ខេត្តប៉ៃលិន៖ ដោយសារតែសង្កេតឃើញថា តែងតែមានវិវាទកើតឡើងរវាងសាសនា និងសាសនាក្នុងប្រទេសមួយចំនួននៅលើពិភពលោកយើងនេះ ទើបមានកិច្ចប្រជុំអន្តរសាសនាជារៀងរាល់ឆ្នាំ រវាងសាសនាធំៗចំនួន៣នៅក្នុងខេត្តប៉ៃលិនរួមមាន ព្រះពុទ្ធសាសនា គ្រឹស្ដសាសនា និងអ៊ិស្លាមសាសនា ។
ខេត្តប៉ៃលិន៖ ដោយសារតែសង្កេតឃើញថា តែងតែមានវិវាទកើតឡើងរវាងសាសនា និងសាសនាក្នុងប្រទេសមួយចំនួននៅលើពិភពលោកយើងនេះ ទើបមានកិច្ចប្រជុំអន្តរសាសនាជារៀងរាល់ឆ្នាំ រវាងសាសនាធំៗចំនួន៣នៅក្នុងខេត្តប៉ៃលិនរួមមាន ព្រះពុទ្ធសាសនា គ្រឹស្ដសាសនា និងអ៊ិស្លាមសាសនា ។
កិច្ចប្រជុំនេះធ្វើឡើងក្រោមអធិបតីភាពព្រឹទ្ធាចារ្យសំ អ៊ុងពៅ ប្រធានមន្ទីរធម្មការ និងសាសនាខេត្ត ព្រមទាំងមានការចូលរួមពីលោកសំ សាវឿន អនុប្រធានព្រះចៅអធិការគ្រប់វត្ត គ្រូគង្វាលសាសនាគ្រឹស្ដ និងអ្នកដឹកនាំសាសនាអ៊ិស្លាម សរុបចំនួនជាង៣០អង្ក-នាក់ ។ កម្មវិធីនេះចាប់ផ្ដើមឡើងនៅវេលាម៉ោង២ រសៀលថ្ងៃទី២៤ កញ្ញា ស្ថិតនៅមន្ទីរធម្មការនិងសាសនាខេត្តក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ។
លោកព្រឹទ្ធាចារ្យសំ អ៊ុងពៅ ប្រធានមន្ទីរធម្មការ និងសាសនាខេត្តមានប្រសាសន៍ថា យើងត្រូវតែរួបរួមសាមគ្គី ស្រឡាញ់រាប់អានគ្នាដូចបងប្អូន ព្រោះយើងជាអ្នកកាន់សាសនាស្វែងរកសេចក្ដីសុខក្នុងបច្ចុប្បន្នកាល និងអនាគតកាលដូចគ្នា តែប្លែកត្រង់ថា ព្រះរាជាណាចក្រកម្ពុជាយើងយកព្រះពុទ្ធសាសនាធ្វើជាសាសនារបស់រដ្ឋ ។ គ្មានសាសនាណាមួយប្រដៅមនុស្សឱ្យប្រព្រឹត្តអាក្រក់ កាប់សម្លាប់គ្នាទេ គឺតែងតែអប់រំ ណែនាំបរិស័ទរបស់ខ្លួនឱ្យដើរតាមគន្លងធម៌នៃព្រះរបស់ខ្លួននីមួយៗ ។
