ការស្រាវជ្រាវថ្មីបានព្រមានថាការទទួលទានភេសជ្ជៈមានជាតិហ្គាសត្រឹមតែ២កំប៉ុងក្នុង១សប្តាហ៍គឺគ្រប់គ្រាន់ក្នុងការបង្កើនហានិភ័យនៃជំងឺទឹកនោមផ្អែម សម្ពាធឈាមឡើងខ្ពស់ ជំងឺបេះដូង និងជំងឺដាច់សរសៃឈាមខួរក្បាល ។
ការស្រាវជ្រាវក៏បានបង្ហាញផងដែរថាការទទួលទានភេសជ្ជៈប្រភេទនេះត្រឹមតែ១កំប៉ុងក្នុង១ថ្ងៃអាចធ្វើឲ្យសម្ពាធឈាមកើនឡើងព្រោះវាមានជាតិស្ករ១៤ក្រាមច្រើនជាងបរិមាណជាតិស្ករដែលអ្នកគួរទទួលទានប្រចាំថ្ងៃ ។
ឥឡូវនេះក្រុមអ្នកស្រាវជ្រាវបានរកឃើញភស្តុតាងជាច្រើនបន្ថែមទៀតដែលបង្ហាញថាការទទួលទានភេសជ្ជៈមានជាតិហ្គាសត្រឹមតែបរិមាណតិចតួចក្នុង១សប្តាហ៍អាចនាំឱ្យមានហានិភ័យនៃជំងឺមេតាបូលីសដែលជាបណ្តាជំងឺបង្កើនឱកាសនៃជំងឺបេះដូង ជំងឺដាច់សរសៃឈាមខួរក្បាល និងជំងឺទឹកនោមផ្អែម ។
ការស្រាវជ្រាវដែលបានចេញផ្សាយនៅក្នុងព្រឹត្តិប័ត្រ Endocrine Society បានបង្ហាញពីកត្តាហានិភ័យនៃភេសជ្ជៈមានជាតិហ្គាស រួមមានទាំងការឡើងទម្ងន់ កម្រិតជាតិខ្លាញ់ខ្ពស់នៅក្នុងឈាម សម្ពាធឈាមឡើងខ្ពស់ ជាតិស្ករក្នុងឈាមខ្ពស់ និងការថយចុះកម្រិតកូឡេស្តេរ៉ូលល្អ ។
ការស្រាវជ្រាវនេះបានវិភាគលើការស្រាវ ជ្រាវចំនួន៣៦ទាក់ទងនឹងអ្នកទទួលទានភេសជ្ជៈមានជាតិស្ករច្រើនជាង៥ដងក្នុង១សប្តាហ៍ និងកត្តាហានិភ័យនៃការទទួលទានភេសជ្ជៈមានហ្គាសពីទសវត្សរ៍មុន ។
ការរកឃើញមួយចំនួនបានបង្ហាញថាការទទួលទានភេសជ្ជៈដែលមានជាតិស្ករញឹកញាប់អាចប៉ះពាល់ដល់កម្រិតអាំងស៊ុយលីនដែលរួមចំណែកដល់ការវិវឍ្ឍជំងឺមេតាបូលីស និងជំងឺទឹកនោមផ្អែមប្រភេទ២ ។ នៅក្នុងការស្រាវជ្រាវ បុគ្គលដែលទទួលទានភេសជ្ជៈមានជាតិស្កររយៈពេល១០សប្តាហ៍បានបង្ហាញពីការថយចុះប្រតិកម្មរបស់អាំងស៊ុយលីនចំនួន១៧% ។
វាក៏មានភស្តុតាងដែលបង្ហាញថាការទទួលទានភេសជ្ជៈមានជាតិហ្គាសញឹកញាប់មានការទាក់ទងទៅនឹងជំងឺលើសឈាម និងជំងឺសរសៃឈាមបេះដូង ។
អង្គការសហប្រជាជាតិបានព្រមានកាលពី៦ឆ្នាំកន្លងមកថាជំងឺរ៉ាំរ៉ៃបង្កឱ្យមានគ្រោះថ្នាក់ដល់សុខភាពច្រើនជាងជំងឺឆ្លង ។ ជំងឺមេតាបូលីស និងជំងឺទឹកនោមផ្អែមធ្វើអោយមនុស្ស១៩លាននាក់ទូទាំងពិភពលោកស្លាប់ក្នុង មួយឆ្នាំៗ ៕
ចែករំលែកព័តមាននេះ