ខេត្តបាត់ដំបង ៖ មានសេចក្តីរាយការណ៍ថា មេគោ២ក្បាលទៀតហើយបានងាប់ដោយសារពុលទឹកថ្នាំដែលមានសារធាតុគីមីដ៏សាហាវដែលធ្លាយចេញពីអាងស្តុករបស់ក្រុមអ្នកធ្វើអាជីវកម្មរ៉ែមាសខុសច្បាប់កាលពីព្រឹកថ្ងៃទី១៧ តុលា នៅចំណុចអូរមួយកន្លែងក្នុងភូមិភ្នំព្រឹក ឃុំភ្នំព្រឹក ស្រុកភ្នំព្រឹក។
វាមិនមែនជារឿងថ្មីទេដែលក្រុមអ្នកធ្វើអាជីវកម្មរ៉ែមាសខុសច្បាប់នៅស្រុកភ្នំព្រឹក បង្កឱ្យមានផលប៉ះពាល់ដល់បរិស្ថាន ធ្វើឱ្យរាលដាលដល់សុខភាពមនុស្ស និងសម្លាប់សត្វពាហនះនៅតំបន់នោះយ៉ាងរង្គាល ដែលបណ្តាលមកពីការបង្ហូរទឹកថ្នាំចម្រាញ់យកមាសដែលមានសារធាតុគីមីចូលទៅក្នុងអូរ នឹងអណ្តូងទឹកនៅក្នុងតំបន់ក្បែរនោះ ។ កន្លងមកស្ថាប័នពាក់ព័ន្ធនិងអាជ្ញាធរគ្រប់លំដាប់ថ្នាក់ធ្លាប់បានសន្យាមិនដាច់ពីមាត់ថា និងបង្រ្កាបក្រុមអ្នកបំផ្លាញបរិស្ថាន និងទ្រព្យសម្បត្តិរដ្ឋទាំងនោះ ។ ប៉ុន្តែគេមិនឃើញការសន្យានេះមានប្រសិទ្ធភាពទេ រហូតមកដល់ពេលនេះ បើទោះជាក្រុមធ្វើអាជីវកម្មរ៉ែមាសខុសច្បាប់ទាំងនោះបង្ហូរទឹកថ្នាំគីមីបំពុលបរិស្ថាន និងបំពុលសត្វគោអ្នកភូមិងាប់ជាបន្តបន្ទាប់ក្តី ដែលគេសង្ស័យថាមានផលប្រយោជន៍ផ្ទាល់ធំជាងអ្វីទាំងអស់ ។
អ្នកភូមិឈ្មោះឆយ សាវុន ភេទប្រុស អាយុ៥២ឆ្នាំ នៅភូមិភ្នំព្រឹកបានប្រាប់កោះសន្តិភាពថា ទឹកថ្នាំដែលមានសារធាតុគីមីខ្លាំងបានធ្លាយចេញពីអាងស្តុកកាកសំណល់រ៉ែមាសមួយកន្លែងរបស់ស្ត្រីម្នាក់ឈ្មោះសារ៉ាយ ញ៉ អាយុ៤៩ឆ្នាំ ហូរចូលទៅក្នុងអូរនៅក្នុងភូមិ ហើយបានសម្លាប់មេគោអ្នកភូមិចំនួន២ក្បាលដោយសារតែសត្វគោទាំងនេះផឹកទឹកអូរនោះ ។ សាក្សីរូបនេះថា មេគោ២ក្បាលនោះជារបស់ក្មួយប្រុសគាត់ឈ្មោះឡេង ឡាង ។ គាត់និយាយថា គោ២ក្បាលនោះបានងាប់ជាបន្តបន្ទាប់ប្រហែលជាង១ម៉ោង ក្រោយពីវាបានផឹកទឹកអូរនោះ ។
តាមការស្រង់សម្តីពីម្ចាស់គោលោកឡេង ឡាង និយាយថា មេគោរបស់គាត់ទាំង២ក្បាលបានយកទៅចងឱ្យស៊ីស្មៅនៅក្បែរអូរនោះ ប៉ុន្តែពួកវាបានដេកងាប់ក្នុងអូរ១ក្បាល និងក្បែរអូរ១ក្បាល នៅវេលាម៉ោងប្រហែល១១ព្រឹកនាថ្ងៃកើតហេតុនោះ ពេលគាត់ទៅមើល ។ គាត់ប្រាប់ថា មេគោគាត់ងាប់ដោយសារផឹកទឹកអូរដែលមានសារធាតុគីមីហូរចេញពីកន្លែងអាងចម្រាញ់មាសរបស់ឈ្មោះសារ៉ាយ ញ៉ ។ គាត់បញ្ជាក់ថា ឃើញដូច្នេះក៏មានការភ្ញាក់ផ្អើល និងរាយការណ៍ទៅសមត្ថកិច្ចឱ្យដឹងតែម្តង ។
