រាជធានីភ្នំពេញ ៖ នៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ នាថ្ងៃសៅរ៍ទី១០ វិច្ឆិកា ខាងមុខនេះ កីឡាករហ៊ីម សារ៉ាន់ មកពីសមាគមកីឡាប្រដាល់ក្រសួងការពារជាតិ ត្រូវជួបស្វាគមន៍កីឡាករជើងខ្លាំងមកពីកូរ៉េ Youn Hajin ក្នុងប្រភេទទម្ងន់៦៥គីឡូក្រាម ចំណែកកីឡាករថៃ Kittipong Jetsada បានមកស្រុកខ្មែរម្តងទៀតដើម្បីផ្តល់ឱកាសឱ្យកីឡាករឃឹម ឌីម៉ា មកពីក្លិបអប្សរាក្បាច់គុនខ្មែរ សងសឹកក្នុងប្រភេទទម្ងន់៦០គីឡូក្រាម ។
សម្រាប់កីឡាករជនជាតិកូរ៉េរូបនេះមិនធ្លាប់មកប្រកួតនៅស្រុកខ្មែរទេ ទើបគេមិនដឹងពីប្រវត្តិប្រកួតរបស់គេច្បាស់លាស់ ប៉ុន្តែអ្នករៀបចំកម្មវិធីប្រកួតបានអះអាងថា គេមិនអន់ឡើយ ។ ចំណែកឯសារ៉ាន់ វិញ ត្រូវបានគេស្គាល់ច្បាស់ថា មានស្នៀតប្រយុទ្ធនៅលើសង្វៀនល្អគួរសម ទាំងស្នៀតកែង ជង្គង់ កណ្តាប់ដៃ និងស្នៀតជើងគឺអាចប្រើការបានយ៉ាងស្ទាត់ជំនាញ ។ ទោះបីជាយ៉ាងណា សារ៉ាន់ ក៏មិនហា៊នមើលស្រាលលើកីឡាករកូរេ៉ម្នាក់នេះដែរ ព្រោះការប្រកួតក្រៅពីពឹងលើស្នៀតប្រយុទ្ធ ក៏ពឹងលើកម្លាំង និងសំណាងផងដែរ ។
ឃឹម ឌីម៉ា មិនទាន់ដឹងថាអាចសងសឹកកីឡាករ Kittipong បានសម្រេចឬអត់នោះទេ ។ កាលពីប៉ុន្មានខែមុន Kittipong ធ្លាប់ធ្វើឱ្យឌីម៉ា ចាញ់ការប្រកួតដោយពិន្ទុទាំងមិនអស់ចិត្តរួចម្តងមកហើយនៅលើសង្វៀនទូរទស្សន៍ប៉ុស្តិ៍លេខ៣នេះតែម្តង ។ លើកនេះគណៈកម្មការរៀបចំការប្រកួតបានសម្រេចឱ្យឌីម៉ា ឡើងសងសឹក ប៉ុន្តែមហាជនមិនសង្ឃឹមថា ឃឹម ឌីម៉ា អាចសងសឹកបានសម្រេចឡើយ ព្រោះ Kittipong មិនធម្មតាទេ គេធ្លាប់ផ្តួលកីឡាករជើងខ្លាំងកម្ពុជាជាច្រើននាក់ដូចជា ឡៅ ស៊ីណាត មកពីក្លិបកងទ័ពឆត្រយោង៩១១ និងពេជ្រ សីហា មកពីសមាគមកីឡាប្រដាល់ក្រសួងការពារជាតិ គឺសុទ្ធតែធ្លាប់ចាញ់សន្លប់ក្រោមកណ្តាប់ដៃរបស់គេទាំងអស់ ។ លើកនេះឌីម៉ា មិនហ៊ានអះអាងថាអាចសងសឹកបានសម្រេច ឬអត់នោះទេ ។ តាមពិតឌីម៉ា ក៏ជាកំពូលអ្នកប្រើស្នៀតកែង និងជង្គង់ដ៏ល្អម្នាក់ដែរ តែទីបំផុតគេមិនអាចធ្វើអ្វី Kittipong បានឡើយ ។ ចាំមើលលើកនេះគេអាចសងសឹកបានសម្រេច ឬអត់ ។
ថ្ងៃនោះដែរ ក៏មានការជួបប្រកួតរវាងកីឡាករពុទ្ធ ហ៊ុច មកពីក្លិបពុទ្ធសេរីវង្ស និងកីឡាករសិង្ហ សាវ៉ន មកពីក្លិបសិង្ហកីឡា ។ កីឡាករធី តុងហ៊ី មកពីក្លិបសាលវ័ន្តកីឡា ជួបប្រកួតជាមួយកីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិ និងកីឡាករ Bedout Derect សិស្សគុននៅក្នុងក្លិបតាព្រហ្មមានជ័យ ជួបប្រកួតជាមួយកីឡាករយ៉ាម រ៉េត មកពីក្លិបរស្មីកុមារកំព្រា៕
ចែករំលែកព័តមាននេះ