វាជារឿងដ៏ចម្លែកបំផុតមួយដែលថា យើងកើតមកមិនដឹងថាខ្លួនឯងជាប្រុស ឬក៏ស្រី ។ បើយោងតាមប្រភពពីគេហទំព័រសៀងហៃ ដេលី ចេញផ្សាយថ្ងៃទី៧ វិច្ឆិកា ឱ្យដឹងថា នារីម្នាក់នៅខេត្តហ៊ូបេ ប្រទេសចិន បានទៅពិគ្រោះជាមួយវេជ្ជបណ្ឌិតអំពីករណីថា នាងពេញវ័យក្រមុំហើយ តែបែរជាពុំមានរដូវសោះ ។ ក្រោយពេលពិនិត្យរួចរាល់ ទើបលោកវេជ្ជបណ្ឌិតប្រាប់ថា នាងគឺជាមនុស្សប្រុស ធ្វើឱ្យនាងធ្លាក់ថ្លើមក្តុកតែម្តង ។
ប្រភពបានឱ្យដឹងថា នាងហ្សាង មានអាយុ២៥ឆ្នាំ គឺជាគ្រូបង្រៀននៅទីក្រុងស៊ីនមិន ក្នុងខេត្តហ៊ូបេ ។ នាងមានរូបសម្បត្តិស្អាត និងមានបុរសជាច្រើនលួចសរសើរ ប៉ុន្តែអ្វីដែលជាក្តីកង្វល់នោះគឺថា នាងមិនដែលមានរដូវសោះ ហើយគ្លីនិកមួយនៅក្នុងតំបន់ប្រាប់ថា នាងមានជំងឺបាត់រដូវ ។
ប្រភពបានឱ្យដឹងទៀតថា ថ្មីៗនេះនៅពេលដែលក្រុមគ្រួសាររបស់នាងទទួចឱ្យនាងយកប្តីនោះ នាងមានការបារម្ភយ៉ាងខ្លាំង និងយល់ថា នាងមិនអាចមានកូនឡើយ ។ ក្រោយមកនាង បានសម្រេចចិត្តទៅពិនិត្យម្តងទៀតនៅមន្ទីរធំមួយក្នុងទីក្រុងវូហាន រាជធានីនៃខេត្តហ៊ូបេ ។លទ្ធផលបញ្ជាក់ដោយម៉ាស៊ីនស្កេន B-ultrasonic scan ពីមន្ទីរពេទ្យបានបង្ហាញថា នាងហ្សាង ជាមនុស្សប្រុស ។ នាងអត់មានស្បូនទេ ប៉ុន្តែនាងមានទ្វារមាស និងមានស្រមោលពងស្វាសពីរនៅខាងក្នុង ដែលលោកវេជ្ជបណ្ឌិតអះអាងថា នោះជាប្រដាប់ភេទមួយផ្សេងទៀត ។ ទន្ទឹមនឹងនេះ នាងក៏ត្រូវបានគេពន្យល់ផងដែរអំពីហេតុផលដែលនាំឱ្យនាងអត់មានរដូវនោះ គឺមកពីនាងមានជីវសាស្ត្រជាមនុស្សប្រុស ទោះបីនាងមានរូបសម្បត្តិខាងក្រៅជាមនុស្សស្រីក៏ដោយ ។
បច្ចុប្បន្ន នាងហ្សាង កំពុងទទួលការវះកាត់នៅក្នុងមន្ទីរពេទ្យដើម្បីយកលឹង្គ និងពងស្វាសនៅក្នុងខ្លួនរបស់នាងចេញ ។ លោកវេជ្ជបណ្ឌិតបាននិយាយថា ក្រោយពេលជាសះស្បើយ នាងអាចរួមភេទបានធម្មតា ប៉ុន្តែនាងនឹងមិនអាចមានកូនឡើយ ៕
ចែករំលែកព័តមាននេះ