សមត្ថកិច្ចគ្រប់ស្ថាប័នត្រូវគេរាយការណ៍ថា បានចុះទៅពិនិត្យចំណុចកើតហេតុ ប៉ុន្តែគេគ្មានវិធានការណ៍មួយចាត់ការចំពោះម្ចាស់អាជីវកម្មរ៉ែមាសខុសច្បាប់នោះទេ គឺគ្រាន់តែធ្វើកំណត់ហេតុតែប៉ុណ្ណោះ ។ មេឃុំភ្នំព្រឹកលោកម៉ែន សែប បានបំភ្លឺតាមទូរស័ព្ទនៅព្រឹកថ្ងៃទី២២ តុលាថា ពិតជាមានសត្វគោអ្នកភូមិងាប់ដោយសារការពុលទឹកថ្នាំគីមីចម្រាញ់មាសនោះមែន ។ លោកបញ្ជាក់ថា ទឹកថ្នាំគីមីនោះបានធ្លាយចេញពីទីតាំងស្តុកកាកសំណល់រ៉ែមាសគ្មានច្បាប់របស់ស្ត្រីម្នាក់ឈ្មោះសារ៉ាយ ញ៉ ហូរចូលទៅក្នុងអូរក្នុងភូមិ ។ លោកថា កន្លងមកក៏មានសត្វគោងាប់ដោយពុលទឹកថ្នាំគីមីចម្រាញ់មាសបែបនេះដែរ ។ អ្នកភូមិប្រាប់ថា ភាគីបង្កបានយល់ព្រមទទួលកំហុស និងបានព្រមព្រៀងបង់សំណងថ្លៃគោទាំង២ក្បាលដល់ម្ចាស់ចំនួន១៥.០០០បាត ដោយបានធ្វើកិច្ចសន្យាជាលាយល័ក្ខអក្សរ ។ ប៉ុន្តែសំណងនេះមិនទាន់បានបង់ដល់ដៃភ្លាមៗទេ ដោយភាគីបង្កសន្យាថា នឹងប្រគល់នៅថ្ងៃទី១ វិច្ឆិកា ខាងមុខនេះ តែបើដល់ថ្ងៃកំណត់មិនប្រគល់ប្រាក់ទេ ភាគីបង្កនោះថា ខ្លួននឹងទទួលខុសត្រូវចំពោះមុខច្បាប់ជាធរមាន ។ ទំនងបែបសន្យាខ្យល់ ។
សេចក្តីរាយការណ៍ដដែលថា ក្រោយពីមានងាប់មេគោនេះ២ថ្ងៃ អ្នកភូមិភ្នំព្រឹកជាង៤០គ្រួសារបាននាំគ្នាផ្តិចមេដៃ ដើម្បីប្តឹងទៅអាជ្ញាធរមូលដ្ឋានស្នើឱ្យបញ្ឈប់រាល់សកម្មភាពក្រុមអ្នកធ្វើអាជីវកម្មរ៉ែមាសគ្មានច្បាប់ទម្លាប់ទាំងអស់នោះ ។ ពួកគេនិយាយថា បណ្តឹងនោះបានដាក់ដល់ដៃលោកមេភូមិហើយ តែមិនទាន់ឃើញលោកមេភូមិ ឬលោកមេឃុំចុះអើពើក្នុងករណីនេះទេ ។ អ្នកភូមិបញ្ជាក់ថា សព្វថ្ងៃគ្រប់ទីតាំងរែងមាសពាសពេញក្នុងឃុំភ្នំព្រឹក កំពុងបង្កផលប៉ះពាល់យ៉ាងខ្លាំងដល់បរិស្ថាន សុខភាពប្រជាពលរដ្ឋ និងការសម្លាប់សត្វក្នុងភូមិ ។ នេះមិនមែនលើកទី១ទេ ដែលទឹកថ្នាំដែលមានសារធាតុគីមីហូរចេញពីកន្លែងចម្រាញ់មាស ចូលទៅក្នុងអូរបង្កផលប៉ះពាល់ធ្ងន់ធ្ងរដល់មនុស្ស និងសត្វ ប៉ុន្តែគ្មានមន្ត្រីណាបើកភ្នែកមើលឡើយ បើទោះជាបានឃើញផលវិបាកទាំងនេះផ្ទាល់ភ្នែកស្ទើររាប់ភ្លេចក្តី ។
