រាជធានីភ្នំពេញ ៖ កាលពីព្រឹកថ្ងៃទី២៦ កញ្ញា នៅក្រសួងមហាផ្ទៃមានប្រារព្ធពិធីប្រកាសជាផ្លូវការនៃក្រុមការងារទេសន្តរប្រវេសន៍របស់លេខាធិការដ្ឋានគណៈកម្មាធិការជាតិ ក្រោមអធិបតីភាព លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិដឹកនាំការបង្រ្កាបអំពីជួញដូរ ការរត់ពន្ធ ការធ្វើអាជីវកម្មលើមនុស្ស និងធ្វើអាជីវកម្មផ្លូវភេទលើស្រ្តី និងកុមារ(ប.ជ.រ.ព.ភ) ដោយមានការចូលរួមពីលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋានគណៈកម្មាធិការជាតិដឹកនាំ (ប.ជ.រ.ព.ភ) និងមន្ត្រីក្រោមឱវាទមកពីស្ថាប័នពាក់ព័ន្ធប្រមាណ២៣០នាក់ ។
លោកជំទាវ ជូ ប៊ុនអេង បានមានប្រសាសន៍ថា ក្នុងឆ្នាំ២០១០ សកម្មភាព និងលទ្ធផលនៃការបង្រ្កាបអំពើជួញដូរមនុស្ស ការរត់ពន្ធ ការធ្វើអាជីវកម្មលើមនុស្ស និងផ្លូវភេទលើស្រ្តី និងកុមារដែលអាជ្ញាធរនៃប្រទេសជិតខាងបញ្ជូន ត្រឡប់មកស្រុកខ្មែរវិញមានចំនួន១២៧.០៣៥នាក់ក្នុងនោះមានស្រ្តីចំនួន៣៨.៥៧២នាក់ កុមារក្រោមអាយុ១៥ឆ្នាំ មានចំនួន១១.៨៧១នាក់ កើនជាងឆ្នាំ២០០៩ ចំនួន២៤.៧៣៦នាក់ និងនៅក្នុងឆ្នាំ២០១១ មានចំនួន១១៨.៧៩១នាក់ ស្ត្រីមានចំនួន៣៩.៤៦២នាក់ តិចជាងឆ្នាំ២០១០ចំនួន៧១២នាក់ ។
លោកជំទាវបានបន្តថា ប្រជាពលរដ្ឋដែលចូលទៅធ្វើការងារនៅប្រទេសថៃមិនស្របច្បាប់បានកើនឡើងក្នុងរយៈពេល៦ខែដើមឆ្នាំ២០១២។ តាមរបាយការណ៍ពីស្ថានទូតកម្ពុជា ប្រចាំព្រះរាជាណាចក្រថៃ តាមលិខិតលេខ១៣៦៨.១១សបក ស្តីពីករណីអាជ្ញាធរថៃចុះបញ្ជីពលករខុសច្បាប់ បានបញ្ជូនត្រឡប់មកស្រុកវិញមានចំនួន២៤២.៤២៩នាក់ ពលរដ្ឋខ្មែរដែលបានធ្វើការស្របច្បាប់ក្នុងប្រទេសថៃ មានចំនួន៥០.០០០នាក់ ពលករដែលកាន់CIមានចំនួន១០១.៣៣៤នាក់ និងពលរដ្ឋខ្មែរទើបនឹងចុះឈ្មោះថ្មីមានចំនួន២៤២.៤២៩នាក់ ។
ពលករដែលបានចូលទឹកដីថៃដោយខុសច្បាប់មិនទាន់បានចុះបញ្ជីពលករនៅតាមទូកនេសាទ និងត្រូវបានគេបញ្ជូនបន្តទៅប្រទេសផ្សេងៗសរុបចំនួន៤០០.០០០នាក់។លោកជំទាវបានបន្តទៀតថា ជារៀងរាល់ខែ ចំនួនប្រជាពលរដ្ឋខ្មែរដែលត្រូវបានអាជ្ញាធរថៃបញ្ជូនមកវិញតាមច្រកទ្វារអន្តរជាតិមានប្រមាណមួយម៉ឺននាក់ជាមធ្យម ៕
ចែករំលែកព័តមាននេះ