ខេត្តកណ្តាល ៖ ស្ពានថ្មមួយកន្លែងដែលបានសាងសង់ឡើងក្នុងអំឡុងទសវត្សឆ្នាំ១៩៩០ បានរងនូវការខូចខាតជាបណ្តើរៗហើយដោយសារតែស្ពាននោះមានកម្រាស់ស្តើងពេកហើយក្នុងមួយថ្ងៃៗមានរថយន្តតូចធំគ្រប់ប្រភេទបើកឆ្លងកាត់ ជាពិសេសរថយន្តដឹកកម្មករចេញពីភូមិទៅធ្វើការនៅតាមរោងចក្រនានា ។ ពេលនេះតួស្ពានត្រូវបានប្រទះឃើញមានការធ្លុះធ្លាយទំហំធំៗចំនួន២កន្លែងចេញសរសៃដែកតែម្តង ។ ប្រជាពលរដ្ឋមានការព្រួយបារម្ភយ៉ាងខ្លាំង ខ្លាចស្ពានខាងលើបាក់ក្នុងថ្ងៃណាមួយធ្វើដំណើរទៅមកលែងកើត ។
ប្រជាពលរដ្ឋបានឱ្យដឹងថា ស្ពានថ្មនោះគឺជាស្ពានឆ្លងអូរស្ថិតនៅតាមផ្លូវលំចម្ងាយប្រមាណជាង១០០ម៉ែត្រពីវត្តទាន់អរ ភូមិទួលខ្លុង ឃុំទួលព្រិច ស្រុកអង្គស្នួល ខេត្តកណ្តាល តភ្ជាប់ពីផ្លូវបែកចានភ្នំប្រសិទ្ធឆ្ពោះទៅសាលាឃុំទួលព្រិច និងបែកទៅជាប់ជាមួយផ្លូវជាតិលេខ៥១ផងដែរ ។ ស្ពាននេះតាមការប៉ាន់ស្មានមានបណ្តោយប្រវែងប្រមាណ២០ម៉ែត្រទទឹងប្រហែល៨ម៉ែត្រ។ អ្នកខ្លះនិយាយថា ព្រះសង្ឃក្នុងវត្តទាន់អរនោះជាអ្នកកសាងកាលពីអំឡុងទសវត្សឆ្នាំ១៩៩០ ដែលពេលនេះមានអាយុជាង២០ឆ្នាំហើយ ។
ប្រជាពលរដ្ឋបានបន្តថា ស្ពាននោះមានសារសំខាន់ណាស់សម្រាប់ពួកគាត់នៅតំបន់នេះ ។
ពេលនេះស្ពានបានរងការធ្លុះធ្លាយចំនួន២កន្លែងធំៗនៅត្រង់ចំណុចគម្លាតពីគល់ស្ពានខាងកើតផ្នែកខាងឆ្វេងដៃប្រវែង២ម៉ែត្រ ទំហំប៉ុនចង្អេរនិងនៅត្រង់ចំណុចគម្លាតស្ពានខាងលិចផ្នែកខាងស្តាំដៃប្រវែង៣ម៉ែត្រមានទំហំប្រហែល១ម៉ែត្រ ចេញសរសៃដែក ឯកន្លែងខ្លះទៀតអត់ធ្លុះធ្លាយទេតែចេញសរសៃដែកតែម្តងមិនយូរប៉ុន្មានប្រាកដជាត្រូវបាក់ហើយ ។
ប្រជាពលរដ្ឋបានបន្តថា កន្លងមកព្រះសង្ឃបានធ្វើការជួសជុលជាបន្តបន្ទាប់ តែពេលនេះបានរងការខូចខាតធ្ងន់ធ្ងរព្រោះមិនអាចទ្រាំទ្រទម្ងន់រថយន្តដឹកធុនធ្ងន់បាន ។ មិនទាន់ឃើញអាជ្ញាធរឃុំ-ស្រុកទៅពិនិត្យមើលឬមានវិធានការជួសជុលបែបណានៅឡើយទេ ។ បើអាជ្ញាធរមិនអើពើទេ ពួកគាត់បារម្ភខ្លាចថ្ងៃណាមួយស្ពាននោះបាក់ឆ្លងលែងកើតឬអាចបង្កឱ្យមានគ្រោះថ្នាក់ទៀតផង ៕
ចែករំលែកព័តមាននេះ