ខេត្តបាត់ដំបង ៖ ប្រភពព័ត៌មានបានរាយការណ៍ថា ប្រជាពលរដ្ឋជាង៥០០នាក់ នៅភូមិអូរ ឃុំពេជ្រចិន្តា ស្រុកភ្នំព្រឹក ដែលសុទ្ធសឹងជាអ្នកលេងតុងទីន បានប្រមូលផ្ដុំគ្នាស្រែកទាមទារសុំជំនួយពីសមត្ថកិច្ចអស់រយៈពេល៤ថ្ងៃហើយគិតត្រឹមថ្ងៃទី២៧ កញ្ញា ក្រោយពីដឹងថា ស្រ្តីមេតុងទីនបានកើបប្រាក់ច្រកជាង២ការុងដឹកតាមរថយន្តតាក់ស៊ីរត់ចោលស្រុក ។
ខេត្តបាត់ដំបង ៖ ប្រភពព័ត៌មានបានរាយការណ៍ថា ប្រជាពលរដ្ឋជាង៥០០នាក់ នៅភូមិអូរ ឃុំពេជ្រចិន្តា ស្រុកភ្នំព្រឹក ដែលសុទ្ធសឹងជាអ្នកលេងតុងទីន បានប្រមូលផ្ដុំគ្នាស្រែកទាមទារសុំជំនួយពីសមត្ថកិច្ចអស់រយៈពេល៤ថ្ងៃហើយគិតត្រឹមថ្ងៃទី២៧ កញ្ញា ក្រោយពីដឹងថា ស្រ្តីមេតុងទីនបានកើបប្រាក់ច្រកជាង២ការុងដឹកតាមរថយន្តតាក់ស៊ីរត់ចោលស្រុក ។
តាមការផ្ដល់ព័ត៌មានថា ស្រ្តីមេតុងទីនដែលវេចប្រាក់រាប់រយលានរៀលរត់ចោលកូនៗនោះឈ្មោះឡោ ញ៉ អាយុ៥៤ឆ្នាំ នៅភូមិអូរ ឃុំពេជ្រចិន្តា ស្រុកភ្នំព្រឹក ។ មេតុងទីនរូបនេះបានវេចលុយរត់កាលពីវេលាម៉ោងជិត៥ល្ងាចថ្ងៃទី២៣ កញ្ញា ជាមួយនឹងកូនស្រីម្នាក់ ។ មេតុងទីននេះត្រូវគេដឹងថា បានគេចខ្លួនតាមរថយន្តតាក់ស៊ី ជាមួយនឹងលុយជាង២ការុង រីឯលុយមួយចំនួនទៀតត្រូវកូនស្រីម្នាក់ស្ពាយចេញពីផ្ទះតាមក្រោយ ហើយណាត់ជួបគ្នាតាមផ្លូវ រួចចេញដំណើរឆ្ពោះទៅកាន់រាជធានីភ្នំពេញ ទាំងយប់តែម្ដង ។ កូនៗតុងទីនបញ្ជាក់ថា ដំបូងគ្មានអ្នកណាបានដឹងពីគម្រោងមេតុងទីនបោកនេះទេ លុះព្រឹកថ្ងៃទី២៤ កញ្ញា ទើបមានការភ្ញាក់ផ្អើល ដោយសារផ្ទះមេតុងទីនខាងលើបិទទ្វារមិនឃើញម្ចាស់នៅ ។
កូនតុងទីនឈ្មោះសារ៉ាយ ចំរើន ភេទប្រុស អាយុ៣៨ឆ្នាំ បានប្រាប់កោះសន្តិភាពថា តុងទីននេះមានច្រើនក្បាល ដោយ១ក្បាលត្រូវបង់ប្រាក់ចំនួន១ម៉ឺនរៀលជារៀងរាល់ថ្ងៃ ដោយចាប់ផ្ដើមលេងតាំងពីអំឡុងខែមេសា ឆ្នាំ២០១២ រហូតមក ដែលមានមេឈ្មោះឡោ ញ៉ ភេទស្រីអាយុ៥៤ឆ្នាំ និងមានកូនៗសរុបចំនួន៥៣៧នាក់ ។ លោកសារ៉ាយ ចំរើន