រឿងកាន់តែធំហើយ អគ្គនាយកអាជ្ញាធរជាតិអប្សរា
- សៀមរាប
ខេត្តសៀមរាប ៖ នាថ្ងៃទី១២ ខែវិច្ឆិកា ឆ្នាំ២០១៧នេះ ដីបុរីសណ្ឋាគារអង្គរ ដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា…
ខេត្តសៀមរាប ៖ នាថ្ងៃទី១២ ខែវិច្ឆិកា ឆ្នាំ២០១៧នេះ ដីបុរីសណ្ឋាគារអង្គរ ដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញអនុក្រឹត្យលេខ ១៥៨ អ ន ក្រ.បក ចុះថ្ងៃទី២៥ ខែកក្កដា ឆ្នាំ២០១៦ កាត់ចេញ ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋវិញនោះ មកដល់ពេលនេះមានរយៈពេលជាងមួយឆ្នាំហើយ ដែលប្រជាពលរដ្ឋ មួយចំនួនធំនៅតែមិនទាន់បានទទួលប័ណ្ណកម្មសិទ្ធិពេញលេញនៅឡើយ។ សូមបញ្ជាក់ផងដែរថា ដីមានទំនាស់ជាមួយអាជ្ញាធរអប្សរានោះ មានទីតាំងស្ថិតនៅចំណុចផ្លូវ៦០ម៉ែត្រ ខាងកើតឃ្យុងយូ ក្នុងភូមិបឹងដូនប៉ា ភូមិចុងកៅស៊ូ ភូមិអញ្ចាញ និងភូមិព្រៃគុយ សង្កាត់ស្លក្រាម ក្រុង/ខេត្តសៀមរាប។
ប្រជាពលរដ្ឋទាំងនោះបានអះអាងថា លោក ស៊ុំ ម៉ាប់ អគ្គនាយកអាជ្ញាធរជាតិអប្សរា បាន និងកំពុងក្រាញននៀលរំលោភយកដីពួកគាត់ ទោះបីដឹងថាដីពួកគាត់មានឯកសារត្រឹមត្រូវយ៉ាងណាក៏ដោយ ថែមទាំងផ្គើនទៅនឹងអនុក្រឹត្យរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាទៀតផង។ លោកស្រី លី អ៊ុំអេង មានទីលំនៅភូមិខ្នារ សង្កាត់ជ្រាវ ក្រុងសៀមរាប ដែលជាជនរងគ្រោះមួយរូបផងដែរនោះ បានមានប្រសាសន៍ថា នាងខ្ញុំបានទិញដីនេះពីប្រជាពលរដ្ឋហើយធ្វើប្លង់រឹងស្លាបមាន់ នៅខែឧសភា ឆ្នាំ១៩៩៤ តាំងពីសម័យរដ្ឋកម្ពុជា រួចរាល់អស់ហើយ។ តែក្រោយមកដីនេះត្រូវបានដាក់បញ្ចូលទៅជាតំបន់បុរីសណ្ឋាគារ ដែលគ្រប់គ្រងដោយអាជ្ញាធរអប្សរា ហើយអាជ្ញាធរអប្សរា បានដោះស្រាយជាតម្លៃគោលនយោបាយជូនប្រជាពលរដ្ឋ អស់ហើយដែរ ប៉ុន្តែប្រជាពលរដ្ឋមួយចំនួនក៏បានទទួលយកតម្លៃគោលនយោបាយនេះ ហើយមួយចំនួនទៀត មិនបានដោះស្រាយគោលនយោបាយជាមួយអាជ្ញាធរអប្សរាទេ ដោយពួកគាត់បានគ្រប់គ្រង និងអាស្រ័យផលទុកសម្រាប់ចែកកូនចែកចៅទៅថ្ងៃក្រោយ។
លោកស្រីបន្តថា នាងខ្ញុំក៏មិនបានដោះស្រាយ គោលនយោបាយជាមួយអាជ្ញាធរអប្សរាទេ គឺនាងខ្ញុំមានប័ណ្ណកម្មសិទ្ធិស្លាបមាន់ ដែលរក្សាទុករហូតមកដល់បច្ចុប្បន្នជាភស្តុតាង ស្រាប់។ លោកស្រី បានបន្តទៀតថា នៅឆ្នាំ២០១៦ សម្តេចតេជោ នាយករដ្ឋមន្ត្រី ដែលជាព្រះរស់របស់ពួកខ្ញុំទាំងអស់គ្នា បានចេញអនុក្រឹត្យលេខ១៥៨អនក្រ.