ខេត្តព្រះសីហនុ ៖ ស្ត្រីម្នាក់បានលោតចេញពីក្នុងរថយន្តដែលកំពុងបើកបរបណ្តាលឱ្យរងរបួសជាទម្ងន់ ហើយបានស្លាប់ពេលបញ្ជូនដល់គ្លីនិកមួយកន្លែងនៅក្បែរទីប្រជុំជនផ្សារវាលរេញ ដែលការលោតសម្លាប់ខ្លួននេះត្រូវបានប្រភពព័ត៌មានរាយការណ៍ឱ្យដឹងថា គឺបណ្តាលមកពីរឿងប្រេះឆាស្នេហាជាមួយអ្នកបើកបររថយន្តខាងលើ ។ ហេតុការណ៍នេះបានកើតឡើងកាលពីថ្ងៃទី២២ កញ្ញា វេលាម៉ោង៨យប់ នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៩៨-១៩៩ ស្ថិតក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
ទាក់ទិនព័ត៌មាននេះតាមមន្ត្រីប៉ូលិសចរាចរស្រុកព្រៃនប់បានឱ្យដឹងថា ស្ត្រីដែលស្លាប់ឈ្មោះសុខ ស្រីមុំ អាយុ២៤ឆ្នាំ មានស្រុកកំណើតខេត្តកំពង់ចាម មកស្នាក់នៅភូមិថ្មី សង្កាត់លេខ៣ ក្រុងព្រះសីហនុ បានលោតចេញពីក្នុងកាប៊ីនរថយន្តមួយគ្រឿងម៉ាកហ៊្វុយស្សូ៊ពណ៌ក្រហមផ្ទុកកុងតឺន័រមានទិសដៅពីខេត្តព្រះសីហនុទៅភ្នំពេញបើកបរដោយឈ្មោះឆុំ ប៊ុនឈឿន ភេទប្រុស អាយុ២៩ឆ្នាំ មានទីលំនៅភូមិទូលទទឹង២ ឃុំទូលទទឹង ស្រុកព្រៃនប់ ខេត្តព្រះសីហនុ ។ តាមឈ្មោះឆុំ ប៊ុនឈឿនដែលជាអ្នកបើកបររថយន្តខាងលើបានប្រាប់ប៉ូលិសថា ស្ត្រីរងគ្រោះនិងខ្លួនធ្លាប់បានស្គាល់ទំនាក់ទំនងគ្នាមានរយៈពេលប្រមាណជាងមួយឆ្នាំមកហើយ មុនពេលកើតហេតុខ្លួនបានបើករថយន្តចេញពីផែខេត្តព្រះសីហនុឆ្ពោះទៅភ្នំពេញ ពេលនោះរូបនាងបានសុំធ្វើដំណើរទៅជាមួយខ្លួនដែរ តែសុំទៅចុះត្រឹមផ្លូវបំបែកអូរចំណារ ខ្លួនក៏យល់ព្រមឱ្យជិះ ។
ពេលបើករថយន្តចេញមកមានគ្នា៣នាក់គឺមាននាង ខ្លួននិងព្រូឡាន នាងអង្គុយខាងក្រោយ ព្រូអង្គុយកៅអីខាងមុខ ពេលចេញពីទីរួមខេត្តបានបន្តិចដល់មុខផ្សារស្មាច់ដែងនាងបានសួរខ្លួនថា បងស្រឡាញ់ខ្ញុំអត់ ខ្លួនក៏ឆ្លើយវិញថា ស្រឡាញ់ គឺស្រឡាញ់ដូចមុនអីុចឹងម្តេចសូរដូច្នេះ តែប៉ុណ្ណឹងក៏ឈប់និយាយទាំងអស់គ្នា ។ រហូតមកដល់ចំណុចស្ពានទឹកសាប នាងបានត្អូញត្អែរថាឈឺក្បាលណាស់សុំដូរឱ្យព្រូឡានជិះក្រោយ នាងសុំជិះកៅអីមុខវិញ ពេលនោះនាងក៏មកអង្គុយមុខលុះមកដល់ចំណុចកើតហេតុស្របពេលដែលខ្លួនកំពុងតែបើកបរ រូបនាងបានបើកទ្វាររថយន្តលោតចុះតែម្តង ធ្វើឱ្យភ័យស្រឡាំងកាំងក៏ឈប់រថយន្តមើលឃើញនាងរងរបួសក៏ជួយយកនាងទៅមន្ទីរពេទ្យ បន្ទាប់មកខ្លួនក៏ត្រូវសមត្ថកិច្ចឃាត់ខ្លួនតែម្តង ។
នេះជារឿងមួយដែលមិនគួរឱ្យកើតមានសម្រាប់អ្នកបើកបរឱ្យក្រុមហ៊ុនសោះ ទោះបីជារឿងនេះស្ត្រីរងគ្រោះបានលោតចេញពីរថយន្តដោយខ្លួនឯងយ៉ាងណាក្តី ក៏ជាមូលហេតុពាក់ព័ន្ធដល់ក្រុមហ៊ុនដែលជាម្ចាស់កម្មសិទ្ធិរថយន្ត តែងតែហាមមិនឱ្យអ្នកបើកបររថយន្តដាក់ស្រីស្នេហ៍ ឬឈប់ដាក់មនុស្សតាមផ្លូវជាដាច់ខាត ៕
ចែករំលែកព័តមាននេះ