បន្តថា កាលចាប់ផ្ដើមលេងប៉ុន្មានខែដំបូង មេតុងទីនរូបនេះហាក់ដូចបង្កភាពងាយស្រួលណាស់ ទាំងការប្រមូលលុយ ទាំងការដេញយកលុយ គឺមិនដែលជំពាក់កូន១សេនទេ ទើបតែដល់ខែកញ្ញានេះ ស្រាប់តែមេតុងទីនរូបនេះរៀបចំគម្រោងកើបលុយរត់ចោលកូនៗតែម្ដង ។ គាត់បញ្ជាក់ថា ចាប់តាំងពីថ្ងៃទី១ កញ្ញា រហូតដល់ថ្ងៃទី២៣ កញ្ញា (ថ្ងៃមេរត់) មេតុងទីននេះបានប្រមូលលុយរហូតតែពេលកូនៗដេញបានបែរជាមិនប្រគល់លុយនោះឲ្យកូនដោយលើកហេតុផលបែបបោកប្រាស់មិនចេះចប់ ហើយគ្រានោះកូនៗក៏ចាប់ ផ្ដើមសង្ស័យរហូតមកដែរ ។ លុះនៅល្ងាចថ្ងៃទី២៣ កញ្ញា ស្រាប់តែស្រ្តីមេតុងទីននេះវេចលុយរត់មែនធ្វើឲ្យមានការភ្ញាក់ផ្អើលពេញស្រុកភ្នំព្រឹក ។ លោកសារ៉ាយ ចំរើន បន្តថា គាត់លេងតុងទីនជាមួយមេបោកខាងលើនេះចំនួន៥ក្បាលអស់លុយសរុបចំនួន៥លានរៀល ។
រីឯស្រ្តីម្នាក់ឈ្មោះសេង សុខឃឿន អាយុ២៦ឆ្នាំ បានប្រាប់ដែរថា គាត់លេងចំនួន៨ក្បាល ដែលត្រូវបង់លុយ១ក្បាល១ម៉ឺនរៀលជាប្រចាំថ្ងៃ ដោយចាប់តាំងពីថ្ងៃទី១ ដល់ថ្ងៃទី២៣ កញ្ញា គឺគាត់អស់លុយសរុបចំនួន៦លានរៀល ។ ចំណែកប្អូនស្រីគាត់ក៏អស់៣លានរៀលដែរ និងមានកូនខ្លះទៀតអស់ពី១០លានរៀលដល់ជិត២០លានរៀលក៏មាន ។
តាមការបញ្ជាក់ពីកូនៗតុងទីនថា ក្នុងរយៈពេល២៣ថ្ងៃចុងក្រោយក្នុងខែកញ្ញានេះ ដែលមេតុងទីនខាងលើកើបលុយរត់ មានទឹកប្រាក់សរុបជាង១២៣លានរៀល ។ ពួកគេនិយាយថា កូនតុងទីនរាប់រយនាក់បានប្រមូលផ្ដុំគ្នានៅមុខផ្ទះមេតុងទីនឈ្មោះឡោ ញ៉ ចាប់តាំងពីព្រឹកថ្ងៃទី២៤ កញ្ញា រហូតដល់ថ្ងៃទី២៧ កញ្ញា តែគេមិនឃើញមានអាជ្ញាធរ ឬសមត្ថកិច្ចណាមកសួរនាំទេ ហើយក៏មិនមកក្បែរដែរ ។ ក្រុមអ្នកលេងតុងទីនទាំងនោះបញ្ជាក់ថា ពួកគេបានចូលទៅដាក់ពាក្យបណ្ដឹងនៅអធិការដ្ឋាននគរបាលស្រុកភ្នំព្រឹកដែរ តែគេមិនទទួលចាត់ការដោយសមត្ថកិច្ចដេញឲ្យពួកគាត់ទៅប្ដឹងនៅតុលាការវិញ ហើយពេលនេះពួកគាត់នៅតែបន្តឡោមព័ទ្ធផ្ទះមេតុងទីននេះនៅឡើយ ។
