊ីក្នុងលីគកំពូលដែលត្រៀមបើករដូវកាលថ្មីឆាប់ៗខាងមុខនេះ ។
+ ហេង សៅឌី ៖ កីឡាកររូបនេះក៏ទទួលបានការចាប់អារម្មណ៍ពីសំណាក់មហាជនផងដែរ ដោយសារតែលោកអាចផ្ដួលស្ដេចអុកកាលពីឆ្នាំចាស់ ហើយបានឡើងគ្រងតំណែងជាស្ដេចអុកប្រចាំព្រឹត្តិការណ៍អង្គរសង្ក្រាន្តប្រចាំឆ្នាំ២០១៧ នៅខេត្តសៀមរាប កាលពីអំឡុងចូលឆ្នាំខ្មែរ ។
លោកត្រូវបានបណ្ដាញសារព័ត៌មានចុះផ្សាយព្រោងព្រាត ហើយបើទោះជាការផ្សព្វផ្សាយតែមួយប្រាវនាពេលនោះ ក៏ស្ងប់ស្ងាត់វិញ រហូតធ្វើឱ្យកីឡាកររូបនេះមិនទទួលបានការចាប់អារម្មណ៍មកទល់ម៉ោងនេះ ក៏ស្នាដៃដែលលោកដណ្ដើមបាននៅតែជួយឱ្យអ្នកពេញនិយមកីឡាអុកទទួលស្គាល់ពីសមត្ថភាពដ៏កម្ររបស់លោកដែរ ។
ហេង សៅឌី ទទួលបានការចាប់អារម្មណ៍មិនតិចទេក្នុងពេលដែលការប្រកួតនាពេលនោះចម្រុះដោយកីឡាករល្អៗរួមមានកីឡាករ ប៊ិន គាសេង ស្ដេចអុកឆ្នាំ២០១៦ កីឡាករ ហួយ សូណា ស្ដេចអុកពីរឆ្នាំជាប់គ្នា កីឡាករ ឈាវ បូរ៉ា និងស្ដេចអុកកាលពីឆ្នាំ២០១០ កីឡាករ ឆយ វីរ៉ា ប៉ុន្តែលោកនៅតែអាចបំបាក់បានដោយបច្ចេកទេសមិនធម្មតា។ លោកទទួលបានទឹកប្រាក់១២លានរៀល និង ២០លានរៀលពីសម្ដេចតេជោ ហ៊ុន សែន ហើយក៏ត្រូវបានចារជាស្ដេចអុកប្រចាំឆ្នាំ២០១៧ មកទល់នឹងម៉ោងនេះដែរ។
+ ធារី ចន្ថាប៊ីន ៖ កីឡាករបាល់ទាត់កូនកាត់ខ្មែរ-បារាំងរូបនេះក៏លេចធ្លោនៅលើបណ្ដាញសារព័ត៌មានខ្លាំងណាស់ដែរ បន្ទាប់ពីលោកបានចុះកិច្ចសន្យាជាមួយក្លិប Krabi FC ដែលជាសមាជិកលីគលំដាប់ទី២របស់ប្រទេសថៃ ហើយបានលេងឱ្យក្រុមនោះរហូតដល់៣ឆ្នាំ កាលពីដើមខែមករា ។
លោកត្រូវបានបណ្ដាញសារព័ត៌មាន និងអ្នកគាំទ្រចាប់អារម្មណ៍ស្ទើរតែគ្រប់សកម្មភាព ខណៈដែលសមត្ថភាពប្រកួតរបស់លោកក៏ក្លាយជាចំណាប់អារម្មណ៍មិនធម្មតានៅក្នុងវិស័យបាល់ទាត់រាល់ពេលមកបង្ហាញខ្លួននៅក្នុងក្រុមជម្រើសជាតិកម្ពុជា ប្រកួតជាមួយក្រុមអន្តរជាតិម្ដងៗ ។ កីឡាកររូបនេះគឺអាចនិយាយបានថាល្បីខ្លាំងតែម្ដងក្នុងឆ្នាំ២០១៧នេះ ហើយលោកមិនត្រឹមតែទាក់ទាញបណ្ដាញផ្សព្វផ្សាយក្នុងស្រុកប៉ុណ្ណោះ បណ្ដាញសារព័ត៌មានក្រៅស្រុកមួយចំនួនក៏ធ្លាប់បានផ្សព្វផ្សាយពីលោកផងដែរ ។
លោកក៏ត្រូវបានក្រុម Krabi FC របស់ថៃមួយនេះ ផ្ដល់ឱកាសឱ្យចូលប្រកួតមិនតិចទេខុសគ្នាពីចាន់ វឌ្ឍនាកា ទើបធ្វើឱ្យកេរ្តិ៍ឈ្មោះរបស់កីឡាកររូបនេះឈានឡើងតែមួយប៉ប្រិចភ្នែកក្នុងឆ្នាំ២០១៧ បើធៀបនឹងឆ្នាំកន្លងទៅ ។
