រាជធានីភ្នំពេញ ៖ នៅល្ងាចថ្ងៃសៅរ៍ ទី១៦ ធ្នូ ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ ។
ថុល មករា នឹងក្លាយជាសមាសភាពកីឡាករកម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិមួយនេះជាមួយកីឡាករថៃ ខណៈការប្រកួតទាំងមូលក៏នឹងកាន់តែទទួលការចាប់អារម្មណ៍ថែមទៀត ដោយសារតែក្រៅពីការប្រកួតជាលក្ខណៈអន្តរជាតិនោះ ក៏មានការប្រកួតជម្រុះរវាងកីឡាករជើងខ្លាំង៨រូបដើម្បីឡើងអង្គុយកៅអីក្នុងវគ្គ៤នាក់សម្រាប់២រូបចុងក្រោយផងដែរ ។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនោះនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើងព្រោះតែសំណង់បុរីព្រោងព្រាតនោះផង ។
កីឡាករកម្ពុជា និងថៃ២រូប គឺជើងខ្លាំង ថុល មករា និងជើងខ្លាំងមកពីប្រទេសថៃ ក្លាខុនសឹក ឆុមភែធួ នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏៏ត្រូវប៉ះគ្នាក្នុងវគ្គចុងក្រោយដែលជាវគ្គជម្រុះ៨នាក់យក៤នាក់នោះផង ។ សម្រាប់ការប្រកួតជាលក្ខណៈអន្តរជាតិឯណេះវិញ កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន ដើម្បីក្រេឌីត ។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែង
ប្រាប់ថា ក្នុងចំណោមកីឡាករកម្ពុជា និងថៃទាំង២រូបដែលមានឈ្មោះឡើងប្រកួត
ក្នុងព្រឹត្តិការណ៍ប្រដាល់នោះ កីឡាករ ថុល មករា គឺជាជើងខ្លាំងដែលធ្លាប់មានឈ្មោះបោះសំឡេង បើទោះជាគេត្រូវប្រឈមនឹងកីឡាករថៃដែលជាជើងខ្លាំងពោរពេញដោយ
សមត្ថភាពក្ដី ។
លោកថា ជំនួបរវាងពួកគេមិនមែនធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនហើយ ក៏ទទួលបានទំនុកចិត្តពីអ្នកគាំទ្រដូចគ្នា ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ហើយនឹងធ្លាក់ដោយស្វ័យប្រវត្តិទៅទៀត ។ លោកថា ជំនួបរបស់ពួកគេត្រូវដាក់យ៉ាងពិសេសសម្រាប់ថ្ងៃសៅរ៍សប្ដាហ៍នេះតែម្ដង ។ លោកថា កីឡាករ ថុល មករា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបរបស់គេជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំង មូល ។ លោកនិយាយថា ថុល មករានៅតែចាត់ទុកជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ។ អ្វីដែលសំខាន់គឺអ្នកទាំងពីរសុទ្ធតែមានប្រវត្តិប្រកួតលើរេញអន្តរជាតិច្រើនលើកដូចខ្លួន ។
សម្រាប់ការប្រកួតជម្រុះ៨នាក់យក៤នាក់សប្ដាហ៍នេះ លោកថា រួមមានកីឡាករ ផន ប៊ុនម៉ៅ ត្រូវប្រកួតជម្រុះជាមួយកីឡាករង៉ែត រដ្ឋា ដោយអ្នកទាំងពីរសុទ្ធតែជាអ្នកឈ្នះក្នុងវគ្គ៨នាក់ដូចគ្នា ។ លោក សេង កដិកា បញ្ជាក់ថា ការប្រកួតគូនេះ ម្នាក់ៗមានការត្រៀមទុកសម្បើមណាស់ ដោយសារតែអ្នកដែលបានឡើងទៅវគ្គ៤នាក់ក្នុងពេលខាងមុខ គឺនឹងមានឱកាសកាន់តែច្រើន ។
លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលភាគីម្ខាងៗសុទ្ធតែអះអាងថាត្រូវតែដណ្ដើមឱ្យបានកៅអីក្នុងវគ្គនេះ ។ លោកចាត់ទុកថា អ្នកទាំងពីរគឺជាធនធានកីឡាករដ៏កម្រដែលមានសមត្ថភាពខ្ពស់នៅក្នុងសង្វៀនប្រដាល់ ។ សម្រាប់មួយគូប្រកួតទៀត គឺកីឡាករ សៅ វណ្ណា ប្រកួតជាមួយកីឡាករ ពុយ វណ្ណៈ ដោយអ្នកទាំងពីរក៏ជាបេក្ខភាពត្រូវប្រកួតជម្រុះយកកៅអី៤នាក់ផងដែរ ខណៈដែលអ្នកទាំងពីរក៏ជាជើងខ្លាំងក្នុងវគ្គ៨នាក់នៅក្នុងព្រឹត្តិការណ៍នោះដែរ ។
ដោយឡែក នៅសង្វៀនទូរទស្សន៍អាស៊ីអាគ្នេយ៍ឯណោះវិញ ក៏មានការប្រកួតអន្តរជាតិផងដែរ នៅយប់ថ្ងៃសៅរ៍ និងយប់ថ្ងៃអាទិត្យទាំង៥សង្វៀន ៕
ចែករំលែកព័តមាននេះ