ទាក់ទិននឹងករណីនេះ អធិការនគរបាលស្រុកភ្នំព្រឹកលោកសុង សុភ័ក្រ្ត បានប្រាប់កោះសន្តិភាពនៅព្រឹកថ្ងៃទី២៧ កញ្ញា ថា ក្រោយពីស្រ្តីមេតុងទីននោះវេចប្រាក់រត់ចោលស្រុក មានតំណាងកូនៗតុងទីនជិត១០មកដាក់ពាក្យបណ្ដឹងនៅកន្លែងលោកដែរ តែដោយសារល្បែងតុងទីននេះពិបាកចាត់ការពេក និងគ្មានឯកសារច្បាស់លាស់ផង ទើបលោកមិនបានទទូល តែបានប្រាប់ឲ្យពួកគាត់ទៅប្ដឹងនៅតុលាការវិញ ព្រោះអាចចាត់ការលឿនជាង ។ ប៉ុន្តែជាមួយគ្នានេះលោកអធិការរូបនេះបានបញ្ជាក់ជាថ្មីថា ឥឡូវបើអ្នកចាញ់បោកលុយតុងទីនទាំងនោះមកដាក់បណ្ដឹងជាថ្មីលោកនឹងទទួលចាត់ការ តែបានត្រឹមកសាងសំណុំរឿងបញ្ជូនទៅសាលាដំបូងខេត្តតែប៉ុណ្ណោះ ព្រោះមេតុងទីនបានរត់គេចខ្លួនបាត់ទៅហើយ ។
ទោះជាយ៉ាងនេះក្ដី បើតាមក្រុមអ្នកលេងតុងទីនដដែល បានបន្ថែមថា មេតុងទីនបោកឈ្មោះឡោ ញ៉ នេះនៅមានកូនស្រីម្នាក់ទៀតឈ្មោះលីន អាយុប្រហែល២៧ឆ្នាំ ក៏ធ្វើមេតុងទីន ហើយក៏កំពុងត្រៀមវេចលុយរត់ដូចម្ដាយដែរ ។ តាមសរុបទឹកប្រាក់មានជាង២០០លានរៀល ដែលពេលនេះកូនៗជាង៥០០នាក់កំពុងឡោមព័ទ្ធផ្ទះទារប្រាក់នេះវិញ ។ ពួកគេបញ្ជាក់ថា ក្រុមអ្នកតវ៉ាក៏បានប្ដឹងសមត្ថកិច្ចឲ្យជួយចាត់ការលើមេតុងទីនឈ្មោះលីន ជាកូនស្រីមេតុងទីនឈ្មោះញ៉ ដែរ តែសមត្ថកិច្ចមិនបានអើពើនឹងបណ្ដឹងនេះទេ បើទោះជាមេតុងទីនម្នាក់នេះកំពុងស្ថិតនៅក្នុងផ្ទះ ហើយកូនតុងទីនរាប់រយនាក់កំពុងឡោមព័ទ្ធមិនឲ្យចេញក្រៅផ្ទះនៅឡើយក្ដី ។
កោះសន្តិភាព មិនអាចស្វែងរកការបំភ្លឺពីស្រ្តីមេតុងទីនឈ្មោះឡោ ញ៉ និងសាច់ញាតិណាម្នាក់បាននៅឡើយទេ នៅព្រឹកថ្ងៃទី២៧ កញ្ញា ជុំវិញការចោទប្រកាន់ពីកូនៗរាប់រយនាក់ខាងលើនេះ។ ប៉ុន្តែតាមប្រភពព័ត៌មានថា មេតុងទីនឈ្មោះញ៉ និងក្រុមគ្រួសារកំពុងសម្ងំលាក់ខ្លួននៅភ្នំពេញ លើកលែងតែកូនស្រីឈ្មោះលីន ដែលជាមេតុងទីនដែរនោះកំពុងត្រូវអ្នកភូមិតាមស្ទាក់ និងឃ្លាំមើលទាំងយប់ទាំងថ្ងៃក្រែងវេចប្រាក់ជាង២០០លានរៀលដោយឡែកផ្សេងទៀតរត់ចោលស្រុកដែរ ៕
ចែករំលែកព័តមាននេះ