រាជធានីភ្នំពេញ ៖ ក្នុងចំណោមអ្នករៀបចំកម្មវិធីប្រដាល់នៅក្នុងប្រទេសកម្ពុជា គេអាចនិយាយបានថា មិនមានអ្នកណាមានស្នាដៃស្មើនឹងលោក សេង កដិកា ដែលជាអ្នករៀបចំកម្មវិធីប្រដាល់ប្រចាំនៅប៉ុស្ដិ៍លេខ៥នោះទេ ដោយសារតែលោកជាអ្នកផ្ដើមគំនិតបង្កើតឱ្យមានការប្រដាល់នៅក្នុងទូរទស្សន៍ប៉ុស្ដិ៍លេខ៥ មុនគេ…
រាជធានីភ្នំពេញ ៖ ក្នុងចំណោមអ្នករៀបចំកម្មវិធីប្រដាល់នៅក្នុងប្រទេសកម្ពុជា គេអាចនិយាយបានថា មិនមានអ្នកណាមានស្នាដៃស្មើនឹងលោក សេង កដិកា ដែលជាអ្នករៀបចំកម្មវិធីប្រដាល់ប្រចាំនៅប៉ុស្ដិ៍លេខ៥នោះទេ ដោយសារតែលោកជាអ្នកផ្ដើមគំនិតបង្កើតឱ្យមានការប្រដាល់នៅក្នុងទូរទស្សន៍ប៉ុស្ដិ៍លេខ៥ មុនគេ តាំងពីមិនទាន់មានស្ថានីយទូរទស្សន៍ណាមួយប្រកួតប្រជែងទីផ្សារជាមួយម្ល៉េះ ។
យ៉ាងណាមិញ មានមនុស្សតិចណាស់ដែលបានស្គាល់ពីមុខមាត់របស់លោក ដោយសារតែលោកជាមនុស្សមិនសូវចង់ចេញមុខ ហើយបើស្នើសុំសម្ភាសន៍ពីជីវប្រវត្តិគឺលោករឹតតែប្រកែកទៅទៀត ។
មកដល់ពេលនេះ នៅតែមិនទាន់មានបណ្ដាញសារព័ត៌មានណាមួយអាចស្នើសុំសម្ភាសន៍ពីជីវប្រវត្តិ និងស្នាដៃរបស់លោក សេង កដិកា ជាសាធារណៈបាននៅឡើយ ដោយសារតែលោកនៅតែប្រកាន់ជំហរថាមិនចង់ចេញមុខ និងថាកុំឱ្យសរសេរពីលោកធ្វើអីដើម្បីកុំឱ្យមានការរិះគន់លោកថាគ្រាន់តែមានស្នាដៃបន្តិចបន្តួចក៏ប្រឹងអួតអាង ។
មនុស្សនៅក្នុងវិស័យកីឡា បានហៅលោកថាជាបុរសលាក់មុខ ក្នុងពេលដែលលោកក៏ជាបុគ្គលដែលមានឥទ្ធិពលក្នុងសហព័ន្ធកីឡាប្រដាល់នោះដែរ ប៉ុន្តែបើក្រឡេកពីការប្រើអំណាចគឺលោកស្ទើរតែមិនមាន ដោយសារតែលោកច្រើនតែទម្លាក់ឥទ្ធិពលឱ្យអ្នកទទួលខុសត្រូវបន្ទាប់ ព្រោះតែលោកមិនចង់ចេញមុខ ។ លោកគឺជាអ្នករៀបចំការប្រដាល់មុនគេតាំងពីប៉ុស្ដិ៍លេខ៥នៅប្រើឈ្មោះជា IBC នៅឡើយ ដោយគិតមកទល់ពេលនេះ គឺលោកបានបន្សល់ស្នាដៃក្នុងវិស័យប្រដាល់រាប់មិនអស់ ខណៈដែលកីឡាករល្បីៗក៏សុទ្ធសឹងតែលោករួមចំណែកឱ្យបានល្បីឈ្មោះនៅក្នុងពិភពប្រដាល់ ។
