ខេត្តកំពង់ធំ ៖ ហេតុការណ៍គ្រោះថ្នាក់បានកើតឡើងកាលពីយប់ថ្ងៃទី០៨ ខែធ្នូ ឆ្នាំ២០១៧ នៅតាមបណ្តោយផ្លូវជាតិ៦ ស្ថិតក្នុងភូមិថ្នល់ ឃុំទ្រៀល ស្រុកបារាយណ៍ ខេត្តកំពង់ធំ ដោយបុរសម្នាក់បានជិះម៉ូតូសង់កូរ៉េមួយគ្រឿងបត់ឆ្វេងខ្វះការប្រុងប្រយ័ត្នត្រូវរថយន្តហាយឡេនឌ័របុកពេញទំហឹងបណ្តាលឱ្យស្លាប់ភ្លាមៗនៅនឹងកន្លែងកើតហេតុ។ ជនរងគ្រោះមានឈ្មោះ សយ មាន ភេទប្រុស អាយុ៥០ឆ្នាំ មានទីលំនៅ ភូមិ ឃុំកើតហេតុខាងលើ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ជិៈម៉ូតូសង់កូរ៉េពណ៌ក្រហមគ្នានស្លាកលេខ ចេញពីជើងទៅត្បូងហើយរថយន្តហាឡេនឌ័រពណ៌ទឹកប្រាក់ ពាក់ស្លាកលេខ ភ្នំពេញ 2AE-1151ចេញដំណើរពីត្បូងទៅជើងក្នុងទិសដៅបញ្ច្រាសទិសគ្នាជាមួយនឹងម៉ូតូ នៅក្នុងល្បឿនយ៉ាងលឿន លុះដល់កន្លែងកើតហេតុអ្នកជិះម៉ូតូក៏បានបត់ឆ្វេងចូលផ្ទះដោយខ្វះការប្រុងប្រយ័ត្នត្រូវរថយន្តជាន់ហ្វ្រាំងមិនទាន់ក៏បុកពេញទំហឹងបណ្តាលឱ្យស្លាប់ភ្លាមៗនៅនឹងកន្លែងកើតហេតុ ហើយអ្នកបើកបររថយន្តបានចុះរត់គេចខ្លួនបាត់ស្រមោលទាំងយប់។
បន្ទាប់ពីសមត្ថកិច្ចធ្វើការវាស់វែងរួច សាកសពជនរងគ្រោះត្រូវបានប្រពន្ធកូនយកទៅធ្វើបុណ្យតាមប្រពៃណី ចំណែករថយន្តនិងម៉ូតូយកទៅរក្សារទុកនៅអធិការដ្ឋាននគរបាលស្រុក ដើម្បីស្រាវជ្រាវរកម្ចាស់រថយន្តមកដោះស្រាយទៅតាមផ្លូវច្បាប់៕
ចែករំលែកព័តមាននេះ