រាជធានីភ្នំពេញ ៖ បច្ចុប្បន្ន មានជនបរទេសស្ទើរចម្រុះជាតិសាសន៍បានមករស់នៅ ធ្វើការ និងប្រកបរបររកស៊ីនៅក្នុងប្រទេសកម្ពុជា ។ ពួកគេទាំងនោះមួយចំនួនបានមករស់នៅរយៈពេលខ្លី និងខ្លះទៀតបានទិញលំនៅលំនៅឋានរស់នៅជួបជុំគ្រួសារក្នុងសង្គមកម្ពុជា ដោយមានទាំងកូន…
រាជធានីភ្នំពេញ ៖ បច្ចុប្បន្ន មានជនបរទេសស្ទើរចម្រុះជាតិសាសន៍បានមករស់នៅ ធ្វើការ និងប្រកបរបររកស៊ីនៅក្នុងប្រទេសកម្ពុជា ។ ពួកគេទាំងនោះមួយចំនួនបានមករស់នៅរយៈពេលខ្លី និងខ្លះទៀតបានទិញលំនៅលំនៅឋានរស់នៅជួបជុំគ្រួសារក្នុងសង្គមកម្ពុជា ដោយមានទាំងកូន ពូនជាចៅយ៉ាងសុខសាន្ដ ។ តើជនបរទេសទាំងនោះមានសិទិ្ធទិញអចលនវត្ថុនៅកម្ពុជា ធ្វើជាកម្មសិទ្ធិរបស់ខ្លួនបានដែរឬទេ ?
បើតាមមន្ត្រីក្រសួងរៀបចំដែនដីនគរូបនីយកម្ម និងសំណង់ បានឱ្យដឹងថា ជនបរទេសពិតជាមានសិទ្ធិលើកម្មសិទ្ធិ ប៉ុន្ដែទៅលើអគារសហកម្មសិទ្ធិតែប៉ុណ្ណោះ មិនអាចទិញលំនៅឋានជាន់ផ្ទាល់ដីបានជាដាច់ខាត ។
អគ្គនាយកនៃអគ្គនាយកដ្ឋានរដ្ឋបាល និងជាអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានមានប្រសាសន៍កាលពីថ្ងៃទី២០ តុលា ម្សិលមិញ ថា ៖« ជនបរទេសមានសិទ្ធិទិញអចលនវត្ថុនៅកម្ពុជាតែនៅលើអគារសហកម្មសិទ្ធិ ចាប់ពីជាន់ទី១ឡើងទៅ » ។
លោកបន្ដថា ៖«ការអនុញ្ញាតឱ្យជនបរទេសមានសិទ្ធិលើកម្មសិទ្ធិនេះ វាបានផ្តល់ប្រយោជន៍ដល់ការអភិវឌ្ឍនៃវិស័យសំណង់ ជាពិសេស លើការសាងសង់អគារសហកម្មសិទ្ធិនៅកម្ពុជា » ។
យោងតាមច្បាប់ស្តីពីការផ្តល់សិទ្ធិកម្មសិទ្ធិលើចំណែកឯកជននៃអគារសហកម្មសិទ្ធិដល់ជនបរទេស ដែលមាន៨ជំពូក និង២៤មាត្រា បានកំណត់ថា អគារសហកម្មសិទ្ធិ គឺសំដៅដល់អគារ ឬសំណង់ដែលមានកម្មសិទ្ធិករច្រើននាក់រស់នៅ។ អគារសហកម្មសិទ្ធិមានចំណែកខ្លះជាកម្មសិទ្ធិផ្តាច់មុខរបស់សហកម្មសិទ្ធិករនីមួយៗ ហៅថា «ចំណែកឯកជន» និងមានចំណែកខ្លះជាលំហរួមសម្រាប់ការប្រើប្រាស់រួមរបស់សហកម្មសិទ្ធិករទាំងអស់ ហៅថា «ចំណែករួម»។ ការបង្កើតច្បាប់នេះឡើង សំដៅទាក់ទាញ និងសម្រួលដល់ធុរកិច្ចរបស់វិនិយោគិនលើវិស័យសំណង់ ព្រមទាំងជួយដល់ទីផ្សារអចលនវត្ថុនៅកម្ពុជា។
យោងតាមមាត្រា៦នៃច្បាប់នេះ បានចែងថា ជនបរទេសមានសិទ្ធិកម្មសិទ្ធិលើចំណែកឯកជននៃអគារសហកម្មសិទ្ធិ ចាប់ពីជាន់ទី១ (មួយ)ឡើងទៅ ។ ជាន់ផ្ទាល់ដី និងជាន់ក្រោមដី មិនត្រូវបានអនុញ្ញាតឲ្យជនបរទេសមានសិទ្ធិកម្មសិទ្ធិឡើយ ។
ក្នុងមាត្រា២២នៃច្បាប់នេះ ក៏បានចែងដែរថា ជនបរទេសណាដែលបានទទួលទិញ ឬទទួលផ្ទេរចំណែកឯកជននៃអគារសហកម្មសិទ្ធិមុនច្បាប់នេះចូលជាធរមាន ហើយមិនស្របតាមបញ្ញត្តិទាំងឡាយដូចមានចែងក្នុងមាត្រា៦នៃច្បាប់នេះ ត្រូវបានអនុញ្ញាតឲ្យធ្វើការដោះស្រាយដើម្បីឲ្យស្របតាមច្បាប់នេះឡើងវិញ ក្នុងរយៈពេល២ (ពីរ) ឆ្នាំ ។
ក្នុងករណីដែលមិនគោរពតាមកថាខណ្ឌទី១នោះ អាជ្ញាធរមានសមត្ថកិច្ចត្រូវប្ដឹងទៅតុលាការ ដើម្បីលក់ចំណែកឯកជននៃអគារសហកម្មសិទ្ធិនោះដោយបង្ខំ ។
លោក ឡៅ ទិព្វសីហា មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា បន្ទាប់ពីច្បាប់កម្ពុជាអនុញ្ញាតឱ្យជនបរទេសមានសិទ្ធិទិញអចលនវត្ថុធ្វើជាកម្មសិទ្ធិមកឃើញថា កំណើនចំនួនជនបរទេសទទួលបានសិទ្ធិកើនឡើង ។
ជាក់ស្តែង នៅឆ្នាំ២០១៦កន្លងទៅ ជនបរទេសប្រមាណ៧៧៨នាក់បានសិទ្ធិកម្មសិទ្ធិចំណែកឯកជនលើអគារសហកម្មសិទ្ធិ មិនមែនដីធ្លី ។
លោកបន្តថា ៖« ក្នុងឆ្នាំ២០១៧នេះ យើងមិនទាន់ធ្វើការប្រៀបធៀបនៃចំនួនជនបរទេសមានសិទ្ធិកម្មសិទ្ធិនៅឡើយទេ តែជារួម ការទិញលក់អគារសហកម្មសិទ្ធិសម្រាប់ជនបរទេសនេះនៅតែមានសកម្មភាពខ្លាំងក្លានៅឡើយ ហើយនៅដំណាច់ឆ្នាំនេះ ចំនួនជនបរទេសបានសិទ្ធិកម្មសិទ្ធិនឹងបន្តកើនឡើងថែមទៀត » ៕
ចែករំលែកព័តមាននេះ