ខេត្តតាកែវ ៖ ជនសង្ស័យម្នាក់ បានត្រូវនគរបាលការិយាល័យព្រហ្មទណ្ឌកម្រិតស្រាលខេត្តចាប់បញ្ជូនទៅសាលាដំបូងខេត្តក្រោមការចោទប្រកាន់ពីបទលាក់អាវុធទុក និងប្រើប្រាស់ខុសច្បាប់ ។ អាវុធខ្លីដែលបុរសនេះប្រើប្រាស់ខុសច្បាប់គឺជារបស់មន្ត្រីប៉េអឹមដែលជួបគ្រោះថ្នាក់ចរាចរណ៍កាលពីជាង១ឆ្នាំមុនជ្រុះបាត់ ហើយជនសង្ស័យរូបនេះរើសយកមកលាក់ទុកប្រើប្រាស់ ទើបកាលពីថ្ងៃទី២ វិច្ឆិកា វេលាម៉ោង៥និង១៥នាទីល្ងាចក៏ត្រូវប៉ូលិសឃាត់ខ្លួននៅក្នុងភូមិល្ហុង ឃុំតាំងដូង ស្រុកបាទី ។
លោកង៉ាន់ សារី អធិការនគរបាលស្រុកបាទីឱ្យដឹងថា ជនសង្ស័យដែលនគរបាលឃាត់ខ្លួននេះឈ្មោះឆេង រ័ត្ន ភេទប្រុស អាយុ២៨ឆ្នាំ មានស្រុកកំណើតនៅភូមិដូនលែប ឃុំគោកព្រីង ស្រុកស្វាយជ្រំ ខេត្តស្វាយរៀង បានមករស់នៅជាមួយបងធម៌នៅក្នុងភូមិខាងលើ ហើយការចាប់ខ្លួននេះយោងទៅតាមពាក្យបណ្តឹងរបស់ឈ្មោះទ្រី សាខន ភេទប្រុស អាយុ៥២ ឆ្នាំ ត្រូវជាបងធម៌របស់ជនសង្ស័យនេះតែម្តង ។
លោកអធិការនគរបាលស្រុកបន្តថា នៅក្នុងពាក្យបណ្តឹងនោះបងធម៌របស់ជនសង្ស័យបានរៀបរាប់ថា កាំភ្លើងខ្លីម៉ាកកា៥៤ មួយដើមនេះប្អូនធម៌ជាជនសង្ស័យបានរើសយកពីមន្ត្រីប៉េអឹមស្រុកបាទីម្នាក់ដែលជួបគ្រោះថ្នាក់ចរាចរណ៍កាលពីថ្ងៃទី២៣ សីហា ឆ្នាំ២០១១ វេលាម៉ោង៤និង៣០នាទីទៀបភ្លឺ នៅតាមបណ្តោយផ្លូវជាតិលេខ៣ ចន្លោះបង្គោលគីឡូម៉ែត្រលេខ៣៦និងលេខ៣៧ ។ មន្ត្រីប៉េអឹមដែលរងគ្រោះឈ្មោះទុំ អាត់ម៉ាត់ ភេទប្រុស អាយុ៣២ឆ្នាំ បានត្រូវរថយន្តបុកពេលកំពុងជិះម៉ូតូ បណ្តាលឱ្យរបួសបាក់ជើងម្ខាង ហើយជ្រុះកាំភ្លើងខ្លីពីចង្កេះ ពេលនោះជនសង្ស័យឃើញឱកាសល្អក៏រើសកាំភ្លើងខ្លីនោះយកទៅលាក់ទុករហូត ទោះបីជាបងធម៌ប្រាប់ឱ្យយកទៅប្រគល់ឱ្យគេវិញបែបណាក៏មិនព្រមែដរ ។ លុះនៅល្ងាចថ្ងៃទី២ វិច្ឆិកា បងធម៌ក៏បានប្តឹងនគរបាលឱ្យចាប់ខ្លួនតែម្តង តែអត់បានឃើញកាំភ្លើងខ្លីនោះទេ ដោយជនសង្ស័យបានគប់ចោលក្នុងស្រះទឹកបាត់ទៅហើយ ។
នៅចំពោះមុខមន្ត្រីនគរបាល ជនសង្ស័យឈ្មោះ ឆេង រ័ត្ន និយាយថា រូបគេពិតជាបានរើសយកកាំភ្លើងខ្លីពីមន្ត្រីប៉េអឹមដែលជួបគ្រោះថ្នាក់ចរាចរណ៍កាលជាង១ឆ្នាំមុននោះប្រាកដមែន គឺយកមកទុកការពារខ្លួន តែក៏ត្រូវបងធម៌ប្តឹងនគរបាលឱ្យចាប់ខ្លួន ។ លោកយ៉ុង ញីវ នាយរងការិយាល័យនគរបាលព្រហ្មទណ្ឌកម្រិតស្រាលខេត្តថ្លែងថា នៅព្រឹកថ្ងៃទី៣ វិច្ឆិកា យើងបានបញ្ជូនជនសង្ស័យដែលរក្សាទុកអាវុធខុសច្បាប់នេះទៅសាលាដំបូងខេត្ត ៕
ចែករំលែកព័តមាននេះ