ខេត្តបាត់ដំបង ៖ សមត្ថកិច្ចបានរាយការណ៍ថា ជនសង្ស័យ២នាក់ ជាប់ពាក់ព័ន្ធនឹងការជួញដូរថ្នាំញៀន ត្រូវបានកម្លាំងនគរបាលផ្នែកបង្ការបង្ក្រាបនៃស្នងការខេត្ត សហការជាមួយកម្លាំងមូលដ្ឋានឃាត់ខ្លួនបានជាបន្តបន្ទាប់ កាលពីថ្ងៃទី២៧តុលា ធ្វើឡើងនៅក្នុងស្រុករតនមណ្ឌល និងស្រុកកំរៀង។
សេចក្ដីរាយការណ៍បន្តថា ជនសង្ស័យម្នាក់ឈ្មោះសន សឿន ហៅប៉ែល អាយុ២៨ឆ្នាំ ត្រូវឃាត់ខ្លួន នៅម៉ោងជាង១២ថ្ងៃត្រង់ ស្ថិតនៅក្នុងវត្តរស្មីសង្ហា ក្នុងភូមិរស្មីសង្ហា ឃុំរស្មីសង្ហា ស្រុករតនមណ្ឌល ។ ប្រភពដដែលបន្តថា ក្រោយពីឃាត់ខ្លួន និងដកហូតបានវត្ថុតាងមួយចំនួន និងក្រោយពីសាកសួរ នៅម៉ោងជាង៥ល្ងាចថ្ងៃដដែល សមត្ថកិច្ចបានធ្វើការស្រាវជ្រាវតាមឃាត់ខ្លួនមេខ្លោងថ្នាំញៀនបានម្នាក់ទៀត ឈ្មោះគឹម និមល ប្រុសអាយុ៣៥ឆ្នាំ ដែលធ្វើឡើងនៅភូមិអូរដាលើ ឃុំបឹងរាំង ស្រុកកំរៀង។
ការឃាត់ខ្លួនជនសង្ស័យទាំង២នាក់នេះ សមត្ថកិច្ចឆែកឆេរ និងដកហូតបានថ្នាំញៀន ដែលគេសង្ស័យថា ជាប្រភេទថ្នាំញៀនមេតំហ្វេតាមីនICE មួយថង់ ថ្នាំញៀនប្រភេទ Wy ជិត២០គ្រាប់ ប្រាក់ខ្មែរ ប្រាក់ថៃ ប្រាក់ដុល្លា និង រថយន្តមួយគ្រឿង រួមទាំងវត្ថុតាងមួយចំនួនទៀត។
បើតាមប្រភពពីសមត្ថកិច្ចដែរ បានបង្ហើបឲ្យដឹងថា កិច្ចប្រតិបត្តិការបង្ក្រាបជនសង្គម
ងងិតប្រព្រិត្តបទល្មើសគ្រឿងញៀនបំពានច្បាប់ខាងលើនេះ ទំនងអាចពាក់ព័ន្ធនឹងមន្ត្រីមួយចំនួននៅការិយាល័យជំនាញ ។ ព្រោះជនទាំង២នាក់នោះ បានបង្ហាញពីភាពក្រអើតក្រទមយ៉ាងខ្លាំង ជាមួយកម្លាំងសមត្ថកិច្ចដែលចុះបង្ក្រាប ។
មិនត្រឹមតែប៉ុណ្ណោះ បើតាមប្រភពដដែលបង្ហើបថា ពេលដែលកម្លាំងកំពុងធ្វើការឆែកឆេរជនសង្ស័យ បានសួររកឈ្មោះមន្ត្រីគ្រឿងញៀន២នាក់ ដែលមើលទៅជនសង្ស័យហាក់ស្គាល់យ៉ាងច្បាស់ ហើយថែមទាំងស្និទ្ធស្នាលទៀតផងជាមួយមន្ត្រីគ្រឿងញៀនទាំង២នាក់ខាងលើនេះ។
ទោះជាយ៉ាងណា លោកស្នងការខេត្ត បានបញ្ជាឲ្យបញ្ជួនជនសង្ស័យទាំង២នាក់នោះ មកកាន់ស្នងការខេត្តហើយ ដើម្បីសួរនាំបន្ត និងកសាងសំណុំរឿងបញ្ជូនទៅកាន់តុលាការចាត់ការតាមនីតិវិធីច្បាប់។
ចែករំលែកព័តមាននេះ