ខេត្តកណ្តាល ៖ បុរសម្នាក់ត្រូវបានចោទថាប៉ុនប៉ងប្លន់ បានដកកាំភ្លើងខ្លីភ្ជង់គំរាមមេការ ហើយត្រូវក្រុមសន្តិសុខព្រួតគ្នាចាប់វាយប៉ោងមុខរហូតដង្ហើមចង្រិតទើបប្រគល់ឲ្យសមត្ថកិច្ចចាត់ការ ដែលអ្នកនៅទីនោះនាំគ្នានិយាយថា ចូលរូងខ្លាហើយ ហ៊ានដកពុកមាត់ខ្លាទៀត ។ ករណីនេះ…
ខេត្តកណ្តាល ៖ បុរសម្នាក់ត្រូវបានចោទថាប៉ុនប៉ងប្លន់ បានដកកាំភ្លើងខ្លីភ្ជង់គំរាមមេការ ហើយត្រូវក្រុមសន្តិសុខព្រួតគ្នាចាប់វាយប៉ោងមុខរហូតដង្ហើមចង្រិតទើបប្រគល់ឲ្យសមត្ថកិច្ចចាត់ការ ដែលអ្នកនៅទីនោះនាំគ្នានិយាយថា ចូលរូងខ្លាហើយ ហ៊ានដកពុកមាត់ខ្លាទៀត ។
ករណីនេះ កើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី២១ ខែវិច្ឆិកា នៅកាស៊ីណូឌីយ៉ាងម៉ុង ស្ថិតក្នុងភូមិក្អមសំណក្រោម ឃំុក្អមសំណ ស្រុកលើកដែក ។បុរសដែលរងការចោទប្រកាន់ថា បានដកកាំភ្លើងខ្លីគំរាមត្រូវបានគេស្គាល់ថាឈ្មោះ អ៊ុំ សុភ័ក្ត្រ អាយុ៣៤ឆ្នាំ មុខរបរមិនច្បាស់លាស់ ដោយសារមានការលាក់បាំងគ្រាន់តែសង្ស័យថាអាចជាមន្ត្រីនគរបាល មានទីលំនៅក្នុងរាជធានីភ្នំពេញ ។ ដោយសារគាត់រងរបួសធ្ងន់ធ្ងរពេក កោះសន្តិភាពមិនអាចសុំការបំភ្លឺពីគាត់បានទេ ក្នុងពេលកើតហេតុនោះ ។
បុរសរូបនេះ បានត្រូវក្រុមសន្តិសុខកាស៊ីណូព្រួតគ្នាវាយប៉ោងមុខមើលលែងស្គាល់ និងដកយកបានកាំភ្លើងខ្លី១ដើមម៉ាកប៉េអាកុល តួពណ៌ស ស្នាប់ពណ៌ខ្មៅ ផលិតនៅសហរដ្ឋអាមេរិក មាន៩គ្រាប់ ខ្នោះដៃ១ ម៉ូតូហុងដាគុបសេ៥០ មួយគ្រឿងពណ៌ស្លែ ពាក់ផ្លាកលេខភ្នំពេញ១A-១៥០៩ រូបថតឯកសណ្ឋានគរបាលមួយកំណាត់ខ្លួន១សន្លឹក កាបូបស្ពាយពណ៌ឈាមជ្រូក១ និងសម្ភារមួយចំនួនទៀត រួចប្រគល់ទៅឲ្យសមត្ថកិច្ចនគរបាលចាត់ការតាមនីតិវិធី ។
ចំណែកមេការកាសុីណូឌីយ៉ាម៉ុង ដែលរងការគំរាមកំហែងឈ្មោះ អៀង សុងទ្រី ភេទប្រុស អាយុ២៥ឆ្នាំ ស្នាក់នៅក្នុងកាស៊ីណូនោះតែម្តង ។ប្រភពព័ត៌មាននិយាយថា កាសុីណូនេះបានក្ស័យធនបិទទ្វាររយៈពេលយូរឆ្នាំមកហើយ ដោយសារតែកាសុីណូមួយនេះ លេងកៀបភ្ញៀវខ្លាំងពេក ជួនកាលអ្នកឈ្នះក៏ពិបាកចេញដែរ ទើបឧស្សាហ៍កើតមានរឿងជាញឹកញាប់រហូតស្ងាត់ភ្ញៀវ ។ ស្រាប់តែឥឡូវដំណើរការបើកលេងឡើងវិញ ដែលគេសង្ស័យថាគ្មានច្បាប់ និងទើបបើកលេងម៉ាងបានប្រហែល៤ខែប៉ុណ្ណោះ ព្រមទាំងមានរឿងរ៉ាវជាបន្តបន្ទាប់ដោយសារតែខ្មែរចូលលេងចាញ់ងើបមុខមិនរួច ។