កីឡាករភាគច្រើនសុទ្ធតែបានទទួលការបណ្ដុះបណ្ដាលតាមរយៈការផ្ដល់ឱកាសឱ្យឡើងរេញប្រកួតរបស់លោក ដោយសារតែលោកគឺជាអ្នករៀបចំកម្មវិធីប្រដាល់ធំមួយតាំងពីដើមមកទល់ពេលនេះ ។ យ៉ាងណាមិញ គេកត់សម្គាល់ថា កម្មវិធីប្រដាល់នៅប៉ុស្ដិ៍លេខ៥ដែលធ្លាប់ខ្ទរខ្ទារ និងរួមចំណែកខ្លាំងក្លានាំមុខគេក្នុងការជ្រោមជ្រែងកីឡាករឱ្យមានវត្តមាននៅក្នុងពិភពប្រដាល់ ត្រូវបានបណ្ដាសង្វៀនដែលបានកើតក្រោយប្រទាញយកឥទ្ធិពលម្ដងបន្តិចៗ បន្ទាប់ពីសង្វៀនដែលមានវត្តមានរាប់មិនអស់ធ្វើការប្រកួតប្រជែង ធ្វើឱ្យប៉ុស្ដិ៍លេខ៥ក្លាយជាសង្វៀនមួយដែលលែងសូវសំខាន់ ។ កាលពីមុនកីឡាករម្នាក់បើចង់មានឈ្មោះបោះសំឡេង និងចង់ក្លាយជាកីឡាករដែលមានទីផ្សារគឺលុះត្រាតែបានឡើងប្រកួតនៅប៉ុស្ដិ៍លេខ៥ ហើយបើបានឡើងប្រកួតនៅក្នុងប៉ុស្ដិ៍ម្ដងៗគឺមិនខុសពីមានទីផ្សារឈានឡើងនោះទេ ដោយសារតែសង្វៀនប៉ុស្ដិ៍លេខ៥ជាសង្វៀនធំ និងល្បីឈ្មោះជាងគេ ហើយបើនិយាយពីអ្នកគាំទ្រក៏ស្ទើរតែមួយចំហៀងប្រទេស ដែលមានន័យថាបានឡើងតែម្ដងពីរដងក្រោមការរៀបចំផ្គូផ្គងរបស់លោក គឺពិតជាល្បីហើយមានទីផ្សារឡើងប្រកួតនៅតាមបណ្ដាប៉ុស្ដិ៍ផ្សេង និងត្រូវបានគេយកទៅប្រកួតនៅតាមជាយដែនទទួលបានប្រាក់ចំណូលយ៉ាងងាយ ។ ប៉ុន្តែពេលនេះប៉ុស្ដិ៍លេខ៥ក្រោមការគ្រប់គ្រងរបស់លោក សេង កដិកា គឺមិនសូវជាមានឥទ្ធិពលដូចមុននោះទេ ជាពិសេសចាប់តាំងពីប៉ុស្ដិ៍លេខ៥បានបន្ថយសង្វៀនប្រកួតដោយទុកតែមួយ ដែលមិនសូវជាផ្ដល់ឱកាសឱ្យកីឡាករមិនស្ថិតក្នុងបញ្ជីត្រូវប្រកួតដណ្ដើមយកជើងឯកនោះ។
ក្នុងប៉ុន្មានឆ្នាំចុងក្រោយ កីឡាករល្បីឈ្មោះត្រូវគេឃើញផុសចេញពីប៉ុស្ដិ៍បាយ័ន និងប៉ុស្ដិ៍ CTN ទៅវិញ ចាប់តាំងពីស្ថានីយទូរទស្សន៍ទាំង២បានបើកការប្រកួតច្រើនៗក្នុង១សប្ដាហ៍ ដោយក្នុងមួយឆ្នាំៗក៏បានផលិតធនធានកីឡាករឱ្យមានឈ្មោះបោះសំឡេងជំនួសប៉ុស្ដិ៍លេខ៥បានច្រើន ។ ជាក់ស្ដែងវត្តមានទូរទស្សន៍អាស៊ីអាគ្នេយ៍ដែលបានបើកសង្វៀនប្រដាល់ដែរនោះបានក្លាយជាទីតាំងបណ្ដុះកីឡាករបានយ៉ាងមានប្រសិទ្ធភាពថែមមួយទៀត ទើបធ្វើឱ្យកីឡាករខ្លះស្ទើរតែប្រើពាក្យថាមិនបាច់ឡើងវ៉ៃនៅប៉ុស្ដិ៍លេខ៥ដូចជំនាន់មុន ក៏មិនខ្វះទីផ្សារឡើងកូដដែរ ។ ប៉ុន្តែទោះជាកីឡាករជំនាន់ក្រោយអាចប្រើភាសាមួយនេះក៏ដោយ ក៏ស្នាដៃ និងឥទ្ធិពលរបស់លោក សេង កដិកា នៅតែមិនអាចមានអ្នកមើលស្រាលនោះទេ ជាពិសេសលោកគឺជាអ្នកចែកចាយនូវទម្រង់ប្រកួតនៅក្នុងពិភពប្រដាល់ដែលត្រូវបានគេយកទៅប្រើនៅក្នុងការប្រកួតពេលក្រោយ ។
