រាជធានីភ្នំពេញ ៖ កៅស៊ូជាដំណាំកសិ-ឧស្សាហកម្មរយៈពេលវែងដែលបានបំពេញតួនាទីយ៉ាងសំខាន់ជួយទ្រទ្រង់ដល់សង្គម និងសេដ្ឋកិច្ចជាតិ ចូលរួមការពារបរិស្ថាន ដោយបង្កើតជាគម្របបៃតង រក្សាលំនឹងធម្មជាតិ និងការពារការហូរច្រោះដីជាដើម ។
រយៈពេលជិត១ទសវត្សរ៍មកនេះ តម្លៃកៅស៊ូនៅលើទីផ្សារបានធ្លាក់ចុះស្ទើរដល់កម្រិត ដែលធ្វើឲ្យអ្នកដាំដុះមួយចំនួនបានលះបង់ដំណាំនេះចោល ងាកមកដាំដុះដំណាំផ្សេងវិញ ។ ទោះបីយ៉ាងណា នៅឆ្នាំ២០១៧នេះ វាបានងើបឡើងវិញបន្ដិច ហើយបើតាមការអះអាងរបស់អ្នកវិនិយោគដំណាំកៅស៊ូដ៏ធំមួយនៅខេត្តមណ្ឌលគិរី ទីផ្សារមួយនេះនឹងកាន់តែប្រសើរឡើងថែមទៀតចាប់ពីឆ្នាំ២០១៨ខាងមុខ ដែលជាសារដ៏សំខាន់មួយសម្រាប់អ្នកដាំដុះកៅស៊ូនៅកម្ពុជា ។
ថ្លែងប្រាប់អ្នកយកព័ត៌មានក្នុងដំណើរទស្សនកិច្ចសិក្សា និងឈ្វេងយល់ពីដំណាំកៅស៊ូ កាលពីថ្ងៃទី១២ ធ្នូ កន្លងមក លោក បូដ ចេហ្វ (Jef BOEDT) អគ្គនាយកក្រុមហ៊ុនសុកហ្វីនកម្ពុជា បានឲ្យដឹងថា តម្លៃកៅស៊ូនៅលើទីផ្សារវាជារឿងស្មុគស្មាញមួយ ព្រោះវាមាននិន្នាការទៅតាមទីផ្សារប្រេង និងការធ្លាក់ចុះនៃសេដ្ឋកិច្ចពិភពលោក ពិសេសគឺការថមថយសេដ្ឋកិច្ចរបស់ប្រទេសចិន តែដោយសារកំណើនប្រជាសាស្ត្រ និងការរីកចម្រើននៃឧស្សាហកម្មយានយន្ដសព្វថ្ងៃ ធ្វើឲ្យទីផ្សារដំណាំនេះនឹងប្រសើរឡើងវិញនៅឆ្នាំខាងមុខ ។
លោក ចេហ្វ និយាយថា ៖« ក្រុមហ៊ុនយើងមានបទពិសោធន៍ដាំកៅស៊ូជាង១០០ឆ្នាំមកហើយនៅប្រទេសឥណ្ឌូណេស៊ី និងបណ្ដាប្រទេសផ្សេងៗទៀត ដូច្នេះ បញ្ហាតម្លៃ គឺយើងដឹងច្បាស់ វាមិនស្ថិតស្ថេរនោះទេ ឆ្នាំនេះធ្លាក់ចុះ តែ៥ឆ្នាំក្រោយ វាអាចនឹងឡើងថ្លៃវិញ ហើយខ្ញុំជឿជាក់ថា តម្លៃកៅស៊ូនឹងកើនឡើងទៀតនៅឆ្នាំ២០១៨ខាងមុខនេះ ដោយសារកំណើននៃប្រជាសាស្ត្រនៅលើពិភពលោក និងការរីកចម្រើននៃឧស្សាហកម្មយានយន្ដ នោះនឹងធ្វើឲ្យតម្រូវការកៅស៊ូកើនឡើង ។ ខ្ញុំលើកហេតុផលមួយដែលអ្នកអាចមើលឃើញដោយផ្ទាល់ភ្នែក កាលពីខ្ញុំមកដល់កម្ពុជាក្នុងអំឡុងឆ្នាំ២០១០ ការប្រើប្រាស់យានយន្ដដូចជា រថយន្ដ និងម៉ូតូ គឺមានតិចតួចណាស់ តែសព្វថ្ងៃនេះ នៅតាមដងផ្លូវពោរពេញដោយយានយន្ដ ពិសេសគឺនៅទីក្រុងភ្នំពេញ ហើយខ្ញុំជឿជាក់ថា សេដ្ឋកិច្ចប្រទេសចិននឹងបន្ដរីកចម្រើនថែមទៀត ។ នេះជាហេតុផលចម្បងដែលទីផ្សារកៅស៊ូនឹងប្រសើរឡើង ដូច្នេះ ចូរអ្នកកុំផ្លាស់ប្ដូរទិសដៅ ប្រសិនបើអ្នកមានចម្ការកៅស៊ូ » ។
កំណើននៃឧស្សាហកម្មយានយន្ដ និងរបកគំហើញថ្មីនៃរថយន្ដ គឺជាហេតុផលចម្បងដែលធ្វើឲ្យទីផ្សារនៃឧស្សាហកម្មកៅស៊ូមានការរីកចម្រើន ។ បណ្ដាប្រទេសនៅអាស៊ីប៉ាស៊ីហ្វិក គឺជាទីផ្សារធំបំផុតសម្រាប់ឧស្សាហកម្មកៅស៊ូ ដោយសារតែកំណើននៃឧស្សាហកម្មយានយន្ដ។ ចំណែកអាមេរិកខាងជើង ត្រូវបានគេរំពឹងថា នឹងមានកំណើនរឹងមាំ ខណៈដែលបណ្ដាប្រទេសនៅមជ្ឈិមបូព៌ា ត្រូវបានរំពឹងថា នឹងមានកំណើនយ៉ាងឆាប់រហ័សលើទីផ្សារមួយនេះក្នុងពេលអនាគត ។
ទីប្រឹក្សាសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Marketing Consulting លោក ង៉ែត ជូ បានយល់ស្របថា វិស័យមួយនេះនឹងប្រសើរឡើង បើទោះបីជាមានពេលខ្លះធ្លាក់ចុះក៏ដោយ តែជារួមគឺត្រូវតែកើនឡើង។
ថ្លែងតាមទូរស័ព្ទនារសៀលថ្ងៃទី១៧ ធ្នូ ម្សិលមិញ លោក ង៉ែត ជូ បានឲ្យដឹងថា ៖« ខ្ញុំក៏យល់ឃើញដូច្នេះដែរ គ្រាន់តែថាឆ្នាំខ្លះវាធ្លាក់ថ្លៃក្នុងរយៈពេលខ្លី ដោយសារតែការផ្គត់ផ្គង់លើសតម្រូវការជាដើម ប៉ុន្ដែជារួម និន្នាការទីផ្សារកៅស៊ូវាត្រូវតែឡើងថ្លៃដោយផ្អែកលើការរីកចម្រើននៃឧស្សាហកម្មមួយចំនួនដែលមានតម្រូវការកៅស៊ូជាចាំបាច់ដូចជា ឧស្សាហកម្មយានយន្ដ និងឧស្សាហកម្មផ្សេងៗទៀត »។
លោកបន្ដថា បើមើលពីទីផ្សារកៅស៊ូនាពេលនេះ វាចាប់ផ្ដើមប្រសើរឡើងបន្ដិចហើយ ហើយឆ្នាំ២០១៨ខាងមុខ វានឹងកាន់តែប្រសើរឡើងថែមទៀត ។
