ការស្រាវជ្រាវថ្មីមួយបានបង្ហាញថា ការបំបៅកូនរយៈពេល១ឆ្នាំអាចកាត់បន្ថយឱកាសនៃការកើតជំងឺគាំងបេះដូង ឬជំងឺដាច់សរសៃឈាមខួរក្បាលរបស់ម្តាយនៅពេលក្រោយនៃជីវិតរបស់កាត់ ។
ការស្រាវជ្រាវមួយបានរកឃើញថាម្តាយដែលបំបៅដោះកូនកាន់តែយូរ នោះគាត់នឹងទទួលបានអត្ថប្រយោជន៍នៃសុខភាពសរសៃឈាមបេះដូងកាន់តែច្រើនឡើង ។
ការស្រាវជ្រាវពីមុនបានបង្ហាញថា ម្តាយទទួលបានផលប្រយោជន៍សុខភាពរយៈពេលខ្លីពីការបំបៅដោះកូន រួមមានការស្រកទម្ងន់ និងការថយចុះជាតិកូឡេស្តេរ៉ូល សម្ពាធឈាម និងកម្រិតជាតិស្ករក្នុងអំឡុងពេលមានគភ៌ ។ ប៉ុន្តែឥទ្ធិពលរយៈពេលវែងនៃការបំបៅកូនដោះកូនចំពោះហានិភ័យនៃការវិវឌ្ឍទៅជាជំងឺសរសៃឈាមបេះដូងចំពោះម្តាយគឺមិនច្បាស់លាស់ ។
ឥឡូវនេះការស្រាវជ្រាវថ្មីមួយបានរកឃើញថាស្ត្រីដែលបំបៅដោះកូនក្នុងរយៈពេល១២ ខែមានការថយចុះហានិភ័យនៃការវិវត្តទៅជាជំងឺបេះដូង ឬជំងឺដាច់សរសៃឈាមខួរក្បាលជិត១០% ។
ក្រុមអ្នកស្រាវជ្រាវមកពីសាកលវិទ្យាល័យ Oxford បណ្ឌិត្យសភាវិទ្យាសាស្ត្រវេជ្ជសាស្ត្រចិន និងសាកលវិទ្យាល័យប៉េកាំងបានវិភាគទិន្នន័យពីស្ត្រីជនជាតិចិនចំនួន ២៨៩.៥៧៣ នាក់ ដែលមានអាយុជាមធ្យម៥១ឆ្នាំ ។ ស្ត្រីជនជាតិចិនបំបៅដោះកូនជាមធ្យមរយៈពេល១២ខែ ។
អ្នកចូលរួមក្នុងការសិក្សារនេះស្ទើរតែទាំងអស់សុទ្ធតែជាម្តាយ ហើយគ្មាននរណាម្នាក់មានជំងឺសរសៃឈាមបេះដូងនៅពេលពួកគេចូលរួមក្នុងការសិក្សានេះទេ ។
បើប្រៀបធៀបទៅនឹងស្ត្រីដែលមិនបានបំបៅកូន ម្តាយដែលបំបៅដោះកូនដោយទឹកដោះរបស់ពួកគេមានការថយចុះហានិភ័យនៃជំងឺបេះដូង៩% និងថយចុះហានិភ័យនៃជំងឺដាច់សរសៃឈាមខួរក្បាល៨% ។
ក្នុងចំណោមអ្នកម្តាយដែលបំបៅដោះកូនអស់រយៈពេល២ឆ្នាំ ហានិភ័យនៃជំងឺបេះដូងមានការថយចុះ១៨% និងហានិភ័យនៃជំងឺដាច់សរសៃឈាមខួរក្បាលថយចុះ១៧% ទាបជាងម្តាយដែលមិនដែលបំបៅដោះកូន ៕
ចែករំលែកព័តមាននេះ