លោកព្រឹទ្ធាចារ្យបន្តថា រដ្ឋាភិបាលរបស់យើងបានតម្កល់សិទ្ធិសេរីភាពរបស់ប្រជាពលរដ្ឋខ្មែរខាងជំនឿ ហើយមានចែងច្បាស់នៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា នៅក្នុងជំពូកទី៣ មាត្រា៤៣គឺបញ្ជាក់យ៉ាងច្បាស់ណាស់ គ្រាន់តែចុងក្រោយបញ្ជាក់ថាព្រះពុទ្ធសាសនាជាសាសនារបស់រដ្ឋ តែជំនឿសាសនាគឺស្មើៗគ្នាទាំងអស់ ។ ទូទាំងសកលោក ប្រទេសណាក៏កំណត់សាសនាមួយជារបស់រដ្ឋគេដែរគ្រាន់តែថាប្រទេសខ្លះគេយកសាសនានេះ ខ្លះទៀតគេយកសាសនានោះ ។
សិទ្ធិសេរីភាពជំនឿទាំងអស់ស្ថិតនៅក្នុងក្របខណ្ឌច្បាប់ ជាពិសេសនៅពេលដែលមានកម្មវិធីផ្សេងៗដូចជាបុណ្យបញ្ចុះសីមា ព្រះវិហារ ពិធីបំបួសព្រះសង្ឃ និងសាងសង់វត្តអារាម ព្រមទាំងមានពិធីហែផ្កាប្រាក់ពីប្រទេសជិតខាង ចូលមកក្នុងប្រទេសយើងក៏ត្រូវតែមានច្បាប់ផងដែរ។ ខាងគ្រឹស្ដសាសនាវិញក៏ដូចគ្នាដែរ មុននឹងសាងសង់ព្រះវិហារ ឬធ្វើអ្វីផ្សេងទៀតដែលធំដុំក៏ត្រូវតែមានការសុំច្បាប់ជាមុនសិនដែរ ។
លោកព្រឹទ្ធាចារ្យសំ អ៊ុងពៅ ថ្លែងថា មូលហេតុដែលបង្កើតឱ្យមានការប្រជុំអន្តរសាសនានេះឡើង គឺដើម្បីចៀសវាងការមានទំនាស់រវាងគ្នានឹងគ្នា និងកុំឱ្យមានការចាក់ដោតវាយប្រហារពាក្យសម្ដី និងប្រើហិង្សាដាក់គ្នាទៅវិញទៅមក និងចៀសវាងការអូសទាញ បង្ខិតបង្ខំនរណាម្នាក់ឱ្យចូលសាសនារបស់ខ្លួន ។ ត្រូវអាស្រ័យលើខ្លួនរបស់គេចង់ចូលទៅសាសនាណាមួយ គឺស្ថិតលើខ្លួនរបស់គេផ្ទាល់ ។
គេមានសិទ្ធិរបស់គេរៀងៗខ្លួនសម្រាប់ជ្រើសរើសសាសនាដែលគេពេញចិត្ត ដូចជាការដែលមានសិទ្ធិបោះឆ្នោតដែរ។ បញ្ហាសំខាន់ជាងនេះទៀតគឺការសាមគ្គីរវាងគ្នាសម្រាប់ជាកម្លាំងរបស់ជាតិ ឱ្យក្លាយជាកម្លាំងរឹងមាំសម្រាប់ជួយការពារ និងអភិវឌ្ឍប្រទេស និងទឹកដីរបស់យើងឱ្យមានការរីកចម្រើនលើគ្រប់វិស័យ ។ ប្រទេសណាក៏ដោយឱ្យតែមានសន្ដិភាពខាងសាសនា និងសន្ដិភាពផ្នែកសង្គម ប្រទេសនោះតែងតែមានការអភិវឌ្ឍជាប់ជានិច្ច ។
លោកប្រធានមន្ទីរធម្មការខេត្តលើកឡើងថា ប្រទេសរបស់យើងមានសន្ដិភាពល្អណាស់បើពិនិត្យមើលទៅប្រទេសប៉ែកខាងអារ៉ាប់វិញកំពុងមានការវឹកវរ និងមានការភិតភ័យពីបញ្ហាសាសនា សម្លាប់បង្ហូរឈាមគ្នា និងធ្វើភេរវកម្មដាក់គ្នាឥតញញើតដៃឡើយ ៕
ចែករំលែកព័តមាននេះ