សារប្រយោជន៍នៃការតាមដានផ្ទៃពោះ បុត្រធីតាគឺជាខ្សែចំណងចងភ្ជាប់សុភមង្គលគ្រួសារ ដែលជាផ្លែផ្កានៃជីវិតស្នេហា និងជីវិតអាពាហ៍ពិពាហ៍ ។ ដើម្បីឈានដល់ការមានបុត្រធីតា កត្ដាដែលគូស្វាមីភរិយាត្រូវយកចិត្ដទុកដាក់នោះ គឺការថ្នាក់ថ្នមថែរក្សាគ្នាទៅវិញទៅមក ចែករំលែកសុខទុក្ខរវាងគ្នានឹងគ្នា ក្នុងនោះក៏ត្រូវតែមានការពិភាក្សាជាមួយគ្រូពេទ្យ…
សារប្រយោជន៍នៃការតាមដានផ្ទៃពោះ បុត្រធីតាគឺជាខ្សែចំណងចងភ្ជាប់សុភមង្គលគ្រួសារ ដែលជាផ្លែផ្កានៃជីវិតស្នេហា និងជីវិតអាពាហ៍ពិពាហ៍ ។ ដើម្បីឈានដល់ការមានបុត្រធីតា កត្ដាដែលគូស្វាមីភរិយាត្រូវយកចិត្ដទុកដាក់នោះ គឺការថ្នាក់ថ្នមថែរក្សាគ្នាទៅវិញទៅមក ចែករំលែកសុខទុក្ខរវាងគ្នានឹងគ្នា ក្នុងនោះក៏ត្រូវតែមានការពិភាក្សាជាមួយគ្រូពេទ្យ និងការតាមដានសុខភាពរបស់ទារក និងម្តាយជាប្រចាំផងដែរ ។
ការពិនិត្យសុខភាពម្តាយ តាមរយៈការតាមដានសម្ពាធឈាម ភាពស្លេកស្លាំង និងវិភាគទឹកនោម ការឆែកមើលសុខភាពទារកក្នុងផ្ទៃ ដូចជាការស្តាប់ចង្វាក់បេះដូង ការស្ទាបពោះ ឬការវាស់កម្ពស់ស្បូន ឬការពិនិត្យអេកូសាស្ត្រ គឺជារឿងចាំបាច់បំផុតដែលស្ត្រីមានផ្ទៃពោះគ្រប់រូបមិនគួរមើលរំលង ។ បច្ចុប្បន្ននេះដោយសារតែសម័យកាលជឿនលឿន ការតាមសុខភាពមាតា និងទារកជាប្រចាំគឺមានភាពងាយស្រួលបំផុត សម្រាប់ស្ត្រីនៅទីប្រជុំជន។ ប៉ុន្តែក៏មានស្ត្រីមួយចំនួនតូចដែលមិនសូវជាមានការយល់ដឹង ឬក៏បានធ្វើចំណាកស្រុកទៅរស់នៅទីដាច់ស្រាយាល គឺនៅតែមានការធ្វើរប្រហែសមិនសូវខ្វាយខ្វល់អំពីសុខភាពរបស់ខ្លួន ក៏ដូចជាទារកនៅក្នុងផ្ទៃនោះដែរ ហើយក៏មានស្ត្រីខ្លះទៀតក៏មិនបានដឹងអំពីថ្ងៃខែដែលត្រូវប្រសូតបុត្រ ឬក៏រាងកាយទារកនៅក្នុងផ្ទៃនោះដែរ។ ទាំងនេះគឺជាការធ្វេរប្រហែសបំផុត ដែលអាចនាំឲ្យមានវិបតិ្តសេរី ដោយសារតែការសម្រាល ឬក៏ទារកកើតមកមិនគ្រប់លក្ខណៈជាដើម ។
ខាងក្រោមនេះគឺជាសារប្រយោជន៍ក្នុងការតាមដានសុខភាពរបស់ម្តាយ និងទារកនៅក្នុងផ្ទៃមានដូចជា៖
-អាចដឹងមុននៅករណីការគំរាមសម្រាលមិនគ្រប់ខែ ។
-អាចដឹងមិននូវករណីលើសឈាមក្នុងពេលពពោះ ឬក៏ចាស់ពីដើមច្រើនហៅថាជំងឺព្រាយក្រឡាភ្លើង ។
-ករណីកង្វះគ្រាប់ឈាមក្រហម និងផ្ដល់គ្រាប់ថ្នាំជាតិដែក ឬអាស៊ីតហ្វូលីកដល់ស្ដ្រី ព្រោះថ្នាំនេះមានប្រយោជន៍សម្រាប់បំប៉នសុខភាពទាំងម្ដាយ និងទារកធ្វើឱ្យទារកឆ្លាត។ ពិសេសថ្នាំនេះមានសារជាតិអាចជួយការពារទារកពីភាពពិការពីកំណើតដូចជា ពុកឆ្អឹងខ្នង គ-ថ្លង់ កំបុតម្រាមដៃជើង និងភាពមិនប្រក្រតីនៃសរីរាង្គ ។
-ពិនិត្យភាពលូតលាស់នៃផ្ទៃពោះ ដើម្បីពេលមានបញ្ហាកើតឡើង ស្ដ្រីអាចទៅមន្ទីរពេទ្យទាន់ពេលវេលា ។
-ការពិនិត្យរកជំងឺឆ្លងណាមួយក្នុងពេលមានផ្ទៃពោះ ជាពិសេសជំងឺរលាកតម្រងនោម និងជម្ងឺកាមរោគ ។
-ផ្ដល់ថ្នាំវ៉ាក់សាំងតេតាណូសដល់ស្ដ្រីមានផ្ទៃពោះដើម្បីបង្ការម្ដាយ និងទារក ដែលទើបនឹងកើតពីជំងឺតេតាណូស ។
-ពិនិត្យរកការវិវឌ្ឍរបស់ទារកក្នុងផ្ទៃ ក៏ដូចជាកាយសម្បទានានារបស់ទារក ។ ប្រសិនបើស្ដ្រីទទួលបានការពិនិត្យឱ្យបានត្រឹមត្រូវនោះ គ្រោះថ្នាក់ទាំងឡាយនៅពេលមានផ្ទៃពោះ ពេលសម្រាល និងក្រោយពេលសម្រាលត្រូវបានកាត់បន្ថយ ឬមិនមានតែម្ដង ។ ដើម្បីធានាបាននូវសុវត្ថិភាព ស្ដ្រីមានផ្ទៃពោះទាំងអស់ត្រូវតែទៅមន្ទីរពេទ្យ នៅពេលដែលសង្ស័យថាខ្លួនមានផ្ទៃពោះ ៕
ចែករំលែកព័តមាននេះ