បើតាមការអះអាងរបស់អគ្គនាយកក្រុមហ៊ុនសុកហ្វិនកម្ពុជា លោក បូដ ចេហ្វ តម្លៃកៅស៊ូនៅលើទីផ្សារបច្ចុប្បន្នគឺអាស្រ័យទៅលើគុណភាព និងទៅតាមទីផ្សារនៃប្រទេសនីមួយៗ ដូចជា វៀតណាម ម៉ាឡេស៊ី និងសិង្ហបុរី ជាដើម ដោយបច្ចុប្បន្ននេះ ក្នុង១តោនក្នុងចន្លោះជុំវិញ១.៤០០ដុល្លារ បើធៀបនឹងឆ្នាំ២០១៦ ត្រឹមតែក្នុងរង្វង់១.០៤០ដុល្លារប៉ុណ្ណោះ ។
លោកថា ៖« តម្លៃនេះ អ្នកវិនិយោគកៅស៊ូមិនអាចទទួលបានផលចំណេញនោះទេ ប៉ុន្ដែយើងរំពឹងថា ១៥ឆ្នាំក្រោយ យើងនឹងទទួលបានផលចំណេញពីការវិនិយោគដ៏ធំមួយនេះ តែយ៉ាងណាយើងមិនរំពឹងថា វានឹងកើនឡើង៥ពាន់ដុល្លារក្នុង១តោនដូចកាលពី១០ឆ្នាំមុនណាស់ ។ ចំណែកតម្លៃដែលសមស្របអាចនឹងធ្វើឲ្យអ្នកដាំដុះសប្បាយចិត្តនោះ គឺក្នុងរង្វង់២.០០០ទៅ២.៣០០ដុល្លារក្នុង១តោន » ។
គិតត្រឹមត្រីមាសទី៣ឆ្នាំ២០១៧នេះ កម្ពុជាមានផ្ទៃដីកៅស៊ូសរុបចំនួនជាង៤៣,២ម៉ឺនហិកតា ក្នុងនោះផ្ទៃដីចៀរជ័រមានចំនួនជាង១៦,៣ម៉ឺនហិកតា ស្មើនឹង៣៧,៧៧% និងផ្ទៃដីថែទាំមានចំនួនជាង២៦,៨ម៉ឺនហិកតា ស្មើនឹង៦២,២៣% ។ ចំណែកផលិតផលជ័រកៅស៊ូក្នុងត្រីមាសដដែលនេះ សរុបមានចំនួន១១៥.៨៤៣តោន កើនឡើង២៩.០០១តោន ស្មើនឹង៣៣% បើធៀបនឹងរយៈពេលដូចគ្នាកាលពីឆ្នាំ២០១៦ និងបានបញ្ចេញលក់ជ័រកៅស៊ូចំនួន១១៤.៩៩១តោន កើនឡើងចំនួន២៨.២៦៨តោន ស្មើនឹង៣៣% បើធៀបនឹងរយៈពេលដូចគ្នាកាលពីឆ្នាំមុន ។
ទីផ្សារនាំចេញសំខាន់ៗរួមមាន វៀតណាម, ម៉ាឡេស៊ី, សិង្ហបុរី, ចិន, ជប៉ុន, ឥណ្ឌា, កូរ៉េ, តៃវ៉ាន់, ស្រីលង្កា, អេស្ប៉ាញ, អ៊ីតាលី និងហុងកុងជាដើម ។ នេះបើយោងតាមរបាយការណ៍ក្រសួងកសិកម្ម ។
គួររំលឹកថា កាលពីខែកក្កដា ឆ្នាំនេះ ខេត្តសានស៊ី ប្រទេសចិន បានចុះហត្ថលេខាលើអនុស្សរណៈយោគយល់គ្នាមួយជាមួយកម្ពុជា ដើម្បីទិញកៅស៊ូកម្ពុជាចំនួន៣០ម៉ឺនតោន ដែលសង្ឃឹមថា នឹងអាចចាប់ផ្ដើមដំណើរការនាំចូលពីកម្ពុជា ជាលើកដំបូងក្នុងឆ្នាំ២០១៨ខាងមុខនេះ ៕
ចែករំលែកព័តមាននេះ