រាជធានីភ្នំពេញ ៖ លោកម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីបានឲ្យកោះសន្តិភាពដឹងតាមរយៈទូរស័ព្ទកាលពីថ្ងៃទី២៤ កញ្ញា ថា នៅរាជធានីភ្នំពេញកម្ពស់ទឹកទន្លេមេគង្គហាក់ឡើងយឺត និងទាបជាងឆ្នាំកន្លងទៅជាង២ម៉ែត្រ ។ លោកកត់សម្គាល់ថា ឆ្នាំកន្លងទៅ គឺនៅថ្ងៃទី២៤ កញ្ញា ឆ្នាំ២០១១ កម្ពស់ទឹកទន្លេនៅស្ថានីយចតុមុខកម្ពស់ទឹកមាន១០,៤៣ម៉ែត្រ ចំណែកនៅថ្ងៃទី២៤ កញ្ញា ឆ្នាំ២០១២នេះ ទឹកទន្លេមានកំពស់៨,៤៣ម៉ែត្រ មានន័យថា កម្ពស់ទឹកឆ្នាំនេះទាបជាងឆ្នាំទៅ២ម៉ែត្រ ។ ក៏ប៉ុន្តែ ទោះជាយ៉ាងណាកម្ពស់ទឹកទន្លេបានបន្តឡើងជារៀងរាល់ថ្ងៃ ក្នុងមួយថ្ងៃទឹកឡើង២សង្ទីម៉ែត្រ ។ ចំណែកឯទឹកដែលត្រូវស្រកទៅវិញក្នុងអំឡុងចុងខែ១០ និងដើមខែ១១ គឺចាប់ផ្តើមស្រកជាបន្តបន្ទាប់ ។ ថ្វីបើយ៉ាងនេះក្តី បញ្ហាទឹកជំនន់ទន្លេមេគង្គគេមិនអាចទស្សន៍ទាយ វាស់ស្ទង់ និងកំណត់ឲ្យបានជាក់លាក់នោះទេ ហើយក៏មិនត្រូវមើលស្រាលដែរ ។
លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមបានឲ្យដឹងទៀតថា សម្រាប់រាជធានីភ្នំពេញ កម្រិតទឹកដែលត្រូវប្រកាសអាសន្ន គឺមានកម្ពស់១០,៥០ម៉ែត្រ ។ ទោះជាកម្រិតទឹកនៅទាបក្តី តែអាជ្ញាធររាជធានីភ្នំពេញគ្រប់លំដាប់ថ្នាក់នៅតែមានការប្រុងប្រយ័ត្នខ្ពស់ក្នុងវិធានការទុកជាមុនក្នុងនោះមាន មន្ទីរធនធានទឹក និងឧតុនិយម ក៏បានត្រៀមលក្ខណៈ ដូចជា បាវ ការុង ដីខ្សាច់ គ្រឿងចក្រជាដើម ។
ហើយជាពិសេសទៅទៀតនោះ ពេលនេះមន្ទីរ ធនធានទឹក និងឧតុនិយម ដោយមានការណែនាំយ៉ាងយកចិត្តទុកដាក់ ពីលោករដ្ឋមន្ត្រីក្រសួងធនធានទឹក និងលោក កែប ជុតិមា អភិបាលរាជធានីភ្នំពេញ បានចាត់មន្ត្រីយាមកាមប្រចាំការជាប្រចាំនៅតាមទ្វារទឹកចំនួន១៣កន្លែង ដែលជាច្រកទ្វារទឹកចេញចូលពីទន្លេ ព្រែក បឹង និង ស្ទឹង ប្រឡាយ លូជាដើម នៅក្នុងខណ្ឌមានជ័យ ខណ្ឌដង្កោ ខណ្ឌសែនសុខ និងប្ញស្សីកែវ ឬតំបន់ជុំវិញរាជធានី ដើម្បីត្រៀមបិទ និងបើក ។
លោកម៉ៅ ប៊ុនធឿន បានបញ្ជាក់ថា ចំពោះជំនន់ទឹកទន្លេមេគង្គយើងហាក់មិនមានការបារម្ភនោះទេ ព្រោះយើងមានរបាំងថ្ម ដែលជាឃឿនការពារទឹកជំនន់តាមមាត់ច្រាំងទន្លេបាន គឺរាល់ឆ្នាំមិនដែលលិចដល់នោះទេ ។ ប៉ុន្តែអ្វីដែលជាក្តីបារម្ភនោះ គឺជំនន់ទឹកភ្លៀង ដែលហូរមកពីទិសខាងលិចជាតំបន់ភ្នំទៅវិញ ដែលបង្កការលិចលង់ បំផ្លាញទ្រព្យសម្បត្តិរបស់ប្រជាពលរដ្ឋ ។
