រាជធានីភ្នំពេញ ៖ គម្រោងព្រែកជីកហ្វូណន-តេជោកម្ពុជានឹងជួយដឹកជញ្ជូនទំនិញជាច្រើនប្រភេទរបស់កម្ពុជាទៅកាន់សមុទ្រ ដើម្បីលក់ទៅកាន់ទីផ្សារបរទេសដោយថវិកាចំណាយតិច និងមានភាពងាយស្រួល។ នេះបើតាមឯកឧត្តមស៊ុន ចាន់ថុល ឧបនាយករដ្ឋមន្ត្រីអនុប្រធានទី១ក្រុមប្រឹក្សាអភិវឌ្ឍកម្ពុជាបានលើកឡើងក្នុងបទបង្ហាញអំពីវឌ្ឍនភាពនៃព្រែកជីកហ្វូណនតេជោ នាព្រឹកថ្ងៃទី៣ ខែឧសភា ឆ្នាំ២០២៤ នេះ ។
ឯកឧត្តម ស៊ុន ចាន់ថុល បានគូសបញ្ជាក់យ៉ាងដូច្នេះថា៖ «យើងនឹងប្រមែប្រមូលទាំងអស់ដឹកតាមផ្លូវទឹក ហើយខ្ញុំធានាថា ផ្លូវទឹក អត់មានផ្លូវសំបុកមាន់ទេ «…» យើងបានខិត ខំធ្វើការសិក្សាជាមួយក្រសួងពាក់ព័ន្ធជាច្រើន។ យើងនឹងប្រមូលកសិផលរបស់យើង ដឹក ទៅលក់នៅបរទេសហើយអាចប្រកួតប្រជែងជាមួយគេបាន»។
ឯកឧត្តមឧបនាយករដ្ឋមន្ត្រីបានបន្តថា ការដឹកទំនិញតាមផ្លូវទឹកនឹងចំណាយតិចជាងការដឹកតាមផ្លូវគោក ផ្លូវអាកាស ប៉ុន្តែយើងត្រូវតែគោរពតាមច្បាប់ដឹកជញ្ជូនរបស់បណ្តាប្រទេសនានាដែលយើងឆ្លងកាត់។
ឯកឧត្តមបានគូសបញ្ជាក់ថា «គម្រោងព្រែកជីកហ្វូនណន-តេជោ នេះ ពេលយើងដឹកទៅចំណាយតិចថោកជាង ដែលអាចនឹងទាក់ទាញអ្នកវិនិយោគ។ អីញ្ចឹងខ្ញុំសូមបញ្ជាក់បង្ហា ញពីគម្រោងព្រែកជីកហ្វូនណនតេជោថាចំណេញច្រើន»។
ឯកឧត្តម ស៊ុន ចាន់ថុលបានលើកឡើងថានៅសម័យអណាចក្រហ្វូណនមាន ការជីកព្រែកចំនួនបីគឺទី១. ព្រែកជីកអូកែវ ទី២.ព្រែកជីកវិញតេ និងទី៣. ព្រែកហ្វូណន។ សម័យហ្វូណនមានការដឹកទំនិញលក់ទៅកាន់ផ្ទាល់នៅបរទេស ដូចជាអឺរ៉ុប ប្រទេសចិន…។
ជាមួយគ្នានោះដែរ ឯកឧត្តម ស៊ុន ចាន់ថុល បានលើកឡើងថា កម្ពុជាបានប្រើប្រាស់ព្រែក ដែលមានស្រាប់ជាច្រើនពាន់ឆ្នាំមកហើយ។ ជាក់ស្តែងនោះ ព្រែកអំបិលដែលមានតាំងពីដើមមកម្ល៉េះ។ បន្ទាប់ពីមានការបែកបាក់សម័យហ្វូណនមក ក៏មានការបោះបង់ចោលព្រែកជាច្រើនផងដែរនេះបើតាមប្រវត្តិសាស្ត្រ។
ឯកឧត្តមស៊ុន ចាន់ថុល បានអះអាងថា គម្រោងព្រែកជីកហ្វូនណនតេជោមានការផលប៉ះពាល់តិចតួចតែប៉ុណ្ណោះ ពោលគឺមិនប៉ះពាល់ធំនោះទេ។ផ្ទុយទៅវិញបានផ្តល់ការងារជូន ប្រជាពលរដ្ឋផងដែរ។
ទោះបីមានជាមានការរិះគន់ពីក្រុមប្រឆាំងយ៉ាងណាក្តី ឯកឧត្តមស៊ុន ចាន់ថុល បានបញ្ជាក់ផងដែរថា «គម្រោងនេះ ត្រូវបានធ្វើការសិក្សាយ៉ាងលម្អិត ដោយក្រុមការងារបច្ចេកទេស និងទីប្រឹក្សាអន្តរជាតិចំនួន៤៨នាក់ ដោយប្រើប្រាស់ស្តង់ដារ និងបច្ចេកវិទ្យាអន្តរជាតិរួមមាន ដ្រូន និងផ្កាយរណបក្នុងការសិក្សានេះ។
ជាលទ្ធផល គម្រោងនេះគឺមិនមានផលប៉ះពាល់អវិជ្ជមានដល់បរិស្ថានកម្ពុជា និងប្រទេសជិតខាងនោះទេ ប៉ុន្តែបានផ្តល់អត្ថប្រយោជន៍ ដល់សកលលោកទាំងមូលផងដែរ ដោយបានចូលរួមកាត់បន្ថយ ការបំភាយឧស្ម័នផ្ទះកញ្ចក់ ទៅក្នុងបរិយាកាសដោយសារចម្ងាយ ការធ្វើនាវាចរណ៍ មានរយៈប្រវែងខ្លីជាងមុន»។
សូមរំលឹកថា គម្រោង «ព្រែកជីកហ្វូណនតេជោ» ប្រវែង ១៨០គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតា ហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប។ ផ្លូវទឹកនេះនឹងមានទទឹងមុខកាត់ ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹ កប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នាបានដោយសុវត្ថិភាព។
គម្រោងនេះនឹងសាងសង់សន្ទះផ្លូវនាវាចរណ៍ចំនួន៣កន្លែង, សាងសង់ស្ពានចំនួន ១១កន្លែង, សាងសង់ផ្លូវអមសាងខាងប្រវែង ២០៨គីឡូម៉ែត្រ និងមានបំពាក់សញ្ញាជំនួយនាវាចរណ៍ និងហេដ្ឋារចនាសម្ព័ន្ធឆ្លងកាត់ទន្លេផ្សេងៗទៀតផងដែរ។ ការសាងសង់គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារ និងរ យៈពេលសាងសង់ប្រមាណ៤ឆ្នាំ៕
ចែករំលែកព័តមាននេះ