លោកជឺ ឈៀង ប្រធានមន្ទីរឧស្សាហកម្មរ៉ែ និងថាមពលក៏ដូចជាលោកឆាយ យួប ប្រធានមន្ទីរបរិស្ថានខេត្ត មិនអាចទំនាក់ទំនងសុំការបំភ្លឺជាថ្មីបានទេកាលពីព្រឹកថ្ងៃទី២២ តុលា ។ ប៉ុន្តែលោកប្រធានមន្ទីរពាក់ព័ន្ធដ៏សំខាន់ទាំង២រូបសុទ្ធតែធ្លាប់អះអាងកន្លងមកថា នៅតំបន់ដែលសម្បូរកំណប់មាសដ៏មហាសាលនៅស្រុកភ្នំព្រឹកនោះ មានតែក្រុមហ៊ុនចិនមួយទេឈ្មោះ«ភូយ៉ាង»ដែលមានអាជ្ញាប័ណ្ណធ្វើអាជីវកម្មរ៉ែមាសស្របច្បាប់ ក្រៅពីនេះសុទ្ធតែគ្មានច្បាប់ទំាងអស់ ។ លោកអះអាងដដែលៗថា និងចុះពិនិត្យ ហើយចាត់វិធានការតាមផ្លូវច្បាប់ចំពោះក្រុមអ្នករុករកមាសខុសច្បាប់ទាំងនោះ តែការសន្យានេះត្រូវគេកត់សម្គាល់ថា ជាការ«សន្យាខ្យល់»ស្ថិតនៅតែលើបបូរមាត់ ។ ផ្ទុយទៅវិញត្រូវបានមតិជាច្រើនរិះគន់ថា មន្ត្រីពាក់ព័ន្ធមួយចំនួនបានឃុំឃិតបើកដៃឱ្យមានបទល្មើសទាំងនោះ ជាថ្នូរនិងលាភសក្ការៈ។ បច្ចុប្បន្នក្រុមអ្នកធ្វើអាជីវកម្មរ៉ែខុសច្បាប់នៅតែធ្វើសកម្មភាព និងកាន់តែកំពុងបង្កផលប៉ះពាល់កាន់តែខ្លាំងឡើងៗដល់បរិស្ថាន សុខភាពមនុស្ស និងសម្លាប់សត្វពាហនៈរបស់ប្រជាពលរដ្ឋក្នុងមូលដ្ឋាន ។
មេឃុំភ្នំព្រឹកលោកម៉ែន សែប បានបញ្ជាក់ប្រាប់កោះសន្តិភាពថា តាមការស្រង់ស្ថិតិកាលពីលើកមុនមានអ្នកធ្វើអាជីវកម្មរ៉ែគ្មានច្បាប់ទាំងអស់ជាង៦០កន្លែង ប៉ុន្តែឥឡូវសម្រាកខ្លះហើយ ។ លោកមេឃុំប្រាប់ថា ពួកគេកន្លងមកសុទ្ធតែធ្លាប់ផ្តិតមេដៃធ្វើកិច្ចសន្យាបញ្ឈប់សកម្មភាពរបស់ខ្លួនរួចហើយ ។ ប៉ុន្តែនៅពេលសួរថា ចុះបើមានធ្វើកិច្ចសន្យាបញ្ឈប់រួចហើយហេតុអីក៏ពួកគេនៅតែបន្តធ្វើបានទៀត? លោកមេឃុំតបថា «មាន់ពងនឹងស្រូវតែងតែចឹកស្រូវហើយ មិនខុសពីស្រមោចនិងស្ករទេ»លោកមេឃុំបង្ហើសំណើចបន្តិចរួចបន្តថា បើពួកគាត់ដេកលើគំនរមាស ហើយមិនឱ្យគាត់ចឹកមាសម៉េចនឹងកើត?ទោះជាយ៉ាងណាលោកមេឃុំម៉ែន សែប មិនបានសន្យាថា នឹងមានវិធានការបែបណាចំពោះម្ចាស់អាងស្តុកទឹកថ្នាំគីមីចម្រាញ់មាស ដែលបំពុលសត្វគោអ្នកភូមិ ឬទៅលើក្រុមអ្នកធ្វើអាជីវកម្មរ៉ែមាសគ្មានច្បាប់ដទែទៀតដែរ ។ ប៉ុន្តែលោកគ្រាន់តែបញ្ជាក់ថា លោកបានធ្វើរបាយការណ៍ជូនទៅថ្នាក់លើហើយ ។ គេនឹងរង់ចាំមើលថា តើមានស្ថាប័នណាដែលចុះធ្វើការងារឱ្យមានប្រសិទ្ធភាពតាមសំណូមពរប្រជាពលរដ្ឋ ៕
ចែករំលែកព័តមាននេះ