ការស្រាវជ្រាវថ្មីមួយបានបង្ហាញថា ការផ្លាស់ប្តូររបបអាហាររបស់អ្នកដើម្បីថែរក្សាបាក់តេរីល្អក្នុងពោះវៀនអាចជួយការពារអ្នកពីជំងឺដែលទាក់ទងនឹងអាយុស្ទើរតែទាំងអស់ ។
តាមការស្រាវជ្រាវថ្មីពីសាកលវិទ្យាល័យវេជ្ជសាស្ត្រ Medical Center Groningen នៃប្រទេសហូឡង់បានរកឃើញថាបាក់តេរីក្នុងពោះវៀនដែលមិនមានតុល្យភាពអាចបង្កឲ្យមានជំងឺដែលទាក់ទងនឹងអាយុជាច្រើន ។
ក្រុមអ្នកស្រាវជ្រាវបានរកឃើញថាបាក់តេរីក្នុងពោះវៀនរបស់សត្វកណ្តុរមានវ័យ
ចំណាស់ដែលមានតុល្យភាពតិចតួចអាចបង្កឱ្យមានការរលាកនៅពេលគេបញ្ជូនបាក់តេរីទាំងនោះទៅកណ្តុរ ក្មេងៗ ។
ការរលាកគឺជាជំងឺរលាករ៉ាំរ៉ៃដែលទាក់ទងទៅនឹងភាពចាស់ដែលវាមានការទាក់ទងទៅនឹងបញ្ហាសុខភាពទាក់ទងនឹងការមានអាយុច្រើនដូចជាជំងឺដាច់សរសៃឈាមខួរក្បាល ជំងឺវង្វេង និងជំងឺសរសៃឈាមបេះដូង ។
ក្រុមអ្នកវិទ្យាសាស្ដ្រដឹងថាមនុស្សចាស់តែងមានបាក់តេរីក្នុងពោះវៀនខុសគ្នាពីមនុស្សវ័យក្មេង ។ ការស្រាវជ្រាវថ្មីនេះបានបង្ហាញថាការប្រែប្រួលនៃតុល្យភាពបាក់តេរីក្នុងពោះវៀននេះមានការទាក់ទងទៅនឹងការរលាកដែលជាទូទៅទាក់ទងនឹងជំងឺរបស់មនុស្សចាស់ ។
គេមិនច្បាស់ទេថាតើវ័យកាន់តែចាស់បង្កឱ្យមានការរលាក ឬការរលាកបង្ករឱ្យមានវ័យចំណាស់ ប៉ុន្តែបញ្ហា២នេះមានការទាក់ទងទៅវិញទៅមក ហើយជំងឺជាច្រើនក៏មានការចូលរួមពីបញ្ហាទាំង២នេះដែរ ។
ក្រុមអ្នកវិទ្យាសាស្ត្រដឹងថាបាក់តេរីក្នុងពោះវៀនក៏មានការប្រែប្រួលទៅតាមអាយុផងដែរ ។ ក្រុមអ្នកស្រាវជ្រាវដែលដឹកនាំដោយលោកវេជ្ជបណ្ឌិត Floris Fransen ចង់ធ្វើតេស្តពីការទាក់ទងរវាងកត្តាទាំង៣ ។
ពួកគេបានយកសំណាកពីសត្វកណ្តុរចាស់ ដែលសមាសធាតុបាក់តេរីពោះវៀនដូចមនុស្សប្រែប្រួលទៅតាមអាយុ ហើយបញ្ចូលបាក់តេរីនោះក្នុងខ្លួនសត្វកណ្តុរវ័យក្មេង ។ បន្ទាប់ពីធ្វើរោគវិនិច្ឆ័យ សត្វកណ្តុរវ័យក្មេងកើតជាការរលាករ៉ាំរ៉ៃដូចជាការរលាកដែលកើនឡើងនៅពេលមានវ័យចាស់ ។
ក្រុមអ្នកវិទ្យាសាស្ត្រក៏បានបញ្ចូលបាក់តេរីក្នុងពោះវៀនរបស់កណ្តុរ ក្មេងៗមួយក្រុមទៅកណ្តុរមួយក្រុមទៀតដែលមានអាយុប្រហែលគ្នាដើម្បីពិនិត្យមើលថាតើការរលាកនេះគឺជាការឆ្លើយតបនៃប្រព័ន្ធភាពស៊ាំទៅនឹងបាក់តេរីដែលនាំចូលខ្លួនវា ឬយ៉ាងណា ។
ប៉ុន្តែមានតែសត្វកណ្តុរដែលត្រូវបានបញ្ចូលបាក់តេរីក្នុងពោះវៀនពីកណ្តុរចាស់វិវឍ្ឍជាការរលាក ។ ភាពខុសគ្នានៃការឆ្លើយតបនេះបានបង្ហាញក្រុមអ្នកស្រាវជ្រាវថាភាពចាស់នាំឱ្យមានអតុល្យភាពបាក់តេរីក្នុងពោះវៀនដែលវាធ្វើឲ្យមានបាក់តេរីអាក្រក់ច្រើនជាងបាក់តេរីល្អ ។
ការរីកសាយពពួកបាក់តេរីអាក្រក់ធ្វើឱ្យស្រទាប់ពោះវៀនងាយនឹងជ្រាបជាតិពុលដែលអាចចម្លងរោគដល់ចរន្តឈាម និងនាំឱ្យមានបញ្ហាដូចជាជំងឺរលាកពោះវៀនធំ ជំងឺធាត់ជ្រុល ជំងឺទឹកនោមផ្អែម ជំងឺថប់អារម្មណ៍ ជំងឺអូទីស និងជំងឺមហារីក ៕
ចែករំលែកព័តមាននេះ