ខេត្តបន្ទាយមានជ័យ ៖ សេចក្ដីរាយការណ៍បឋមឱ្យដឹងថា មានការប៉ះសម្តីគ្នាដ៏ចម្រូងចម្រាសមួយប្រាវ កាលពីថ្ងៃទី១៤ ធ្នូ ខណៈដែលកម្លាំងថៃមកហាមខាងកម្ពុជា មិនឱ្យក្រាលថ្មស្ថាបនាលើផ្លូវជាតិភ្ជាប់ព្រំដែនទាំង២ ស្ថិតត្រង់ច្រកព្រំដែនតំបន់បឹងត្រកួន ក្នុងភូមិបន្ទាយមានរឹទ្ធិ…
ខេត្តបន្ទាយមានជ័យ ៖ សេចក្ដីរាយការណ៍បឋមឱ្យដឹងថា មានការប៉ះសម្តីគ្នាដ៏ចម្រូងចម្រាសមួយប្រាវ កាលពីថ្ងៃទី១៤ ធ្នូ ខណៈដែលកម្លាំងថៃមកហាមខាងកម្ពុជា មិនឱ្យក្រាលថ្មស្ថាបនាលើផ្លូវជាតិភ្ជាប់ព្រំដែនទាំង២ ស្ថិតត្រង់ច្រកព្រំដែនតំបន់បឹងត្រកួន ក្នុងភូមិបន្ទាយមានរឹទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យ ដែលឈមនឹងច្រកព្រំដែន តំបន់តាប្រាយ៉ា ស្រុកតាប្រ៉ាយ៉ា ខេត្តស្រះកែវ ប្រទេសថៃ ។
សេចក្តីរាយការណ៍បន្តថា កម្លាំងចម្រុះថៃមានចំនួន២៣នាក់ ក្នុងនោះតម្រួត (នគរបាល) ព្រំដែនថៃ១៩នាក់ដឹកនាំដោយលោកវរសេនីយ៍ទោ ឯកផាប ដាវថៃស៊ុង មេបញ្ជាការរងវរៈលេ១២ និងទាហានប៉ារ៉ាចំនួន៤នាក់ មកឃាត់គ្រឿងចក្រក្រុមហ៊ុនស្ពានថ្នល់របស់ចិន ដែលទទួលជាអ្នកស្ថាបនាផ្លូវជាតិលេខ៥៨ និងខ្នែងផ្លូវខេត្តលេខ២៥៦៣ ភ្ជាប់ទៅច្រកព្រំដែនតំបន់បឹងតហរកួន -តាប្រាយ៉ា ។ កម្លាំងភាគីថៃ ដែលមកក្នុងឯកសណ្ឋាន តែមិនប្រដាប់ដោយអាវុធនោះ បានចូលជ្រៅមកក្នុងទឹកដីកម្ពុជាជាង៣៥ម៉ែត្រ គឺដល់មុខប៉ុស្តិ៍នគរបាលច្រកទ្វារព្រំដែនបឹងត្រកួន ហើយបានស្នើសុំឱ្យគ្រឿងចក្រ ផ្អាកស្ថាបនាផ្លូវក្រាលកៅស៊ូតភ្ជាប់ផ្លូវកៅស៊ូរបស់ថៃ នៅចំណុចនោះជាបណ្ដោះអាសន្ន ។
ពោលគឺភាគីថៃឱ្យទុកករណីនេះ ទៅក្រុមការងារច្រកព្រំដែនបឹងត្រកួនរបស់កម្ពុជា និងច្រកតាប្រ៉ាយ៉ារបស់ថៃ នៃការិយាល័យទំនាក់ទំនងព្រំដែន កម្ពុជា ថៃជាអ្នកសម្របសម្រូលគ្នាសិន ។ ប៉ុន្តែករណីនេះ លោកវរសេនីយ៍ ចេត សោម មន្ត្រីកងកម្លាំងកម្ពុជានៅបឹងត្រកួនថា មុនការហាមឃាត់នេះ ក្រុមហ៊ុនចិនបានស្ថាបនាផ្លូវក្រាលគ្រួស បាន១០០ភាគរយ និងក្រាលថ្មបាន៧០ភាគរយទៅហើយ។
លោក ឌៀប ឈួន អភិបាលស្រុកថ្មពួកប្រាប់ថា ករណីនេះ អាចមិនជាកំហុសអ្វីទេ តែភាគីថៃចង់មានប្រៀប ដោយចង់ឲ្យភាគីកម្ពុជាស្នើសុំ ឬជូនដំណឹងរាល់ពេលស្ថាបនា ដូចជាកាលពីក្រាលគ្រួសលើផ្លូវ កម្ពុជាជូនដំណឹង និងសុំអនុញ្ញាត ។ ទោះបីយ៉ាងណា លោកវរសេនីយ៍ ឡុង សំណាង មេបញ្ជាការនគរបាលការពារ ព្រំដែនគោកវរៈ៧០៨ និងលោក យង់ យឺន អភិបាលស្រុកថ្មពួកបានប្រាប់ដែរថា ករណីនេះ ភាគីថៃ ពុំសមអីនឹងមកហាមឃាត់គ្រឿងចក្រដូច្នេះទេ ។
គួរបញ្ជាក់ថា ចំណុចដែលត្រូវធ្វើផ្លូវនៅត្រង់ បង្គោលព្រំដែនលេខ៣៦ នៃនិយាមការ(TA682.469) និងនៅចំណុចប៉ុស្តិ៍នគរបាល ការពារព្រំដែនលេខ៨០៧ ប៉ុស្តិ៍ច្រកព្រំដែនតំបន់បឹងត្រកួនរបស់កម្ពុជា គឺឲ្យទុកគម្លាត៣៥ម៉ែត្រ ពីបង្កៅលព្រំដែនលេខ៣៦ ។ ប៉ុន្តែជាក់ស្តែង ភាគីថៃបានស្ថាបនាផ្លូវកៅស៊ូមកដល់ ត្រង់បង្គោលព្រំដែននោះ តាំងពីច្រើនឆ្នាំមកហើយ ។ ម្យ៉ាងទៀត បង្គោលព្រំដែនលេខ៣៦នេះ ក៏ត្រូវពលរដ្ឋកងកម្លាំងភាគីទាំង២បានទទួលស្គាល់ផងដែរ ៕
ចែករំលែកព័តមាននេះ