ប្រកាសចូលកាន់មុខតំណែងអភិបាលខេត្តបាត់ដំបងថ្មី
- បាត់ដំបង
ខេត្តបាត់ដំបង ៖ ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីអតីតៈអភិបាលខេត្តទាំងអស់ និងខេត្តផ្សេងៗទៀត មន្ត្រីរាជការ…
ខេត្តបាត់ដំបង ៖ ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីអតីតៈអភិបាលខេត្តទាំងអស់ និងខេត្តផ្សេងៗទៀត មន្ត្រីរាជការ…
ខេត្តបាត់ដំបង ៖ ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីអតីតៈអភិបាលខេត្តទាំងអស់ និងខេត្តផ្សេងៗទៀត មន្ត្រីរាជការ កងទ័ព នគរបាល អាវុធហត្ថសរុបរួម១,២៧០នាក់ បានមកចូលរួមនៅក្នុងមហោស្រពស្ទឹងសង្កែ ក្រុងបាត់ដំបង ខេត្តបាត់ដំបង នៅវេលាព្រឹកថ្ងៃទី២០ ខែតុលា ឆ្នាំ២០១៧ ។
លោក ច័ន្ទ សុផល អភិបាល នៃគណៈអភិបាលខេត្តបាត់ដំបង ដែលត្រូវចូលនិវត្តន៍បានមានមតិថា ឆ្លងកាត់ការងារពេញមួយឆ្នាំ២០១៧ ក្នុងនាមអភិបាលខេត្ត បានជំរុញដំណើរការអភិវឌ្ឍជាបន្តបន្ទាប់ ក្រោមម្លប់សុខសន្តិភាព សំខាន់ជំរុញវិស័យកសិកម្ម ដំណាំឧស្សាហកម្ម និងដំណាំរួមផ្សំសរុបបានចំនួន១២៨,៥១៤ហិកតា គិតមកដល់ខែកញ្ញា ឆ្នាំ២០១៧ នេះ ហើយការកែលម្អហេដ្ឋារចនាសម្ព័ន្ធរូបវ័ន្តរួមមាន ផ្លូវថ្នល់ ប្រព័ន្ធធារាសាស្ត្រ ប្រឡាយ ប្រព័ន្ធចម្រោះទឹកកខ្វក់ ការពង្រីកប្រព័ន្ធទឹកស្អាត អគ្គិសនី ការបំពាក់ភ្លើងសាធារណៈ ភ្លើងបញ្ចៀសចរាចរ រៀបចំសួនសាធារណៈ និងវិស័យនានា ដែលធ្វើឲ្យខេត្តបាត់ដំបងកែប្រែសោភ័ណភាពខុសប្លែកជាពីមុនយ៉ាងច្រើន ។
បន្ទាប់មកលោក អ៊ួង ចន្ឋី ប្រធាននាយកដ្ឋានបុគ្គលិក នៃអគ្គនាយកដ្ឋានរដ្ឋបាលក្រសួងមហាផ្ទៃ បានអានព្រះរាជក្រឹត្យ អនុក្រឹត្យ ដោយតែងតាំងលោក ងួន រតនៈ អភិបាលខេត្តបាត់ដំបង លោក អ៊ុយ សុធាវី អភិបាលរងខេត្តត្បូងឃ្មុំ ត្រូវបានផ្លាស់មកជាអភិបាលរងខេត្តបាត់ដំបង លោក សឿម ប៊ុនរិទ្ឋ នាយខុទ្ទកាល័យសាលាខេត្ត តែងតាំងជាអភិបាលរងខេត្តបាត់ដំបង ។ ក្រោយពីព្រះរាជក្រឹត្យ អនុក្រឹត្យ ប្រគល់ត្រារដ្ឋបាលដោយ សម្តេចក្រឡាហោម ស ខេង រួចមក លោក ងួន រតនៈ អភិបាលខេត្តទើបឡើងថ្មី បានឡើងធ្វើការប្តេជ្ញាចិត្តគោរពអនុវត្តន៍តាមតួនាទីដឹកនាំ និងរួមសហការគ្នាដោយផ្ដោតសំខាន់ទៅលើផលប្រយោជន៍សង្គមជាតិ និងរក្សាសេចក្តីសុខ សណ្តាប់ធ្នាប់ និងសុខសន្តិភាពជូនប្រជាពលរដ្ឋឲ្យបានល្អបន្ថែមទៀត ។