ក្នុងពេលបណ្ដាសង្វៀននានាមិនទាន់កើត ឬទើបតែចាប់កំណើត លោក សេង កដិកា បានក្លាយជាបុគ្គលដែលមានស្នាដៃរៀបចំការប្រដាល់រាប់មិនឈ្នះរួចមកហើយ ដូចជាការប្រកួតជើងឯកសម្រាប់កីឡាករក្នុងស្រុកនិងក្នុងស្រុក ការដណ្ដើមជើងឯករវាងកីឡាករក្នុងស្រុក និងបរទេសជាដើម ។ កីឡាករល្បីឈ្មោះច្រើនណាស់រួមមានលោក អេ ភូថង លោក អូត ភូថង និងលោក នួន ភិរម្យ ជាដើម ដែលមានកេរ្តិ៍ឈ្មោះក្នុងពេលប្រឡូកប្រដាល់ គឺសុទ្ធតែបានខ្សែក្រវាត់ជើងឯកនៅប៉ុស្ដិ៍លេខ៥ និងមានការរួមចំណែកធ្វើឱ្យល្បីឈ្មោះនៅប៉ុស្ដិ៍លេខ៥ទាំងអស់ ប៉ុន្តែមនុស្សតិចណាស់ដែលបានដឹងថា អ្នករៀបចំកម្មវិធីប្រដាល់នៅប៉ុស្ដិ៍លេខ៥គឺជាអ្នកលើកតម្កើង ហើយបើទោះជាបានស្គាល់ឈ្មោះក៏មិនដឹងថាឈ្មោះសេង កដិកាមានមុខមាត់យ៉ាងម៉េចនោះដែរ ។ ទោះបីយ៉ាងណា ធៀបនឹងរយៈពេលមុនគឺលោកសេង កដិកា ត្រូវបានគេស្គាល់ជាងមុនហើយ
ដោយសារតែបណ្ដាញសារព័ត៌មានមួយចំនួនចាប់ផ្ដើមប្រើឈ្មោះរបស់លោកក្នុងការអត្ថាធិប្បាយដោយមិនចាំបាច់សុំការអនុញ្ញាត ហើយបើទោះជាលោកមិនអនុញ្ញាតឱ្យថតរូបក៏នៅតែមានអ្នកប្រមាញ់រូបថតយកមកផ្សាយ ដើម្បីរំលេចឱ្យឃើញពីស្នាដៃរបស់លោក ។ លោកកាន់តែមានការទទួលស្គាល់នៅប៉ុស្ដិ៍លេខ៥ថែមទៀត ក្រោយពីលោកបានរំលេចស្នាដៃរៀបចំការប្រដាល់តាមទម្រង់ចាញ់ធ្លាក់ៗក្នុងរូបមន្តជម្រើសយកកីឡាករក្នុងប្រភេទទម្ងន់តែមួយចំនួន៣២រូបមកប្រកួតដណ្ដើមជើងឯក។ មិនក្រោម៥ជំនាន់នោះទេ ដែលលោកបង្កើតបានកីឡាករជើងឯកពីការប្រកួតតាមរូបមន្តនេះ ហើយបានក្លាយជាធនធានកីឡាករល្បីឈ្មោះនាពេលចុងក្រោយ ។
ក្នុងនោះសូម្បីតែកីឡាករដែលមិនបានជាប់ជាជើងឯកពីការប្រកួតចាញ់ធ្លាក់ៗនោះក៏មានឈ្មោះបោះសំឡេងព្រោះតែការរៀបចំរបស់លោកមិនតិចនាក់នោះដែរ ទើបសុទ្ធសឹងតែជាស្នាដៃដែលក្នុងវិស័យកីឡាមិនអាចមើលរំលងបាន ។ លោកត្រូវបានគេកោតសរសើរថាមានជំនាញក្នុងការរំលេចកីឡាករក្មេងៗ និងថ្មី