ប្រធានអង្គភាពលូទឹកនៃមន្ទីរសាធារណការ និងដឹកជញ្ជូនរាជធានី លោកដួង ចន្ទសារ៉ាត បានឱ្យដឹងថា មកដល់ពេលនេះអង្គភាពបានបិទលូទឹក និងប្រព័ន្ធលូ៣កន្លែងនៅ ចតុមុខអតីតព្រះគន្លង និងគីឡូម៉ែត្រលេខ៦ ។ លោកបានកត់សម្គាល់ថា រយៈពេលដូចគ្នាកាលពីឆ្នាំទៅគ្រប់ស្ថានីយ និងប្រព័ន្ធលូនៅជាប់មាត់ទន្លេ ដែលមានជាង១០កន្លែងត្រូវបានបិទទាំងស្រុង ។
ជាការពិតណាស់ក្នុងរយៈពេលប៉ុន្មានឆ្នាំកន្លងមកនេះ បញ្ហាជំនន់ទឹកទន្លេមិនមានការយាយី និងគំរាមកំហែងដល់រាជធានីភ្នំពេញឲ្យធំដុំនោះទេ ។ ប៉ុន្តែសម្រាប់ជំនន់ទឹកភ្លៀងវិញ តែងមានការគំរាមកំហែង ជាពិសេសប្រជាពលរដ្ឋដែលរស់នៅតាមជួរសណ្តរស្ទឹងព្រែកត្នោត តែងទទួលការគំរាមកំហែងស្ទើររាល់ឆ្នាំ ហើយអជ្ញាធរក៏តែងមានការខ្វាយខ្វល់ក្នុងវិធានការទប់ស្កាត់ជារៀងរាល់ឆ្នាំ ។ ពិសេសការទប់ទំបន់ស្ទឹងព្រែកត្នោត និងទំនប់នានានៅតំបន់នោះ ។
យោងតាមព្រឹត្តិបត្រព័ត៌មាន និងព្យាករណ៍កម្ពស់ទឹកទន្លេមេគង្គរបស់នាយកដ្ឋានជលសាស្ត្រ និងការងារទន្លេ នៃក្រសួងធនធានទឹក និងឧតុនិយមថ្ងៃទី២៤ កញ្ញា បានឱ្យដឹងថា កម្ពស់ទឹកទន្លេមេគង្គដែលបានព្យាករណ៍សម្រាប់ថ្ងៃទី២៥ កញ្ញា ដល់ថ្ងៃទី២៧ កញ្ញា នៅខេត្តស្ទឹងត្រែងថ្ងៃទី២៥ កញ្ញា ៧,៣៥ម៉ែត្រ ថ្ងៃទី២៦ កញ្ញា ៧,៤៥ម៉ែត្រ និងថ្ងៃទី២៧ កញ្ញា ៧,៤០ម៉ែត្រ (ស្រកវិញ) ។ ខេត្តក្រចេះ ថ្ងៃទី២៥ កញ្ញា ១៧ម៉ែត្រ ថ្ងៃទី២៦ កញ្ញា ១៧,៤៥ម៉ែត្រ និងថ្ងៃទី២៧ កញ្ញា ១៧,៥៧ម៉ែត្រ ។ នៅខេត្តកំពង់ចាម ថ្ងៃទី២៥ កញ្ញា ១១,៩៦ម៉ែត្រ ថ្ងៃទី២៦ កញ្ញា ១២,១៤ម៉ែត្រ ។ នៅទន្លេបាសាក់ និងចតុមុខ ថ្ងៃទី២៥ កញ្ញា ៨,៤៦ម៉ែត្រ ថ្ងៃទី២៦ កញ្ញា ៨,៤៨ម៉ែត្រ និងថ្ងៃទី២៧ កញ្ញា ៨,៥៥ម៉ែត្រ ។ នៅទន្លេមេគង្គអ្នកលឿង ថ្ងៃទី២៥ កញ្ញា ៦,០៣ម៉ែត្រ ថ្ងៃទី២៦ កញ្ញា ៦,០៤ម៉ែត្រ និងថ្ងៃទី២៧ កញ្ញា ៦,០៧ម៉ែត្រ ។ នៅទន្លេបាសាក់កោះខែល ថ្ងៃទី២៥ កញ្ញា ៦,៨៨ម៉ែត្រ ថ្ងៃទី២៦ កញ្ញា ៦,៨៩ម៉ែត្រ និងថ្ងៃទី២៧ កញ្ញា ៦,៩១ម៉ែត្រ ។ នៅទន្លេសាបព្រែកក្តាម ថ្ងៃទី២៥ កញ្ញា ៧,៦១ម៉ែត្រ ថ្ងៃទី២៦ កញ្ញា ៧,៦៤ម៉ែត្រ និងថ្ងៃទី២៧ កញ្ញា ៧,៦៩ម៉ែត្រ ។
ស្ថានភាពទន្លេគឺមានសភាពឡើងចុះបន្តិចបន្តួច តែចំពោះមុខនោះទន្លេបាសាក់ និងទន្លេសាបនៅបន្តឡើងរយៈពេល៤ទៅ៥ថ្ងៃទៀត ។ កម្ពស់ទឹកនៅនឹងទន្លេសាបស្ថានីយក្រគរ កំពង់លួងមានកម្ពស់ ៧,០៣ម៉េត្រ គឺខ្ពស់ជាងថ្ងៃទី២៤ កញ្ញា ០,០២ម៉ែត្រ ។
