ខេត្តកំពង់ចាម ៖ បុរសម្នាក់ឈ្មោះម៉េង ហុង អាយុ៤២ឆ្នាំ ដែលគេដឹងថាមានប្រពន្ធរហូតដល់ទៅ៨នាក់នោះ រស់នៅឃុំបុសខ្នុរ ស្រុកចំការលើ បានត្រូវកម្លាំងនគរបាលប៉ុស្តិ៍រដ្ឋបាលឃុំបុសខ្នុរឃាត់ខ្លួន កាលពីវេលាម៉ោង៤រសៀលថ្ងៃទី២៣ កញ្ញា ពីបទបានចាប់កូនស្រី២នាក់បងប្អូន ក្នុងនោះម្នាក់អាយុ១៧ឆ្នាំ និងម្នាក់ទៀតអាយុ១៣ឆ្នាំ រំលោភសេពសន្ថវៈជាបន្តបន្ទាប់ ព្រមទាំងគំរាមពួកនាងថែមទៀត បើហ៊ាននិយាយ ។
តាមស្ត្រីជាម្តាយក្មេងស្រីរៀបរាប់ថា នៅព្រឹកថ្ងៃទី២៣ កញ្ញា កូនស្រីម្នាក់ អាយុ១៣ឆ្នាំ បានមកប្រាប់គាត់ថា ឪពុកចុងឈ្មោះម៉េង ហុង បានចាប់នាងរំលោភជាបន្តបន្ទាប់ចំនួន២លើក គឺនៅថ្ងៃទី២០ កញ្ញា និងថ្ងៃទី២១ កញ្ញា នៅរោងចាំចម្ការចេក ស្ថិតនៅចម្ងាយប្រហែល៦គីឡូម៉ែត្រពីផ្ទះ ។ ក្រោយពីកូនស្រីអាយុ១៣ឆ្នាំប្រាប់បែបនេះ កូនស្រីបងអាយុ១៧ឆ្នាំ ក៏ប្រាប់ពីទង្វើឪពុកចុងថាបានចាប់រំលោភនាងជាបន្តបន្ទាប់ដែរ ក្នុងរយៈពេល៨ខែមិនតិចជាង៥០ដងនោះទេ ។ ក្រោយពីរំលោភរួច ឪពុកចុងតិរច្ឆាននេះតែងតែគំរាមនាងហាមមិនឱ្យយករឿងដែលបានកើតឡើងទៅប្រាប់ម្តាយឱ្យដឹងជាដាច់ខាត បើពុំនោះទេនឹងសម្លាប់ចោល ។
ដោយសារទង្វើនេះពិតជាមិនអាចអត់ឱនបាន ស្ត្រីជាប្រពន្ធក៏ទៅប្តឹងនគរបាលប៉ុស្តិ៍រដ្ឋបាលឃុំបុសខ្នុរ ដើម្បីឱ្យជួយអន្តរាគមន៍ ហើយនៅវេលាម៉ោង៤រសៀលថ្ងៃទី២៣ កញ្ញា បុរសម្នាក់នេះក៏ត្រូវបានចាប់ខ្លួន ។ ស្ត្រីជាប្រពន្ធនិយាយថា ក្រោយពីប្តីមុនបានស្លាប់ទៅគាត់យកបុរសក្រោយនេះបាន៣ឆ្នាំហើយ ព្រមទាំងមានកូនស្រីតូចម្នាក់អាយុ១ឆ្នាំកន្លះផង ។
លោកវរសេនីយ៍ត្រី អិុត ដារ៉ា អធិការនគរបាលស្រុកចំការលើបានឱ្យដឹងដែរថា ទង្វើរបស់បុរសអគតិឈ្មោះម៉េង ហុង នេះបានបែកការណ៍ដោយសារតែការចាប់រំលោភកូនស្រីអាយុ១៣ឆ្នាំបានចំនួន២លើក ហើយកូនស្រីក៏ប្រាប់ម្តាយ ។ នៅរសៀលថ្ងៃទី២៣ កញ្ញា ក្រោយពីទទួលបានពាក្យបណ្តឹង នគរបាលប៉ុស្តិ៍រដ្ឋបាលឃុំបុសខ្នុរ ក៏បានចាប់ខ្លួនបុរសជាឪពុកចុងម្នាក់នេះ និងបានឆ្លើយសារភាពថា ខ្លួនពិតជាបានរំលោភកូនស្រីទាំង២នាក់ប្រាកដមែន ។ នៅរសៀលថ្ងៃទី២៤ កញ្ញា បុរសល្មោភកាមនេះត្រូវបានបញ្ជូនមកកាន់ស្នងការដ្ឋាននគរបាលខេត្តដើម្បីចាត់ការតាមច្បាប់ ៕
ចែករំលែកព័តមាននេះ