រាជធានីភ្នំពេញ ៖ ៖ ម្ហូបស្រាប់ ឬហៅថាម្ហូបអាហារចម្អិនស្រេចដាក់ច្រកថង់ ឬទុកក្នុងឆ្នាំង ដាក់តាំងលក់នៅខាងមុខរោងចក្រកាត់ដេរជាច្រើនក្នុងរាជធានីភ្នំពេញ ត្រូវគេចាត់ទុកថា«ជាម្ហូបអាហារគ្មានអនាម័យល្អ» ដោយសារតែដាក់តាំងលក់លើចិញ្ចើមផ្លូវសាធារណៈមិនបានគ្របត្រឹមត្រូវ មានផង់ធូលី…
រាជធានីភ្នំពេញ ៖ ៖ ម្ហូបស្រាប់ ឬហៅថាម្ហូបអាហារចម្អិនស្រេចដាក់ច្រកថង់ ឬទុកក្នុងឆ្នាំង ដាក់តាំងលក់នៅខាងមុខរោងចក្រកាត់ដេរជាច្រើនក្នុងរាជធានីភ្នំពេញ ត្រូវគេចាត់ទុកថា«ជាម្ហូបអាហារគ្មានអនាម័យល្អ» ដោយសារតែដាក់តាំងលក់លើចិញ្ចើមផ្លូវសាធារណៈមិនបានគ្របត្រឹមត្រូវ មានផង់ធូលី និងផ្សែងយានយន្តហុយចូល ។
សម្រាប់កម្មករ កម្មការិនីរោងចក្រចាត់ទុកថាអាហារដែលតាំងលក់នៅមុខរោងចក្ររបស់ពួកគេជារឿងធម្មតា និងចាត់ទុកជាអាហារឆ្ងាញ់ពិសា ។ ជាទូទៅគេតែសង្កេតឃើញនៅខាងមុខបរិវេណនៃបណ្តារោងចក្រ សិប្បកម្ម តូចធំ នីមួយៗនៅក្នុងរាជធានីភ្នំពេញ តែងមានអ្នកប្រកបរបរលក់ដូរម្ហូបអាហារ ដូចជា បាយ សម្ល ត្រីអាំង ជ្រក់ត្រសក់ និងជ្រក់សណ្តែក ស្ពៃជូរ ជាដើម ដាក់លក់ជាហូរហែ ដើម្បីបំពេញតម្រូវការហូបចុករបស់កម្មករ កម្មការិនី។ ពួកគេដែលទើបចេញពីធ្វើការ អាចទិញហូបបាន ភ្លាមៗ មិនពិបាកចំណាយពេលវេលាធ្វើខ្លួនឯង ឬពិបាកដើររកកន្លែងទិញហូប ។
អ្នកស្រីហាក់ សុផា អាយុ៤៨ឆ្នាំ ជាអ្នកលក់បាយសម្ល និងត្រីអាំងជាដើម នៅមុខរោងចក្រមួយស្ថិតតាមបណ្តោយផ្លូវ៣៧១ ក្នុងសង្កាត់ស្ទឹងមានជ័យ២ ខណ្ឌមានជ័យ ប្រាប់កោះសន្តិភាពកាលពីពេល ថ្មីៗកន្លងមកថា ជារៀងរាល់ថ្ងៃគាត់ចាប់លក់តាំងពីម៉ោង៩ព្រឹក ដល់ម៉ោង១២ថ្ងៃត្រង់ទើបលក់អស់ ។ ពេលលក់អស់ ម្តងៗ គឺគាត់អាចចំណេញប្រាក់ពី៣ទៅ៤ម៉ឺនរៀល ។
គាត់ និងគ្រួសារប្រកបរបរនេះអស់រយៈពេលជិត៣ឆ្នាំកន្លងមកហើយ ដោយបានដាក់លក់នៅទីតាំង៣ផ្សេងគ្នា ក្នុងនោះទីតាំង២ទៀត ប្តី និងកូនស្រីរបស់គាត់ជាអ្នកលក់ ។ បើគិតពីប្រាក់ចំណេញទាំង៣ទីតាំងក្នុង១ថ្ងៃចាប់ពី៨ទៅ១០ម៉ឺនរៀល ។
តាមការរៀបរាប់របស់អ្នកលក់ដូរម្នាក់ទៀត សុំមិនបញ្ចេញឈ្មោះបញ្ជាក់ថា គាត់អាចចំណេញប្រាក់ចាប់ពី២ ទៅ៣ម៉ឺនរៀលក្នុងមួយថ្ងៃ ក្នុងករណីដែលលក់អស់ ប៉ុន្តែបើមិនអស់ គឺប្រាកដជាខាតហើយ ព្រោះកម្មករ កម្មការិនីរោងចក្រ មិនមែនទិញម្ហូបស្រាប់ហូបរហូតទេ។ មានន័យថាកម្មករ កម្មការិនីសឹងតែ១០០% ទិញម្ហូបយកទៅចម្អិនដោយខ្លួនឯងពេលសម្រាកពីការងារពេលល្ងាច និងមួយចំនួនដែលជួលផ្ទះនៅជិតរោងចក្របានចម្អិនអាហារដោយខ្លួនឯង ។
ស្ត្រីដដែលនោះនិយាយថា៖ «ភាគច្រើនកម្មករ កម្មការិនីដែលទិញអាហារ ស្រាប់ៗ គឺជាអ្នកដែលមានទីលំនៅ ឆ្ងាយៗពីរោងចក្រ តែសម្រាប់កម្មករ កម្មការិនីជួលផ្ទះជិតរោងចក្រ គឺគេតែងតែឆ្លៀតទិញបន្លែ ត្រីសាច់ដើម្បីចម្អិនដោយខ្លួនឯង ដោយគ្រាន់តែទិញបាយសដាក់ប្រអប់ត្រឹម៥០០រៀល ឬត្រឹម១ពាន់រៀលតែប៉ុណ្ណោះ» ។
ថ្លែងប្រាប់កោះសន្តិភាព កម្មករកម្មការិនីជាច្រើនបញ្ជាក់ថា ពួកគាត់ស៊ាំនឹងអាហារដែលដាក់លក់នៅមុខរោងចក្រទៅហើយ បើទោះបីជាមជ្ឈដ្ឋានទូទៅចាត់ទុកជាប្រភេទអាហារដែលគ្មានអនាម័យត្រឹមត្រូវក៏ដោយ ។
ពួកគេធ្វើការមួយថ្ងៃ២ពេល ដូច្នេះហើយពុំមានពេលវេលាគ្រប់គ្រាន់ទៅទិញសាច់ បន្លែ យកទៅចម្អិនខ្លួនឯងទេ មានតែទិញម្ហូបស្រាប់បែបនេះហើយ ទើបអាចចូលធ្វើការទាន់ពេល ។ កន្លងមកពួកគេពុំធ្លាប់កើតមានជម្ងឺអ្វីធ្ងន់ដោយសារតែការទិញអាហារលក់មុខរោងចក្រយកទៅបរិភោគទេ ។
កម្មករ កម្មការិនីមួយចំនួននិយាយថា ប្រាក់ខែរបស់ពួកគេតិច ដូច្នេះទទួលទានតាមលទ្ធភាព មិនអាចចូលហាងធំដុំដែលមានអនាម័យបានទេ ៕
ចែករំលែកព័តមាននេះ