ខេត្តកំពង់ស្ពឺ ៖ អំពើមនុស្សឃាតមួយបង្កឡើងដោយជនពុំស្គាល់មុខបានយកអាវុធមុខស្រួចទៅចាក់ប្រធានសន្តិសុខរោងចក្រវិន សាស៊ូ ស្ថិតនៅក្នុងភូមិអង្គសុគន្ធា ឃុំមហាឫស្សី ស្រុកគងពិសី ខណៈដែលកម្មករកម្មការិនីកំពុងចេញពីធ្វើការបន្ថែមម៉ោងនៅវេលាម៉ោង៧យប់ ថ្ងៃទី២៧ កញ្ញា ។ ហេតុការណ៍នេះ បណ្តាលឱ្យប្រធានសន្តិសុខស្លាប់ក្រោយពីភ្ញាក់ផ្អើលបម្រុងយកទៅសង្គ្រោះនៅមន្ទីរព្យាបាលឯកជនមួយក្នុងផ្សារត្រាំខ្នារ ។
លោកអនុសេនីយ៍ឯកទុយ ថេន អធិការរងនគរបាលស្រុកគងពិសី ទទួលបន្ទុកការងារព្រហ្មទណ្ឌបានឱ្យដឹងថា ប្រធានសន្តិសុខប្រចាំរោងចក្រដែលត្រូវជនមិនស្គាល់មុខចាក់សម្លាប់នេះឈ្មោះចេន វិចិត្រ ភេទប្រុស អាយុ២៨ឆ្នាំ មានទីលំនៅភូមិដារ ឃុំដារ ស្រុកកំពង់លែង ខេត្តកំពង់ឆ្នាំង ជាសន្តិសុខរបស់ក្រុមហ៊ុនខាំបូស៊ីក ។
ពេលដល់ម៉ោងចេញពីរោងចក្រ កម្មករកម្មការិនីរាប់រយនាក់ដែលធ្វើការថែមម៉ោងបានចេញតាមច្រកទ្វារដើម្បីទៅកាន់រថយន្តដែលចតជាច្រើនគ្រឿងនៅមុខរោងចក្រ ។ ខណៈនោះក៏មានជនពុំស្គាល់មុខបន្លំខ្លួនក្នុងហ្វូងកម្មករកម្មការិនីប្រជ្រៀតទៅជិតប្រធានសន្តិសុខរោងចក្រ ហើយយកអាវុធមុខស្រួចចាក់សំដៅឈ្មោះចេន វិចិត្រ តែម្តង ខណៈដែលជនរងគ្រោះកំពុងឈរយាមច្រកចេញពីក្នុងរបងរោងចក្រ បណ្តាលឱ្យដួលហូរឈាមជោកខ្លួនផ្អើលដល់កម្មករ កម្មការិនីភិតភ័យស្លន់ស្លោរត់ជាន់គ្នា ។ ក្នុងហេតុការណ៍នេះ បណ្តាលឱ្យជនរងគ្រោះដួលសន្លប់ ហើយកម្មករនិងសន្តិសុខឯទៀតដែលស្ថិតនៅទីនោះបានមកជួយលើកជនរងគ្រោះបម្រុងយកទៅសង្គ្រោះតែបានស្លាប់បាត់ទៅហើយ ។
ប៉ូលិសព្រហ្មទណ្ឌនិយាយថា ពេលនេះពុំទាន់ដឹងថាអាវុធនោះជាកាំបិតធម្មតា ឬកាំបិតសាំងគីម ឬជាដែកឆាបទេ ដែលជនមិនស្គាល់មុខប្រើប្រាស់សម្រាប់ចាក់គ្រាន់តែជំហានដំបូងកំណត់ថាជាអាវុធមុខស្រួចនិងត្រូវជនល្មើសចាក់ចំកណ្តាលទ្រូង ។ តាមការសន្និដ្ឋាន គឺជារឿងគំនុំលើអ្វីមួយតែពុំទាន់ច្បាស់លាស់នៅឡើយ ។ ករណីនេះ សមត្ថកិច្ចកំពុងស្រាវជ្រាវយ៉ាងសកម្មបំផុត ហើយសពត្រូវបានប្រគល់ឱ្យបងប្អូននៅឯ ខេត្តកំពង់ឆ្នាំងនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