បក ចុះថ្ងៃទី២៥ ខែកក្កដា ឆ្នាំ២០១៦ កាត់ដីទាំងនេះចេញ ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋវិញ ចំពោះប្រជាពលរដ្ឋណាដែលមិនទាន់បានដោះស្រាយគោលនយោបាយជាមួយអាជ្ញាធរអប្សរា ហើយអាជ្ញាធរខេត្ត និងមន្ទីរសូរិយោដី និងសមត្ថកិច្ច ក៏បានបន្តនីតិវិធីធ្វើវាស់វែង ដើម្បីចេញវិញ្ញាបនបត្រកម្មសិទ្ធិជូនប្រជាពលរដ្ឋភ្លាមៗផងដែរ។ លោកស្រី បានអះអាងថា លោក ស៊ុំ ម៉ាប់ និយាយនេះជារឿងមិនពិតទេ ព្រោះថាក្រុមគ្រួសាររបស់លោកមិនបានដោះស្រាយគោលនយោបាយជាមួយអាជ្ញាធរអប្សរាទេ ព្រោះប័ណ្ណកម្មសិទ្ធិចាស់ នាងខ្ញុំរក្សាទុកមកដល់បច្ចុប្បន្ន បើគ្រួសារនាងខ្ញុំដោះស្រាយគោលនយោបាយជាមួយអាជ្ញាធរអប្សរាមែននោះ អាជ្ញាធរអប្សរាច្បាស់ជាដកប័ណ្ណកម្មសិទ្ធិរបស់គាត់ទុកបាត់ទៅហើយ មិនមែននាងខ្ញុំ រក្សាទុកមកដល់បច្ចុប្បន្ននេះទេ។
លោកស្រីបាននិយាយយ៉ាងម៉ឺងម៉ាត់ថា បើអាជ្ញាអប្សរាមានឯកសារថាដីនោះបានដោះស្រាយគោលនយោបាយមែន សូមឱ្យអាជ្ញាធរអប្សរាបង្ហាញឯកសារមក បើមានមែនក្រុមគ្រួសារនាងខ្ញុំសុខចិត្តប្រគល់ដីទាំងនោះជូនអាជ្ញាធរអប្សរា តែបើគ្មានទេសូមឱ្យអាជ្ញាធរអប្សរា ប្រគល់ដីទាំងនោះទៅឱ្យពួកគាត់វិញឱ្យបានឆាប់ស្របតាមអនុក្រឹត្យរបស់សម្តេចតេជោ នាយករដ្ឋមន្ត្រី ហើយបើអាជ្ញាធរអប្សរាដោះស្រាយគោលនយោបាយជាមួយអ្នកផ្សេងវិញនោះដែលមិនមែនជាម្ចាស់ដីពិតប្រាកដ ត្រួតលើដីពួកគាត់ នោះពួកគាត់មិនទទួលខុសត្រូវឡើយ។ ហើយនាងខ្ញុំបានសុំច្បាប់ ទៅអាជ្ញាធរខេត្ត និងអាជ្ញាធរអប្សរា ចុះហេតុអ្វីបានជាខាងអាជ្ញាធរខេត្តចេញច្បាប់មកមុន ព្រោះបានដាក់ពាក្យអំណាលគ្នា ឬខាងអាជ្ញាធរអប្សរាមានបំណង ចង់ធ្វើបាបក្រុមគ្រួសារនាងខ្ញុំ ថែមទាំងឱ្យកូនចៅយកឡានមកបិទផ្លូវ ដើម្បីមិនឱ្យរថយន្តរបស់នាងខ្ញុំ ចូលចាក់ដីថែមទៀតផង។ ជាចុងក្រោយលោកស្រី និងក្រុមគ្រួសារ សូមអំពាវនាវដល់សម្តេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ដែលជាម្លប់ដ៏ត្រជាក់របស់កូនចៅ តាមរយៈទំព័រសារព័ត៌មាន សូមលោកមេត្តាជួយអន្តរាគមន៍ រឿងនេះដល់ក្រុមគ្រួសារនាងខ្ញុំផង ព្រោះលោក ស៊ុំ ម៉ាប់ អគ្គនាយកអាជ្ញាធរជាតិអប្សរាបាន និងកំពុងធ្វើព្យុះធ្វើភ្លៀងដាក់ប្រជាពលរដ្ឋនៅខេត្តសៀមរាប យ៉ាងខ្លាំងក្លាបំផុត សូម្បីប្រជាពលរដ្ឋធ្វើស្រែចម្ការលើដី ឬធ្វើទ្រុងមាន់ ដែលពួកគាត់ មានស្រាប់ក៏ធ្វើមិនបានផង។
គួររម្លឹកផងដែរថាទោះជាយ៉ាងណាក៏ដោយ មកដល់ពេលនេះមានរយៈពេលជាងមួយឆ្នាំហើយ ប្រជាពលរដ្ឋមួយចំនួនធំទៀតនៅតែមិនទាន់បាន ដោះស្រាយចប់នៅឡើយ តួយ៉ាងដូចជាភរិយារបស់លោក ទោះបីមានប័ណ្ណកម្មសិទ្ធិស្លាបមាន់ចាស់ រក្សាទុកនៅនឹងដៃ យ៉ាងនេះក៏ដោយក៏អាជ្ញាធរមានសមត្ថកិច្ចមិនបានចេញវិញ្ញាបនបត្រថ្មីជូនពួកគាត់តាមទំហំ និងជើងម៉ែត្រនៃប័ណ្ណកម្មសិទ្ធិចាស់នោះដែរ ព្រោះលោក ស៊ុំ ម៉ាប់ បានរារាំងមិនឱ្យចេញ ដោយអះអាងថាដីភរិយាលោកមួយផ្នែកត្រូវបានអាជ្ញាធរ អប្សរាដោះស្រាយគោលនយោបាយហើយ។ ជុំវិញករណីដែរពលរដ្ឋចោទប្រកាន់ខាងលើនេះដែរ កោះសន្តិភាពមិនអាចសុំការបំភ្លឺពីលោក ស៊ុំ ម៉ាប់ អគ្គនាយក អាជ្ញាធរជាតិអប្សរា នៅរសៀលថ្ងៃទី១២ ខែវិច្ឆិកា ឆ្នាំ២០១៧នេះ៕
https://youtu.be/3saNg—qww
ចែករំលែកព័តមាននេះ