រាជធានីភ្នំពេញ ៖ បុរសម្នាក់បានលោតទម្លាក់ពីលើផ្ទះជាន់ទី២ ប៉ុនប៉ងសម្លាប់ខ្លួនក្រោយពីលេងល្បែងចាញ់អស់ប្រាក់ ស្រីស្នេហ៍បង្ខំរៀបការ និងឈ្លោះទាស់ទែងជាមួយប្រពន្ធ ក៏ទៅទិញស្រាផឹកឱ្យទោរទន់អង្គុយសំកុកយុងចិត្តគិតអ្វីមិនលេចក៏សម្រេចចិត្តលោតសម្លាប់ខ្លួនតែម្តង ប៉ុន្តែមិនស្លាប់នោះទេ គ្រាន់តែរងរបួសធ្ងន់ត្រូវបានគេបញ្ជូនទៅសង្គ្រោះនៅមន្ទីរពេទ្យកាល់ម៉ែត ។
ហេតុការណ៍លោតពីលើផ្ទះសម្លាប់ខ្លួននេះ បានកើតឡើងកាលពីវេលាម៉ោង៥និង១០នាទីល្ងាចថ្ងៃទី២៤ កញ្ញា ២០១២ ស្ថិតនៅផ្ទះលេខ37E2z ជាន់ទី២ ផ្លូវលេខ២១៧ សង្កាត់មនោរម្យ ខណ្ឌ៧មករា បង្កឱ្យមានការភ្ញាក់ផ្អើលដល់មនុស្សម្នាទៅចោមរោមមើលអ៊ូអរផងដែរ ។ បុរសរងគ្រោះឈ្មោះអីុ សំបូរ ហៅឆ្លូញ អាយុ៣៧ឆ្នាំ ជាមនុស្សចូលចិត្តលេងល្បែងចាក់ភ្នាល់បាល់ និងល្បែងនៅកាស៊ីណូ ។
តាមប្រភពពីអ្នកស្គាល់ជនរងគ្រោះបានឱ្យដឹងថា លោកសំបូរ ហៅឆ្លូញ ជាមនុស្សចូលចិត្តលេងល្បែងអបាយមុខ ដូចជា បៀ កន្ទុយលេខ (ឆ្នោត) ចាក់ភ្នាល់បាល់ និងលេងល្បែងនៅកាស៊ីណូ ។ មុនពេលកើតហេតុលោកសំបូរបានចាញ់ល្បែងអស់ប្រាក់រលីងពីខ្លួន ពេលចូលផ្ទះក៏កើតជម្លោះឈ្លោះប្រកែកជាមួយប្រពន្ធស្ទើរបែកផ្សែង ហើយត្រូវប្រពន្ធស្តីបន្ទោសពីរឿងលេងល្បែង…មិនតែប៉ុណ្ណោះទៅលួចមានស្រីស្នេហ៍យូរខែ យូរឆ្នាំ ហើយត្រូវស្រីស្នេហ៍បង្ខំឱ្យរៀបការជមួយចេញមុខចេញមាត់ក៏យុងចិត្តងើបមុខមិនរួច ទិញស្រាផឹកកាត់សាញ ។
ពេលផឹកទោរទន់ស្ពឹកមុខ លែងខ្វល់អ្វីជាសំខាន់ សូម្បីជីវិតក៏លែងគិត ហើយមោហ៍បាំងងប់ងល់ចង់តែស្លាប់ក៏ងើបដើរមកយ៉ខាងមុខ ហើយលោតចុះទៅក្រោមតែម្តង ប៉ុន្តែពេលនោះបានសំយាបដំបូលផ្ទះជាន់ផ្ទាល់ដីជួយទ្រមួយគន្លាក់ ទើបធ្លាក់មកដល់ដីធ្វើឱ្យការបោកផ្ទប់ហាក់ស្រាលបន្តិច ទើបមិនស្លាប់គ្រា់នតែរងរបួសធ្ងន់ ៕
ចែករំលែកព័តមាននេះ