ហើយបើនិយាយពីកីឡាករដែលផុសចេញពីប៉ុស្ដិ៍លេខ៥ គឺច្រើនតែថ្មីសន្លាង ហើយក៏ត្រូវបណ្ដាប៉ុស្ដិ៍ផ្សេងចាំត្រងយកទៅប្រកួតធ្វើឱ្យមានទីផ្សារយ៉ាងគួរឱ្យកត់សម្គាល់ ។ លោកក៏មានស្នាដៃក្នុងការរំលេចកីឡាករផ្នែកប្រដាល់សាកលមិនតិចនាក់ផងដែរ ដោយសារតែក្នុងពេលប៉ុស្ដិ៍លេខ៥ក្ដោបក្ដាប់សង្វៀនប្រដាល់ស្ទើរតែទាំងអស់ម្នាក់ឯង គឺប៉ុស្ដិ៍មួយនេះក៏បានរៀបចំឱ្យមានការប្រកួតប្រដាល់សាកលដែលជាធនធានក្នុងពេលថ្នាក់ជាតិប្រឡងជ្រើសរើសផងដែរ ។ បើនិយាយពីកីឡាករបរទេសវិញ គឺប៉ុស្ដិ៍លេខ៥ក៏ច្រើនតែនាំមកនូវកីឡាករល្បីឈ្មោះដែលជាម្ចាស់ខ្សែក្រវាត់មកប្រកួតដណ្ដើមខ្សែក្រវាត់ជាមួយកីឡាករអេ ភូថង និងអូត ភូថង ដែលជាម្ចាស់ខ្សែក្រវាត់ល្បីឈ្មោះរបស់កម្ពុជាយ៉ាងកក្រើកជាច្រើនសាដែរ ។ លោក សេង កដិកាក៏មានស្នាដៃក្នុងការរំលេចក្បាច់គុនយុទ្ធក្រមខមឱ្យមហាជនបានស្គាល់ផងដែរ ប៉ុន្តែកីឡាកររបស់កីឡានេះមិនត្រូវបានអនុញ្ញាតឱ្យប្រកួតលើរេញបន្ត ដោយសារតែមានការតវ៉ាពីសហព័ន្ធ។
ការរៀបចំឱ្យមានការប្រកួតយុទ្ធក្រមខមប្រចាំសប្ដាហ៍កាលនោះ បានជួយឱ្យប៉ុស្ដិ៍លេខ៥មានឈ្មោះបោះសំឡេង និងទទួលបានការចាប់អារម្មណ៍មិនតិចនោះទេ ទើបលោកដែលជាអ្នកផ្ដើមគំនិតមានការសោកស្ដាយក្នុងពេលដែលការប្រកួតមានការឧបត្ថម្ភ
ទៅហើយ ស្រាប់តែអត់កីឡាករឡើងរេញទៅវិញ ។ ទោះបីយ៉ាងណាក៏គេចាត់ទុកលោកថាជាអ្នកផ្ដើមឱ្យមហាជនបានស្គាល់ពីមរតកក្បាច់គុនដ៏ចំណាស់មួយនេះផងដែរ។
នៅប៉ុស្ដិ៍លេខ៥ លោកត្រូវបានគេចាត់ទុកថាជាព្រឹទ្ធាចារ្យចំណាស់មួយរូបដោយសារតែលោកបានបម្រើការងារយូរឆ្នាំជាងគេ ដែលអាចនិយាយបានថា បានរួមចំណែកតាំងពីប៉ុស្ដិ៍លេខ៥នៅជាប៉ុស្ដិ៍នាំមុខតែម្នាក់ឯងរហូតមកដល់ពេលនេះ ។ លោក សេង កដិកា បានអះអាងថា លោកមិនមានបំណងណាមួយចាកចេញពីប៉ុស្ដិ៍លេខ៥នោះទេ ហើយលោកក៏មើលមិនឃើញប៉ុស្ដិ៍ណាល្អជាងស្ថាប័នរបស់លោកនោះដែរ ទើបលោកនៅតែកាន់កម្មវិធីប្រដាល់ដោយលោកប្រកាសថានឹងរួមចំណែកធ្វើឱ្យសង្វៀនប្រដាល់របស់ខ្លួននៅតែឈរជើងបាន បើទោះជាមានសង្វៀនប្រដាល់ប្រកួតប្រជែងច្រើនយ៉ាង
ណានាពេលចុងក្រោយក្ដី ៕
ចែករំលែកព័តមាននេះ