ខេត្តបាត់ដំបង ៖ ប្រធានមន្ទីរព័ត៌មានខេត្តបាត់ដបង លោកស្រី ប៉ុក ច័ន្ទធារី បានសម្រេចដាក់ពាក្យបណ្ដឹងទៅកាន់ស្នងការដ្ឋាននគរបាលខេត្ត នៅព្រឹកថ្ងៃទី២៧ ខែតុលា នេះ…
ខេត្តបាត់ដំបង ៖ ប្រធានមន្ទីរព័ត៌មានខេត្តបាត់ដបង លោកស្រី ប៉ុក ច័ន្ទធារី បានសម្រេចដាក់ពាក្យបណ្ដឹងទៅកាន់ស្នងការដ្ឋាននគរបាលខេត្ត នៅព្រឹកថ្ងៃទី២៧ ខែតុលា នេះ ក្រោយពីដឹងថា អាខោន «ហ្វេសប៊ុក» លោកស្រីដែលមានឈ្មោះ «Teary chan» ត្រូវជនមិនស្គាល់មុខលួចចូល «hake» លេងឆាតខ្ជីលុយគេឯងជាង២០នាក់ រហូតមានអ្នកខ្លះត្រូវអស់លុយរាប់រយដុល្លារ ពិសេសបុគ្គលិកមន្ទីរព័ត៌មានតែម្ដង ។
យោងតាមបណ្ដឹងរបស់លោកស្រី ប៉ុក ច័ន្ទធារី ប្រធានមន្ទីរព័ត៌មានខេត្ត បានឲ្យដឹងថា ហ្វេសប៊ុកលោកស្រី ដែលមានឈ្មោះ «Teary chan» ត្រូវជនមិនស្គាល់មុខលួចចូលលេង (hake) កាលពីថ្ងៃទី២៥ ខែតុលា ឆ្នាំ២០១៧ ដោយជនមិនស្គាល់មុខនេះបានលេងឆាតទៅខ្ចីលុយគេឯងជាង២០នាក់ ជាពិសេសឆាតទៅខ្ចីលុយមន្ត្រីព័ត៌មាន ដែលជាបុគ្គលិករបស់លោកស្រីតែម្ដង ខណៈលោកស្រីមិនបានដឹងអ្វីសោះ ។ លោកស្រី ធារី បាននិយាយនៅក្នុងបណ្ដឹងថា បុគ្គលិកមន្ទីរព័ត៌មានម្នាក់ឈ្មោះ ភី សុខ ដែលមានអាខោនហ្វេសប៊ុកឈ្មោះ «savy sok» បានផ្ញើលុយចំនួន៥០០ដុល្លារ ទៅឲ្យជននោះ ក្រោយពីជន hake នេះបានលួចចូលអាខោនរបស់លោកស្រី ហើយឆាតទៅខ្ចីលុយចំនួន៥០០ដុល្លារនេះ កាលពីរសៀលថ្ងៃទី២៥ ខែតុលា ។
លោកស្រី ប៉ុក ច័ន្ទធារី បានបញ្ជាក់ថា ជន hake នេះបានប្រើអាខោនលោកស្រី ឆាតទៅកាន់មនុស្សជាង២០នាក់ ដើម្បីខ្ចីលុយ ចាប់តាំងពីមន្ត្រីមន្ទីរព័ត៌មានខេត្ត រហូតដល់មន្ត្រីមួយចំនួននៅក្នុងក្រសួងព័ត៌មាន ដែលជាហ្វ្រែននៅក្នុងហ្វេសប៊ុករបស់លោកស្រី ។ ប៉ុន្តែសំណាងល្អគ្មានអ្នកខាតបង់ គឺមានតែលោក ភី សុខ ម្នាក់ប៉ុណ្ណោះ ដែលរងគ្រោះអស់៥០០ដុល្លារ ។ ប្រធានមន្ទីរព័ត៌មានរូបនេះ បានបញ្ជាក់ដែរថា លោកស្រីបានដឹងរឿងនេះ ក្រោយពីមានមន្ត្រីនៅក្រសួងព័ត៌មានទូរស័ព្ទមកសួរនាំអំពីរឿងលោកស្រី«ឆាត» ខ្ចីលុយគេព្រោងព្រាតនេះ ។ លុះលោកស្រីបើកហ្វេសប៊ុកមើល ទើបមានការភ្ញាក់ផ្អើល ដោយសារឃើញមានគេលួចចូលលេងហ្វេសប៊ុកលោកស្រី ហើយឆាតទៅខ្ចីលុយគេឯងជាង២០នាក់ ។
ម្ចាស់អាខោនឈ្មោះ savy sok គឺលោក ភី សុខ ដែលជាបុគ្គលិកមន្ទីរព័ត៌មានខេត្ត ដែលខាតបង់លុយអស់៥០០ដុល្លារ ដោយសារចាញ់កលជន hake បានប្រាប់កោះសន្តិភាពថា ពេលឃើញអាខោនឈ្មោះ Teary can ឆាតមកខ្ចីលុយ៥០០ដុល្លារនោះ លោកមិនបានគិតថា មានជនលួចចូលអាខោននេះទេ ព្រោះលោកដឹងថា ជាអាខោនរបស់លោកស្រី ប៉ុក ច័ន្ទធារី ប្រធានមន្ទីរព័ត៌មានខេត្ត ហើយពេលឃើញដូច្នេះ លោកក៏សួរនាំគាត់ខ្លះៗអំពីរឿងខ្ចីលុយនេះ ។ លោកបានបញ្ជាក់ថា ក្រោយពីសួរនាំភ្លាមៗនោះ លោកក៏បានទៅធនាគារដកលុយ៥០០ដុល្លារ ដើម្បីផ្ញើតាមវីងទៅឲ្យគាត់ ដោយបានថតចម្លងវិក្កយបត្រ ដែលមានលេខកូដ (លេខសម្ងាត់) ដកលុយផង ផ្ញើតាមឆាតនេះដែរ ទៅឲ្យគាត់តែមិនបានទំនាក់ទំនងបន្ថែមតាមទូរស័ព្ទទេ ព្រោះសំអាងថា គាត់ជាមេកើយ ។
