រាជធានីភ្នំពេញ ៖ បុរសម្នាក់៣នាក់ស្រវឹងស្រាជិះម៉ូតូម៉ាកហុងដាឌ្រីម ខឹងរថយន្តមួយគ្រឿងកៀរបណ្តាលឲ្យដួល ចៃដន្យអីប្រទះឃើញម្ចាស់រថយន្តឈប់បត់ជើងតូច ពួកគេក៏ឈប់ម៉ូតូវាយម្ចាស់ឡានមួយដៃ ម្ចាស់ឡានខឹងដកកាំភ្លើងបាញ់មួយគ្រាប់ឡើងលើរួចវាយខាងម៉ូតូបណ្តាលឲ្យរងរបួសធ្ងន់បែកក្បាលហូរឈាមពេញខ្លួន។ ហេតុការណ៍នេះបានកើតឡើងកាលពីវេលាម៉ោង៨ និង១៥នាទីយប់ ថ្ងៃទី២៦…
រាជធានីភ្នំពេញ ៖ បុរសម្នាក់៣នាក់ស្រវឹងស្រាជិះម៉ូតូម៉ាកហុងដាឌ្រីម ខឹងរថយន្តមួយគ្រឿងកៀរបណ្តាលឲ្យដួល ចៃដន្យអីប្រទះឃើញម្ចាស់រថយន្តឈប់បត់ជើងតូច ពួកគេក៏ឈប់ម៉ូតូវាយម្ចាស់ឡានមួយដៃ ម្ចាស់ឡានខឹងដកកាំភ្លើងបាញ់មួយគ្រាប់ឡើងលើរួចវាយខាងម៉ូតូបណ្តាលឲ្យរងរបួសធ្ងន់បែកក្បាលហូរឈាមពេញខ្លួន។ ហេតុការណ៍នេះបានកើតឡើងកាលពីវេលាម៉ោង៨ និង១៥នាទីយប់ ថ្ងៃទី២៦ ខែវិច្ឆិកា ឆ្នាំ២០១៧តាមបណ្តោយផ្លូវ៥៩៨ នៅចំណុចមុខហ្ការ៉ាសសាំងតេលា ក្បែរនឹងស្នងការរាជធានីភ្នំពេញ ស្ថិតនៅក្នុងសង្កាត់ច្រាំងចំរេះ២ ខណ្ឌឫស្សីកែវ។
តាមប្រភពព័ត៌មានពីម្ចាស់រថយន្តBMW សុំមិនបញ្ចេញឈ្មោះបានឲ្យដឹងថា មុនពេលកើតហេតុគាត់បើករថយន្តមួយគ្រឿងម៉ាកBMW ពណ៌ទឹកប្រាក់ ពាក់ស្លាកលេខភ្នំពេញ 2AG-7898 បើកបរតាមបណ្តោយផ្លូវ៥៩៨ ក្នុងទិសដៅពីជើងទៅត្បូង ខណៈមកដល់ជិតនឹងកន្លែងកើតហេតុគាត់ក៏ឈប់រថយន្តរបស់គាត់ដើម្បីបត់ជើងតូច ស្រាបតែមានបុរស៣នាក់ជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ មិនចាំស្លាកលេខ ហើយម្នាក់ជិះកណ្តាលស្រវឹងស្រាមិនដឹងថាមានមូលហេតុអីនឹងគោលបំណងអីនោះទេ បានជាមកវាយគាត់មួយដៃចំមាត់ បណ្តាលឲ្យបែកមាត់រួចគាត់ក៏ដកកាំភ្លើងរបស់គាត់បាញ់មួយគ្រាប់ឡើងលើដើម្បីការពារខ្លួនតែប៉ុណ្ណោះ។
បើតាមប្រភពព័ត៌មានពីខាងបុរសដែលរងរបួសខាងម៉ូតូមានឈ្មោះ សឿន សុផៃ អាយុ១៩ឆ្នាំ ស្នាក់នៅផ្លូវ៥៩៨ សង្កាត់ច្រាំងចំរេះ២ ខណ្ឌឫស្សីកែវបានរៀបរាប់ប្រាប់ឲ្យដឹងថា មុនពេលកើតហេតុគាត់ជិះម៉ូតូជាមួយមិត្តភក្តិរបស់គាត់មកពីផឹកស៊ីនៅម្តុំស្ពានព្រែកព្នៅ រួចក៏ធ្វើដំណើរមកតាមបណ្តោយផ្លូវ៥៩៨ ក្នុងទិសដៅពីជើងទៅត្បូង ស្រាប់តែមានរថយន្តខាងលើបើកមកៀរគាត់បណ្តាលឲ្យដួលម៉ូតូ ប៉ុន្តែសំណាងល្អមិនមានរងរបួសធ្ងន់អីនោះទេក៏ឡើងម៉ូតូជិះទៅមុខទៀត។
ចៃដន្យអីក៏ឃើញម្ចាស់រថយន្តឈប់រថយន្តបត់ជើងតូចគាត់ខឹងពេកទើបវាយម្ចាស់រថយន្តមួយដៃ ទើបម្ចាស់រថយន្តនោះដកកាំភ្លើងបាញ់មួយគ្រាប់ហើយយកកាំភ្លើងវាគាត់បណ្តាលឲ្យបែកក្បាលហូរឈាមស្រោចពេញខ្លួន។ ភ្លាមៗនោះដែលមិត្តភក្តិគាត់ក៏បានឡើងម៉ូតូជិះរត់គេចខ្លួនចោលគាត់បាត់ស្រមោល។ ក្រោយពេលកើតហេតុភាគីទាំងសងខាងត្រូវបានសមត្ថកិច្ចឃាត់ខ្លួនយកទៅសួរនាំនៅអធិការដ្ឋាននគរបាលខណ្ឌឫស្សីកែវ ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