ការស្រាវជ្រាវថ្មីមួយបង្ហាញថា ការទទួលទានសូកូឡា៥ដងក្នុង១សប្តាហ៍អាចជួយកាត់បន្ថយគ្រោះថ្នាក់នៃជំងឺគាំងបេះដូង ។
ការស្រាវជ្រាវមួយបានរកឃើញថាក្នុងចំណោមអ្នកមានបញ្ហាធាត់ជ្រុលដែលបានទទួលទានសូកូឡាយ៉ាងហោចណាស់៥ដងក្នុង១សប្តាហ៍ទំនងជាមិនសូវប្រឈមមុខនឹងជំងឺសរសៃឈាមបេះដូងដូចជាជំងឺគាំងបេះដូងជាដើម ។
ការស្រាវជ្រាវបានបន្ថែមថាអ្នកមានបញ្ហាធាត់ជ្រុលដែលមិនធ្លាប់ទទួលទានសូកូឡាប្រឈមនឹងហានិភ័យខ្ពស់បំផុតនៃការកើតជំងឺផ្សេងៗដែលទាក់ទងទៅនឹងជំងឺសរសៃឈាមអាកទែរបេះដូង ។
ការស្រាវជ្រាវពីមុនបានបង្ហាញពីការទាក់ទងតិចតួចនៃសូកូឡាខ្មៅក្នុងការពង្រឹងសុខភាពបេះដូងដោយសារសារធាតុប្រឆាំងអុកស៊ីតកម្មរបស់វាការពារប្រឆាំងនឹងកូឡេស្តេរ៉ូលអាក្រក់ព្រមទាំងបង្កើនលំហូរឈាម បន្ថយសម្ពាធឈាម និងការពារការកកឈាម ។
ការស្រាវជ្រាវនេះបានបង្ហាញថាឥទ្ធិពលរបស់សូកូឡាមិនកើតមានចំពោះអ្នកដែលមានទម្ងន់ធម្មតា ឬមិនគ្រប់ទម្ងន់ទេដែលអាចមកពីឥទ្ធិពលរបសវាតិចពេក ហើយដូច្នេះវាអាចមានផលប្រយោជន៍តែចំពោះអ្នកលើសទម្ងន់មានហានិភ័យខ្ពស់ក្នុងការកើតជំងឺ ផ្សេងៗដែលទាក់ទងនឹងជំងឺសរសៃឈាមអាកទែរបេះដូង ។
ក្រុមអ្នកស្រាវជ្រាវមកពី VA Boston Healthcare System បានវិភាគដល់អតីតយុទ្ធជនអាមេរិកចំនួន១៤៨.៤៦៥នាក់ដែលបានចូលរួមក្នុងកម្មវិធីអតីតយុទ្ធជនរាប់លាននាក់ដែលតាមដានសុខភាពរបស់ពួកគេទៅតាមពេលវេលា ។ អ្នកចូលរួមក្នុងការសិក្សានេះមានអាយុជាមធ្យម៦៤ឆ្នាំ និងមានបុរសចំនួន ៩០% ។
គ្មានអ្នកចូលរួមណាម្នាក់មានជំងឺសរសៃឈាមអាកទែរបេះដូងទេនៅពេលចាប់ផ្តើមការសិក្សា ។ ជំងឺសរសៃឈាមអាកទែរបេះដូងគឺជាការកកជាតិខ្លាញ់ក្នុងសរសៃឈាមអាកទែរដែលផ្គត់ផ្គង់ឈាមដល់បេះដូង នៅពេលមានបញ្ហានេះកើនឡើងវាធ្វើឱ្យមនុស្សប្រឈមនឹងការគាំងបេះដូង ។
អ្នកចូលរួមត្រូវបានគេសួរថាតើពួកគេទទួលទានទឹកដោះគោ ឬសូកូឡាខ្មៅចំនួន២៨ក្រាមដោយគ្មានរសជាតិបន្ថែមដូចជាគ្រាប់ធញ្ញជាតិ ឬស្ករខារ៉ាម៉ែលញឹកញាប់ប៉ុនណា។
ពួកគេត្រូវបានគេតាមដានអស់រយៈពេល២ឆ្នាំកន្លះ ។ អ្នកចូលរួមចំនួនប្រហែល៤.០៥៥នាក់បានជួបប្រទះនឹងព្រឹត្តិការណ៍ ផ្សេងៗទាក់ទងនឹងជំងឺសរសៃឈាមអាកទែនៅក្នុងអំឡុងពេលនៃការសិក្សា ។
លទ្ធផលបង្ហាញថា មនុស្សលើសទម្ងន់ដែលទទួលទានសូកូឡាច្រើនដងក្នុង១សបា្ដហ៍ជារៀងរាល់សប្តាហ៍មិនសូវជាមានព្រឹត្តិការណ៍ដែលទាក់ទងទៅនឹងជំងឺសរសៃឈាមអាកទែរបេះដូងនោះទេ ។
អ្នកដែលលើសទម្ងន់ច្រើនពេកហើយមិនដែលទទួលទានសូកូឡាប្រឈាមនឹងហានិភ័យខ្ពស់បំផុតក្នុងការរងគ្រោះពីជំងឺបែបនេះ ។
ការសិក្សាស្រាវជ្រាវពីមុនបានបង្ហាញថាសូកូឡាខ្មៅដែលសម្បូរទៅដោយសារជាតិប្រឆាំងអុកស៊ីតកម្មជួយការពាររាងកាយប្រឆាំងនឹងកូឡេស្តេរ៉ូលអាក្រក់ដែលបង្កឲ្យមានការកកជាតិខ្លាញ់ក្នុងសរសៃឈាមអាកទែរ ។ វាក៏មានសមាសធាតុដែលត្រូវបានគេស្គាល់ថា flavanols ដែលធ្វើឱ្យសម្ពាធឈាមថយចុះ ធ្វើឱ្យលំហូរឈាមប្រសើរឡើង ហើយធ្វើឱ្យប្លាកែតមិនសូវជាប់ស្អិត និងមិនបង្កឲ្យមានការកកស្ទះ។ ទាំងអស់នេះរួមចំណែកដល់ការកាត់បន្ថយហានិភ័យនៃព្រឹត្តិការណ៍ដែលទាក់ទងនឹងជំងឺសរសៃឈាមអាកទែរបេះដូង ៕
ចែករំលែកព័តមាននេះ