ខេត្តបន្ទាយមានជ័យ ៖ ក្រោយពេលបង្កគ្រោះថ្នាក់ចរាចរណ៍លើរថយន្ត1គ្រឿង ដោយសារដើរដេកអនាធិបតេយ្យតាមដងផ្លូវជាតិ និងដងផ្លូវបេតុង ហេតុការណ៍នេះបានកើតឡើងកាលពីវេលាម៉ោងជិត12យប់ ថ្ងៃទី26 ខែតុលា ឆ្នាំ2017 នៅលើដងផ្លូវជាតិលេខ5 ស្ថិតក្នុងភូមិបាលិលេយ្យ2 សង្កាត់ប៉ោយប៉ែត ។
សមត្ថកិច្ចបានឱ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយគោឈ្មោល1ក្បាល ខណៈរថយន្តកាមរី01គ្រឿង ពណ៌ស ពាក់ស្លាកលេខភ្នំពេញ 2E.0349 បើកបរដោយឈ្មោះ ណូដារ៉ា ភេទប្រុស អាយុ25ឆ្នាំ មុខរបររត់តាក់ស៊ី មានទីលំនៅភូមិអូរជ្រៅ សង្កាត់ប៉ោយប៉ែត បើកបរពីកើតទៅលិច។ រថយន្តនេះរងការខូចខាតកញ្ចក់ផ្នែកខាងមុខ និងរបូតស្លាកលេខ ប៉ុន្តែពុំមានអ្នករងរបួសនោះទេ។ ក្រោយពេលកើតហេតុ ម្ចាស់រថយន្តកើតទុក្ខមិនសុខចិត្ត ក៏បានស្នើឲ្យសមត្ថកិច្ចចាប់គោនោះយកទៅរក្សាទុកនៅអធិការដ្ឋា ដើម្បីឲ្យម្ចាស់ចេញមកទទួលខុសត្រូវ។
សមត្ថកិច្ចជំនាញប្រាប់បន្តទៀតថា បើគិតត្រឹមម៉ោងជិត4រសៀល ថ្ងៃទី27 តុលានេះ ម្ចាស់គោមិនទាន់ចេញមុខមកដោះស្រាយជាមួយម្ចាស់រថយន្តទេ។
លោក សៅ សារឿន បានប្រាប់ថា ករណីនេះប្រសិនបើម្ចាស់គោចេញមុខទទួលខុសត្រូវ ហើយត្រូវឲ្យធ្វើកិច្ចសន្យា ដើម្បីបញ្ឈប់ការលែងគោដើរដេកអនាធិបតេយ្យតទៅទៀត។ មិនតែប៉ុណ្ណោះលោកអធិការរងរូបនេះបញ្ជាក់ថា នាពេលឆាប់ខាងមុខនេះ រដ្ឋបាលក្រុងប៉ោយប៉ែត និងបង្កើតគណៈកម្មការចម្រុះមួយប្រមូលចាប់គោទាំងឡាយណាដែលម្ចាស់លែងចោល ដើម្បីមានចំណាត់ការតាមផ្លូវច្បាប់ទៀតផង៕
ចែករំលែកព័តមាននេះ