+ ឃីម ឌីម៉ា ៖ បានក្លាយជាកីឡាករល្បីឈ្មោះក្នុងពិភពប្រដាល់ជាយូរមកហើយ ប៉ុន្តែកេរ្តិ៍ឈ្មោះរបស់លោកកក្រើកយ៉ាងសំបើមតែម្ដង បន្ទាប់ពីលោកតំណាងឱ្យកីឡាករគុនខ្មែរដំបូងគេហើយដណ្តើមបានមេដាយមាសក្នុងការប្រកួតស៊ីហ្គេមលើកទី២៩នៅក្នុងប្រទេសម៉ាឡេស៊ីកាលពីខែសីហាកន្លងទៅ ។
លោកប្រកួតផ្តាច់ព្រ័ត្រក្នុងប្រភេទទម្ងន់៦៣,៥គីឡូក្រាមឈ្នះកីឡាករជើងខ្លាំងថៃដែលតែងតែមានអំនួត ។ លោកត្រូវបានបណ្ដាញសារព័ត៌មានចុះផ្សាយព្រោងព្រាតក្រោយទទួលបានជ័យជម្នះ ហើយបើធៀបនឹងកីឡាករដែលមានស្នាដៃផ្សេងទៀត គឺលោកអាចមានយីអ៊ុនជាងគេដោយសារតែមានការចាប់អារម្មណ៍ខ្លាំងនៅលើបណ្ដាញសង្គមហ្វេសប៊ុក ។
+ អ៊ុក ស្រីមុំ ៖ កន្លងមកនៅក្នុងពិភពកីឡាប៉េតង់ គេស្គាល់ច្បាស់តែកីឡាការិនីជើងខ្លាំងកែ ឡេង ម្នាក់ប៉ុណ្ណោះ ដោយមុខមាត់ និងស្នាដៃរបស់កីឡាការិនីរូបនេះត្រូវបានគេបង្ហោះនិងចុះផ្សាយព្រោងព្រាតជាសាធារណៈទៀតផង ។ ប៉ុន្តែឈានចូលដល់ឆ្នាំ២០១៧ គេកត់សម្គាល់ថា កីឡាការិនីអ៊ុក ស្រីមុំ ក៏ត្រូវបានមហាជនចាប់អារម្មណ៍ខ្លាំងណាស់ដែរ បន្ទាប់ពីអ្នកស្រីឈ្នះមេដាយមាសពីព្រឹត្តិការណ៍លំដាប់ពិភពលោក World Championship Petaque 2017 នៅទីក្រុង Ghent ប្រទេសបែលហ្ស៊ិក ។
អ្នកស្រីកាន់តែល្បីឈ្មោះថែមទៀត បន្ទាប់ពីដណ្ដើមបានមេដាយមាសឱ្យកម្ពុជារួមជាមួយនឹងអ្នកស្រីកែ ឡេង នៅក្នុងព្រឹត្តិការណ៍ស៊ីហ្គេម ។
ក្រៅពីអត្តពលិកខាងលើ នៅក្នុងពិភពកីឡាក៏មានអត្តពលិកជាច្រើនរូបទៀតដែលមានស្នាដៃលេចធ្លោនៅក្នុងឆ្នាំ២០១៧នេះផងដែរជាពិសេសកីឡាការិនីតែម្ដងបន្ទាប់ពីពួកគេដណ្ដើមបានមេដាយពីការប្រកួតថ្នាក់តំបន់ និងពិភពលោក ។
ទោះបីយ៉ាងណា ការចាប់អារម្មណ៍ចំពោះកីឡាការិនីទាំងនោះនៅតែមានសន្ទុះតិចជាងកីឡាករ-កីឡាការិនីខាងលើ ជាពិសេសនៅលើបណ្ដាញសង្គមហ្វេសប៊ុក និងបណ្ដាញសារព័ត៌មានក្នុងស្រុក ។ អ្នកគាំទ្របានកត់សម្គាល់ឃើញថា ចូលដល់ឆ្នាំ២០១៧នេះ កីឡាករកីឡាការិនីមួយចំនួនកាន់តែលេចធ្លោខ្លាំង ហើយអ្នកខ្លះក៏ចុះខ្សោយកម្លាំងគាំទ្រដែលធ្លាប់ទទួលបានផងដែរ ដោយសារតែសមាសភាពកីឡាករ-កីឡាការិនីល្អៗជំនាន់ថ្មីបង្ហាញខ្លួន ៕
ចែករំលែកព័តមាននេះ