ថ្វីបើភ្លៀងនៅតែបន្តធ្លាក់ស្ទើរគ្រប់ទិសទីទូទាំងប្រទេស ប៉ុន្តែកម្ពុជាទំនងជាបានរួចផុតពីគ្រោះទឹកជំនន់ដ៏ធ្ងន់ធ្ងរ ។ នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ។ លោកទេសរដ្ឋមន្ត្រីញឹម វណ្ណដា បានប្រាប់ឱ្យដឹងថា ស្ថានភាពអាកាសធាតុហាក់ដូចជាមានអំណោយផលល្អទៅវិញទេសម្រាប់កសិករ ។
លោកទេសរដ្ឋមន្ត្រីញឹម វណ្ណដា បានប្រាប់វិទ្យុបារាំងអន្តរជាតិផ្សាយថ្ងៃទី២៣ កញ្ញា ថា ស្ថានភាពទឹកជំនន់ជាទូទៅនៅតាមបណ្តាខេត្តភាគខាងជើង និងពាយ័ព្យប្រទេស គឺខេត្តព្រះវិហារ និងខេត្តបន្ទាយមានជ័យបានស្រកចុះវិញហើយ ។ លោកអះអាងថា បើទោះបីជានៅពេលខាងមុខនេះមានការប្រែប្រួលអាកាសធាតុខ្លះទៀតក្តី ក៏ទឹកជំនន់ទន្លេមេគង្គ និងជំនន់ទឹកភ្លៀងនឹងមិនកើតមានធំដុំដូចការព្រួយបារម្ភនោះទេ ។ ផ្ទុយទៅវិញ អាកាសធាតុបែរជាអំណោយផលល្អដល់ដំណាំកសិកម្មទៅវិញ ដោយសារតែទឹកជំនន់ពេលនេះបាននាំមកនូវដីល្បាប់ដ៏មានជីជាតិសម្រាប់ប្រជាកសិករ ។
យ៉ាងណាក៏ដោយ បើយោងតាមរបាយការណ៍របស់លោកញឹម វណ្ណដា គិតត្រឹមថ្ងៃអាទិត្យ ទី២៣ កញ្ញា មានពលរដ្ឋ៣នាក់បានស្លាប់ដោយសារទឹកជំនន់ និងមានពលរដ្ឋប្រមាណជាង៥.០០០គ្រួសារទទួលរងគ្រោះ ប៉ុន្តែពួកគាត់បានវិលត្រឡប់ទៅភូមិឋានវិញជាបណ្តើៗហើយ បន្ទាប់ពីទទួលបានអំណោយសង្គ្រោះ ។ លោកទេសរដ្ឋមន្ត្រីដែលកំពុងបន្តតាមដានស្ថានភាពទឹកជំនន់ក្នុងខេត្តព្រៃវែង ត្រូវបានដកស្រង់ប្រសាសន៍ថា គណៈកម្មាធិការជាតិគ្រប់គ្រងគ្រោះមហន្តរាយ កាកបាទក្រហម ក៏ដូចជាអាជ្ញាធរនានាកំពុងតែបន្តចែកអំណោយដល់អ្នកដែលមិនទាន់បានទទួល ដើម្បីឱ្យបានគ្រប់ៗគ្នាដោយមិនលើកលែងឡើយ ។
មានការរំពឹងទុកថា ឆ្នាំនេះនឹងមានជំនន់ធំសម្រាប់ប្រទេសកម្ពុជា ដោយយោងតាមការប្រែប្រួលអាកាសធាតុ និងតាមការចំណាំ«ឆ្នាំរោងទឹកធំ» ។ ការរំពឹងទុកបែបនេះបានធ្វើឱ្យអាជ្ញាធរបង្កើនការប្រុងប្រយ័ត្ន និងបានត្រៀមលក្ខណៈជាស្រេច ។ ក្រសួងធនធានទឹក និងឧតុនិយម បានប្រកាសជូនដំណឹងជាបន្តបន្ទាប់អំពីស្ថានភាពអាកាសធាតុ រីឯកម្លាំងប្រដាប់អាវុធក៏បានធ្វើសមយុទ្ធជាស្រេច ដើម្បីត្រៀមជួយសង្គ្រោះពេលមានទឹកជំនន់ធំ ។
យ៉ាងណាក៏ដោយ លោកទេសរដ្ឋមន្ត្រីញឹម វណ្ណដា បានអំពាវនាវដល់ប្រជាពលរដ្ឋ អាជ្ញាធរ និងក្រសួងជំនាញ ឱ្យចាត់វិធានការទប់ទឹកទុកសម្រាប់ប្រើប្រាស់ដោយមិនត្រូវបណ្តោយឱ្យទឹកហូរទៅវិញអស់ទេ ពីព្រោះរដូវវស្សាជិតកន្លងផុតទៅហើយ ។ លោកព្រមានថា បើគេមិននាំគ្នាទប់ទឹកទេ កសិករនឹងខ្វះទឹកនៅរដូវប្រាំងខាងមុខនេះ ៕
ចែករំលែកព័តមាននេះ