ខេត្តស្ទឹងត្រែង ៖ ប្រជាពលរដ្ឋខ្មែរ២នាក់រស់នៅស្រុកសៀមប៉ាង ត្រូវបានតម្រួតឡាវចាប់ខ្លួនកាលពីវេលាម៉ោង២និង១៥នាទីរសៀលថ្ងៃទី២៦ កញ្ញា ២០១២ ហើយត្រូវបញ្ជូនបន្តទៅឃុំខ្លួននៅខេត្តចំម្ប៉ាសាក់ នៅថ្ងៃទី២៧ កញ្ញានេះផងដែរ ។
តាមការឱ្យដឹងពីមន្ត្រីនគរបាលវរការពារព្រំដែនលេខ៧០១ នៅរសៀលថ្ងៃទី២៧ កញ្ញា នេះថា ប្រជាពលរដ្ឋខ្មែរ២នាក់ត្រូវតម្រួតការពារព្រំដែនឡាវចាប់ខ្លួននៅចន្លោះបង្គោលព្រំដែនលេខ០៥៧ និង០៥៨ ស្ថិតក្នុងភូមិខាំភោគ ឃុំព្រែកមាស ស្រុកសៀមប៉ាង ហើយត្រូវបានតម្រួតឡាវចោទប្រកាន់លួចឆ្លងដែនខុសច្បាប់ និងបានឃាត់ខ្លួនក្នុងទឹកដីឡាវចម្ងាយពីបង្គោលព្រំដែនកម្ពុជា៣គីឡូម៉ែត្រប៉ុណ្ណោះ ។
មន្ត្រីនគរបាលវរការពារព្រំដែនលេខ៧០១ បានបញ្ជាក់ថា ប្រជាពលរដ្ឋខ្មែរទាំង២នាក់នោះមាន ១-ឈ្មោះឌី ណាក់ ភេទប្រុស អាយុ៥០ឆ្នាំ និង២-ឈ្មោះសាយ ផន ភេទប្រុស អាយុ២៨ឆ្នាំ អ្នកទាំង២នាក់រស់នៅភូមិពាមខិះ ឃុំស្រែសំបូរ ស្រុកសៀមប៉ាង ខេត្តស្ទឹងត្រែង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