ប៉ុន្តែលោក ភី សុក បានបញ្ជាក់ថា ប្រហែល២ម៉ោងក្រោយពីលោកបានផ្ញើលុយ លោកក៏បានទូរស័ព្ទទៅគាត់ (លោកស្រីធារី) សួរនាំអំពីរឿងលុយនេះ តើគាត់បានទទូលហើយឬនៅ ? ស្រាប់តែលោកស្រីឆ្ងល់ ! សួរនាំគ្នាទៅវិញទៅមក ហើយស្របពេលនោះ ក៏មានមន្ត្រីក្រសួងព័ត៌មាន ទូរស័ព្ទមកសួរគាត់អំពីរឿងឆាតខ្លីលុយគេនេះដែរ ទើបមានការភ្ញាក់ផ្អើលតែម្ដង ។ លុះពេលលោកស្រីទៅបើកមើលហ្វែសប៊ុក ទើបដឹងថា មានគេ hake ចូលហ្វេសប៊ុកគាត់ប្រព្រឹត្តិអំពើទុច្ចរិត ។ លោក ភី សុក ក៏បានបញ្ជាក់ដែរថា ពេលលោកផ្ញើលុយ៥០០ដុល្លារ ទៅឲ្យប្រធានមន្ទីរនេះ គឺលោកបានដាក់លេខទូរស័ព្ទរបស់គាត់សម្រាប់ទៅដកលុយនោះ ។
លោកថា ក្រោយពីដឹងថាមានគេលួចចូលហ្វេសប៊ុកបែបនេះ រូបលោក និងលោកស្រី ប៉ុក ច័ន្ទធារី បានទំនាក់ទំនងសួរនាំទៅក្រុមហ៊ុន វីង ហើយខាងក្រុមហ៊ុនវីងប្រាប់ថា លុយចំនួន៥០០ដុល្លារនោះ ត្រូវគេបើកយកហើយ ខណៈម្ចាស់លេខទូរស័ព្ទ គឺលោក ស្រី ច័ន្ទធារី មិនបានដឹងហើយ មិនបានទៅបើកលុយនោះសោះ ។ លោក ភី សុខ បានស្រង់សម្ដីខាងក្រុមហ៊ុន វីង ថា ជាធម្មតាពេលទៅបើកលុយ ភ្នាក់ងារវីងនីមួយៗត្រូវឆែក ឬផ្ទៀងផ្ទាត់លេខទូរស័ព្ទអ្នកដែលត្រូវទទូលលុយ លុះឃើញត្រឹមត្រូវហើយ ទើបអាចបើកលុយឲ្យទៅអតិថិជនបាន ប៉ុន្តែករណីនេះម្ចាស់លេខមិនបានដឹង ឬមិនបានទៅបើកសោះ បែរជាភ្នាក់ងារវីង បើកលុយនោះឲ្យគេបានដែរ ដែលគេសង្ស័យថា ជន hake និងភ្នាក់ងារវីងនោះ អាចជាក្រុមតែមួយ ហើយបើតាមការស្រាវជ្រាវជំហានដំបូង គឺទីតាំងភ្នាក់ងារវីង ដែលបានបើកលុយនោះ ស្ថិតនៅម្ដុំផ្សារអូរឬស្សី រាជធានីភ្នំពេញ ។
លោកស្រី ប៉ុក ច័ន្ទធារី ប្រធានមន្ទីរព័ត៌មានខេត្ត បានបញ្ជាក់ក្នុងបណ្ដឹងរបស់លោកស្រីថា ជុំវិញបញ្ហានេះ លោកស្រីមិនបានដឹងអ្វីទាំងអស់ ហើយពេលនេះលោកស្រីបានដាក់ពាក្យបណ្ដឹងទៅកាន់ស្នងការដ្ឋាននគរបាលខេត្តហើយ ដើម្បីស្នើឲ្យសមត្ថកិច្ចជួយអន្តរាគមន៍ និងចាត់វិធានការស្រាវជ្រាវរកមុខជនសង្ស័យ ដែលលួចចូលលេងអាខោនហ្វេសប៊ុករបស់លោកស្រី ។ ជាមួយគ្នានេះ លោក ភី សុខ ដែលចាញ់កលជន hake បានបញ្ជាក់ចុងក្រោយថា ក្រុមហ៊ុនវីងបានចេញមុខទទូលខុសត្រូវបង់សំណងចំនួន៥០០ដុល្លារ ជូនលោកវិញ ហើយក្រុមហ៊ុនក៏នឹងធ្វើការស្រាវជ្រាវបន្តជាមួយសមត្ថកិច្ចអំពីករណីនេះដែរ ៕
ចែករំលែកព័តមាននេះ