បន្ទាប់មក សម្តេចក្រឡាហោម ស ខេង បានចាប់អារម្មណ៍លើវត្តមានអតីតៈអភិបាលខេត្តបាត់ដំបង តាំងពីសម័យសង្គ្រាមមកម្ល៉េះ ដែលបានបង្ហាញមុខនៅទៅនេះ ដើម្បីបញ្ជាក់អំពីការដឹកនាំសម័យមុនៗមកនោះ គឺជាបទពិសោធន៍ល្អមួយតាមសម័យកាល តែអ្វីៗគឺមានការកែទម្រង់ពីរាជរដ្ឋាភិបាល ដើម្បីជំរុញការអភិវឌ្ឍឲ្យមានការកើនឡើងពីមួយឆ្នាំទៅមួយឆ្នាំ ។ សម្តេចក្រឡាហោម បានបញ្ជាក់ទៀតថា ដោយមានការលើកពេលប្រកាស់អភិបាលខេត្តកន្លងមក២ឬ៣ដង ក៏មានលេចឮដំណឺងពីសារព័ត៌មានមួយចំនួន ដែលបានផ្សាយក្នុងការតែងតាំងអភិបាលខេត្តថ្មីនេះ គឺជាថ្នូរនឹងការដោះដូរនឹងថវិការាប់សែនដុល្លារ តែតាមពិតសុំឲ្យអង្គភាពសារព័ត៌មានមួយនោះបង្ហាញឯកសារ តឹកតាង សាក្សី ដែលបានផ្សាយចោទប្រកាន់នោះមក ព្រោះនេះគឺជាការកែទម្រង់បន្ថែមទៀតរបស់រាជរដ្ឋាភិបាល និងបន្តវេនពីមន្ត្រីចាស់ដែលត្រូវចូលនិវត្តន៍ ។
ចំពោះសភាពការណ៍នយោបាយ សម្តេចក្រឡាហោម ស ខេង បានបង្ហាញឃ្លីបវីដេអូរបស់លោក សម រង្សី ដែលបានអំពាវនាវ ឲ្យកងកម្លាំងប្រដាប់អាវុធទាំងអស់នៅក្នុងប្រទេសកម្ពុជា នាំគ្នាបំបែរកាណុងកាំភ្លើងទៅប្រឆាំងរាជរដ្ឋាភិបាល ដែលមាន សម្តេចតេជោ ហ៊ុន សែន ជានាយករដ្ឋមន្ត្រី ត្រូវចុះចេញពីតំណែងនោះ គឺជាសកម្មភាពក្បត់ជាតិដូចលោក កឹម សុខា ដែរហើយ ព្រោះរាជរដ្ឋាភិបាលកើតមានមកដល់សព្វថ្ងៃនេះ គឺកើតចេញពីការបោះឆ្នោតរបស់ប្រជាជន មិនមែនកើតឡើងពីការបំផុសប្រជាជនឲ្យធ្វើបាតុកម្ម បង្កភាពញុះញង់ បង្កើតបដិវត្តន៍ពណ៌ដូចលោក សម រង្សី និង កឹម សុខា ឡើយ ហើយរាជរដ្ឋាភិបាលកំពុងតែត្រៀមរូបភាពជាតឹកតាងទាំងនោះ បង្ហាញទៅអន្តរជាតិឲ្យបានយល់ដឹងផងដែរ ។ ជាចុងក្រោយ សម្ដេចក្រឡាហោម ស ខេង បានផ្តាំផ្ញើគ្រប់មន្ត្រីទាំងអស់ត្រូវមានការរួបរួមសាមគ្គីគ្នា និងបែងចែកការងារឲ្យមានដំណើរការល្អ ដើម្បីបម្រើប្រជាពលរដ្ឋជាបន្តទៅទៀត ៕
ចែករំលែកព័តមាននេះ