រាជធានីភ្នំពេញ ៖ ព្រះសង្ឃវត្តស្ទឹងមានជ័យចំនួន២អង្គ ត្រូវបានគណៈកម្មការសង្ឃសម្រេចធ្វើការបណ្តេញចេញពីវត្ត ក្រោយរកឃើញថា សង្ឃទាំង២អង្គបានលួចលេងល្បែងស៊ីសងក្នុងវត្ត (លេងបៀ) ប្រឹព្រឹត្តទៅក្នុងកុដិលេខ១៨ ក្នុងវត្តចង្ក្រានតាព្រហ្ម ហៅវត្តស្ទឹងមានជ័យ…
រាជធានីភ្នំពេញ ៖ ព្រះសង្ឃវត្តស្ទឹងមានជ័យចំនួន២អង្គ ត្រូវបានគណៈកម្មការសង្ឃសម្រេចធ្វើការបណ្តេញចេញពីវត្ត ក្រោយរកឃើញថា សង្ឃទាំង២អង្គបានលួចលេងល្បែងស៊ីសងក្នុងវត្ត (លេងបៀ) ប្រឹព្រឹត្តទៅក្នុងកុដិលេខ១៨ ក្នុងវត្តចង្ក្រានតាព្រហ្ម ហៅវត្តស្ទឹងមានជ័យ ក្នុងសង្កាត់ស្ទឹងមានជ័យ១ ខណ្ឌមានជ័យ។ ព្រះសង្ឃទាំង២អង្គដែលត្រូវបណ្តេញចេញ មួយអង្គព្រះនាមភិក្ខុ សេង សុខា និងមួយអង្គទៀតពុំត្រូវបានបញ្ចេញអត្តសញ្ញាណ។ ចៅអធិការវត្តស្ទឹងមានជ័យ ព្រះតេជគុណ ខុន ប៊ុនធឿន បានមានសង្ឃដីកាឲ្យដឹងថា សង្ឃទាំង២អង្គដែលត្រូវបណ្តេញចេញ ធ្លាប់ត្រូវបានហៅមកណែនាំច្រើនលើកច្រើនសារហើយពាក់ព័ន្ធការលួចលាក់លេងល្បែងស៊ីសងក្នុងទីវត្តអារាម។
ព្រះតេជគុណបន្តថា ដោយសង្ឃទាំង២មិនព្រមស្តាប់តាមការណែនាំ ហើយចេះតែប្រព្រឹត្តមករហូត លុះនៅវេលាព្រឹកថ្ងៃទី១ ខែធ្នូ ឆ្នាំ២០១៧ គណៈកម្មការវត្ត ដោយមានការចូលរួមពីព្រះសង្ឃមកពី មន្ទីរធម្មការ និងសាសនា ប្រមាណ៥០អង្គ បានសម្រេច ធ្វើការបណ្តេញសង្ឃល្មើសវិន័យទាំង២អង្គ ចេញពីវត្តតែម្តង ដោយមិនបន្តអនុញ្ញាតឲ្យគង់នៅទៀតឡើយ។ ហើយសង្ឃទាំង២ ក៏ព្រមរើអីវ៉ាន់ចាកចេញតាមសម្រួលផងដែរ។
ក្នុងករណីនេះ មជ្ឈដ្ឋានទូទៅសម្តែងមតិថា គណៈកម្មការសង្ឃ ក៏ដូចជាអាជ្ញាធរ ប្រសិនបើសង្ឃមានកំហុសបែបហ្នឹងទៅហើយ គួរតែមិនបាច់អប់រំទេ គួរតែចាប់ផ្សឹកចោលទៅ ព្រោះថាព្រះសង្ឃលោកមកបួសហើយ គឺត្រូវលះបង់កិលេសគ្រប់យ៉ាងទាំងអស់ចេញពីខ្លួន ប៉ុន្តែបើលះបង់មិនបាននោះទេ ហើយល្មើសទៅនឹងវិន័យសង្ឃ វិន័យធម៌ព្រះពុទ្ធនោះ សង្ឃទាំងនោះគួរតែផ្សឹកតែម្តងទៅ ចៀសវាងប្រព្រឹត្តខុសឆ្គងនូវគន្លងធម៌ព្រះពុទ្ធសាសនា៕ ម៉ម វ៉ាន
ចែករំលែកព័តមាននេះ