រាជធានីភ្នំពេញ ៖ គណៈប្រតិភូប៊ែលធី ដឹកនាំដោយលោកលី ឆេង អគ្គនាយកប៊ែលធី គ្រុប និងជាសាកលវិទ្យាធិការសាកលវិទ្យាល័យ ប៊ែលធីអន្តរជាតិ បានត្រឡប់មកពីចូលរួមទិវាជួបជុំយុវជនអាស៊ានលើកទី១៨ (The 18th ASEAN Youth Day Meeting) និងកម្មវិធីពានរង្វាន់អាស៊ានតាយូលើកទី៧ (7th TAYO ASEAN Award)នៅទីក្រុងបាងកក ប្រទេសថៃ រយៈពេល៥
រាជធានីភ្នំពេញ ៖ គណៈប្រតិភូប៊ែលធី ដឹកនាំដោយលោកលី ឆេង អគ្គនាយកប៊ែលធី គ្រុប និងជាសាកលវិទ្យាធិការសាកលវិទ្យាល័យ ប៊ែលធីអន្តរជាតិ បានត្រឡប់មកពីចូលរួមទិវាជួបជុំយុវជនអាស៊ានលើកទី១៨ (The 18th ASEAN Youth Day Meeting) និងកម្មវិធីពានរង្វាន់អាស៊ានតាយូលើកទី៧ (7th TAYO ASEAN Award)នៅទីក្រុងបាងកក ប្រទេសថៃ រយៈពេល៥ថ្ងៃចាប់ពីថ្ងៃទី១៧ កញ្ញា ដល់ថ្ងៃទី២១ កញ្ញា ឆ្នាំ២០១២ ដែលរៀបចំឡើងដោយគណៈកម្មាធិការយុវជនអាស៊ានដែលប្រទេសថៃធើ្វជាម្ចាស់ផ្ទះដើម្បីប្រគល់ពានរង្វាន់ជូនអង្គភាពឆ្នើមចំនួន១០អង្គភាព និងយុវជនឆ្នើមចំនួន១០នាក់ មកពីបណ្តាប្រទេសអាស៊ានទំាង១0 ព្រមទំាងមានការចូលរួមពីមន្រ្តីជាន់ខ្ពស់រាជរដ្ឋាភិបាលថៃ និងយុវជនថៃរាប់ពាន់នាក់ ក្រោមអធិបតីភាពដ៏ខ្ពង់ខ្ពស់របស់លោក យ៉ុង យ៉ុត វិឆៃឌីត ឧបនាយករដ្ឋមន្រ្តី នៃព្រះរាជាណាចក្រ ថៃ ។
ថ្លែងនៅឯព្រលានយន្ដហោះអន្តរជាតិភ្នំពេញ លោក លី ឆេង បានមានប្រសាសន៍ថា ការផ្តល់ពានរង្វាន់នេះ ធ្វើឡើងដោយលក្ខណៈវិនិច្ឆ័យ២ គឺទី១.ជួយកិច្ចការសង្គមដូចជាកាកបាទក្រហម ការបរិច្ចាគឈាម សាងសង់វត្តអារាម សាលារៀន ស្ពាន ថ្នល់ ជួយឧបត្ថម្ភដល់កងទ័ពនៅតាមព្រំដែន (ព្រះវិហារ) ជួយឧបត្ថម្ភមូលនិធិផ្សេងៗទាំងថវិកា និងស្មារតី ព្រមទាំងជួយដល់ជនក្រីក្រ ។ ទី២.ជួយផ្នែកយុវជន រួមមានការបណ្តុះបណ្តាលធនធានមនុស្ស មានពីបឋមសិក្សា មធ្យមសិក្សា ឧត្តមសិក្សា និងក្រោយឧត្តមសិក្សា ។ ការអប់រំសីលធម៌រស់នៅ ឱ្យយល់ដឹងពីច្បាប់ចរាចរណ៍ ជំងឺអេសដ៍គ្រោះថ្នាក់គ្រឿងញៀន ច្បាប់ប្រឆាំងអំពើពុករលួយ បរិស្ថាន ទីក្រុងស្អាត និងឆ្នេរសមុទ្រ ស្អាត ។
កិច្ចការជាអន្តរជាតិ បញ្ជូនយុវជនកម្ពុជាទៅបោះជំរំជាអន្តរជាតិ ចូលរួមកម្មវិធីអង្គការនានាជាអន្តរជាតិ និងចូលរួមសិក្ខាសាលាផ្សេងៗនៅក្រៅប្រទេស ។ ការផ្តល់ការងារជូនយុវជនទៅតាមកម្រិតចំណេះដឹងរបស់ពួកគេ ក្នុងនោះ ប៊ែលធីគ្រុប បានផ្តល់ការងារដល់យុវជនចំនួនជាង១.៥០០នាក់ រួមមាន ផ្នែកសំណង់ ជាង២០០នាក់ វិទ្យាស្ថានជាង១.១០០នាក់ និងសាកលវិទ្យាល័យជាង២០០នាក់ ។
លោកបានបន្តទៀតថា ពានរង្វាន់អង្គភាពឆ្នើមដែលប៊ែលធីគ្រុបទទួលបានក្នុងពេលនេះ គឺបានមកពីការខិតខំប្រឹងប្រែងរបស់ថ្នាក់ដឹកនំា លោកគ្រូ អ្នកគ្រូ និងបុគ្គលិកប៊ែលធីទាំងអស់ក្នុងការបំពេញកិច្ចការរបស់ខ្លួន ដែលធ្វើឱ្យប៊ែលធីមានការរីកចម្រើនឥតឈប់ឈរ ។ ពេលនោះលោកក៏បានទទួលពានរង្វាន់អង្គភាពឆ្នើម និងលោក ចាន់ សុផល ប្រធានសមាគមយុវជននាវាអាស៊ាន ក៏ទទួលបានពានរង្វាន់យុវជនឆ្នើម ដែលប្រគល់ដោយលោកឧបនាយករដ្ឋមន្រ្តីថៃ ផងដែរ ។ លោកបញ្ជាក់ថា ពានរង្វាន់អង្គភាពឆ្នើមនេះ មិនមែនត្រឹមតែជាកិត្តិយសរបស់ប៊ែលធីប៉ុណ្ណោះទេ ប៉ុន្តែជាកិត្តិយសរបស់ជាតិ និងប្រជាជនកម្ពុជាទំាងមូល ។ ទន្ទឹមនោះ ការរីកចម្រើនលើគ្រប់វិស័យដូចសព្វថ្ងៃនេះ គឺដោយសារមានគោលនយោបាយដឹកនាំដ៏ត្រឹមត្រូវប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលតែងតែជំរុញឱ្យអង្គភាពទាំងអស់ធ្វើការប្រកួតប្រជែង ដើម្បីអភិវឌ្ឍសង្គមឱ្យដើរទាន់ចលនាសាកលភាវូបនីយកម្ម ។
លោកអគ្គនាយកប៊ែលធីគ្រុបក៏បានថ្លែងអំណរគុណចំពោះរដ្ឋមន្រ្តី និងថ្នាក់ដឹកនំាក្រសួងអប់រំទាំងអស់ដែលបានផ្តល់ឱកាស និងជ្រើសរើសប៊ែលធីឱ្យទៅចូលរួមប្រកួតប្រជែងក្នុងកម្មវិធីពានរង្វាន់អង្គភាពឆ្នើមនេះ ៕
ចែករំលែកព័តមាននេះ