ប្រភពដដែលបន្តទៀតថា អ្នកគ្រប់គ្រងកាសុីណូនេះត្រូវគេស្គាល់ថាឈ្មោះ លីន ដែលបើកលេងល្បែងសុីសងគ្រប់ប្រភេទមាន បៀ អាប៉ោង យូគី ល្បែងលេងតាមអុីនធើរណេត។ល។ ដោយបើកលេងទាំងយប់ទាំងថ្ងៃ ។ ជាពិសេសទៀតនោះ គឺល្បែងបញ្ជល់មាន់ ដែលមានជនជាតិខ្មែរចូលលេងយ៉ាងច្រើនកុះករ ចាញ់ម្នាក់ៗសុទ្ធតែរាប់ពាន់ដុល្លារក្នុងមួយថ្ងៃៗ ។ប្រភពព័ត៌មានបន្តថា កាសុីណូនេះល្បីថា មានមន្ត្រីថ្នាក់ផ្កាយ៣ម្នាក់នៅពីក្រោយខ្នង ហេតុនេះហើយទើបអាជ្ញាធរស្រុក ឃុំ មិនហ៊ានទៅក្បែរចង់គេធ្វើអីធ្វើទៅ ។
សព្វថ្ងៃនៅក្នុងឃុំក្អមសំណនេះ ក្រៅពីល្បែងសុីសងគ្រប់ប្រភេទ កើតមាននៅក្នុងកាសុីណូ ដែលគេសង្ស័យថាម៉ាងច្បាប់ ក៏នៅមានល្បែងសុីសងខាងក្រៅតាមភូមិដូចជាបៀ កន្ទុយលេខ(ឆ្នោតវៀតណាម) ដែលមានមេដ៏ធំម្នាក់ជាអ្នកមានអំណាច និងជំនាញខាងរត់ពន្ធទំនិញចេញចូល ទៅមកប្រទេសវៀតណាម ដោយដាក់ពង្រាយកូនកញ្ច្រែងដើរប្រមូលកន្ទុយលេខស្ទើរគ្រប់ឃុំ ក្នុងស្រុកលើកដែក និងមិនដែលសមត្ថកិច្ចណាមានចំណាត់ការនោះទេ ។
ពលរដ្ឋក្នុងមូលដ្ឋាននិយាយថា ឃុំដែលមានព្រំប្រទល់ជាប់ព្រំដែនមួយនេះ មិនត្រឹមតែកើតមានល្បែងសុីគ្រប់ប្រភេទបើកលេងយ៉ាងចំហ និងអនាធិបតេយ្យប៉ុណ្ណោះទេ ការចែកចាយជួញដូរ និងប្រើប្រាស់គ្រឿងញៀនក៏កំពុងតែកើតមានច្រើនណាស់ដែរ ធ្វើឲ្យពួកគាត់មានការព្រួយបារម្ភយ៉ាងខ្លាំងពីអនាគតកូនចៅ ។
ពាក់ព័ន្ធនឹងរឿងរ៉ាវខាងលើ ភ្នាក់ងារកោះសន្តិភាពបានព្យាយាមទាក់ទងសុំការបំភ្លឺពីលោក រស់ ចាន់ថា អធិការនគរបាលស្រុកលើកដែកដែរ តែត្រូវលោកប្រាប់ថាជាប់រវល់និងឲ្យសួរទៅខាងជំនាញវិញ ។ ដោយឡែក លោក ស៊ឹម សារិន អធិការរងនគរបាលស្រុកទទួលបន្ទុកជំនាញបានប្រាប់ភ្នាក់ងារយើងយ៉ាងខ្លីថា លោកកំពុងជាប់ធ្វើកំណត់ហេតុ បញ្ជូនជនសង្ស័យនិងវត្ថុតាងទៅខេត្ត ។
អ្នកមាត់ដាចខ្លះនិយាយថា គេចោមវ៉ៃស្ទើរស្លាប់ស្ទើររស់ហើយ ទំនងមានទោសទៀត ។ បើអុីចឹងមែនថ្ងៃក្រោយបើមិនរាងទេ មិនដឹងជួយប្រាប់ថាម៉េចទេ…មានតែប្រដៅថា សុំកុំរាង !ចំណែកអ្នកចោមរោមវ៉ៃដែលជាខ្លាកាស៊ីណូ ទំនងរួចខ្លួនយ៉ាងក្រអឺតទៀតផង…មែនទេ ?
ចែករំលែកព័តមាននេះ