ខេត្តព្រៃវែង ៖ នៅវេលាម៉ោង១០ព្រឹក ថ្ងៃទី២២ កញ្ញា កម្លាំងនគរបាលមួយក្រុមដឹកនាំដោយលោកវរសេនីយ៍ត្រី ចាន់ ណារិទ្ធ អធិការនគរបាលក្រុងព្រៃវែង បានចុះបង្រ្កាបមេខ្លោងជួញដូរគ្រឿងញៀនដ៏ធំមួយដែលលាក់ខ្លួននៅក្នុងបន្ទប់ផ្ទះសំណាក់យីហោកូននាគ មានទីតាំងស្ថិតក្នុងភូមិ២ សង្កាត់កំពង់លាវ ក្រុងព្រៃវែង ។
ខេត្តព្រៃវែង ៖ នៅវេលាម៉ោង១០ព្រឹក ថ្ងៃទី២២ កញ្ញា កម្លាំងនគរបាលមួយក្រុមដឹកនាំដោយលោកវរសេនីយ៍ត្រី ចាន់ ណារិទ្ធ អធិការនគរបាលក្រុងព្រៃវែង បានចុះបង្រ្កាបមេខ្លោងជួញដូរគ្រឿងញៀនដ៏ធំមួយដែលលាក់ខ្លួននៅក្នុងបន្ទប់ផ្ទះសំណាក់យីហោកូននាគ មានទីតាំងស្ថិតក្នុងភូមិ២ សង្កាត់កំពង់លាវ ក្រុងព្រៃវែង ។
ប្រតិបត្តិការឡោមពទ្ធ័បង្រ្កាបបទល្មើសគ្រឿងញៀននៅកណ្តាលក្រុងព្រៃវែងនេះ បានធ្វើឱ្យប្រជាពលរដ្ឋនៅក្នុងក្រុង មានការភ្ញាក់ផ្អើល និងនាំគ្នាមកចោមរោមមើលយ៉ាងកកកុញនៅតាមដងផ្លូវខាងមុខផ្ទះសំណាក់ ។ នៅក្នុងកិច្ចប្រតិបត្តិការបង្រ្កាបដ៏ធំនេះដែរ សមត្ថកិច្ចដកហូតបានថ្នាំញៀនប្រភេទម៉ាទឹកកកចំនួន ២៣កញ្ចប់ ថ្នាំពេទ្យ១កញ្ចប់ ទូរស័ព្ទដៃ១គ្រឿង កាបូបលុយ១ ឧបករណ៍ជក់ថ្នាំញៀនមួយចំនួនធំ និងឃាត់ខ្លួនមេខ្លោងជួញគ្រឿងញៀនម្នាក់ ។
លោកវរសេនីយ៍ត្រី ចាន់ ណារិទ្ធ បានឱ្យដឹងថា ការបើកប្រតិបត្តិការបង្រ្កាបមេខ្លោងដ៏ធំនេះធ្វើឡើងបន្ទាប់ពីកម្លាំងរបស់លោកតាមដានអស់រយៈពេលជាច្រើនថ្ងៃមកហើយ ហើយនៅមុនពេលចុះបង្រ្កាបមេខ្លោងធំម្នាក់នេះ គឺកម្លាំងនគរបាលក្រុងព្រៃវែងបានឃាត់ខ្លួនមុខសញ្ញាចែកចាយគ្រឿងញៀនម្នាក់ឈ្មោះ រ៉ា ឧត្តម អាយុ២៤ឆ្នាំ នៅទំនប់ក្រវាត់ក្រុង កាលពីវេលាម៉ោង៩យប់ថ្ងៃទី២១ កញ្ញា ដោយដកហូតបានថ្នាំញៀនប្រភេទម៉ាទឹកកកចំនួន២កញ្ចប់តូច។ តាមរយៈជនសង្ស័យដែលឃាត់ខ្លួនបាននេះ ក៏ឈានទៅដល់ការបង្រ្កាបមេខ្លោងធំនៅព្រឹកថ្ងៃបន្ទាប់តែម្តង ។
លោកអធិការបានបន្តទៀតថា មេខ្លោងជួញគ្រឿងញៀនដ៏ធំនេះឈ្មោះហៀង គឹមឡេង ភេទប្រុស អាយុ៣២ឆ្នាំ មានទីលំនៅក្នុងភូមិចំពុះក្អែក ឃុំព្រែកថ្មី ស្រុកកៀនស្វាយ ខេត្តកណ្តាល ត្រូវបានចាប់ខ្លួននៅក្នុងបន្ទប់លេខ៨៨ នៃផ្ទះសំណាក់កូននាគ រួមជាមួយវត្ថុតាងដែលដកហូតបានខាងលើ។ បន្ទាប់ពីឃាត់ខ្លួន ជនសង្ស័យទាំង២នាក់នេះត្រូវបានសមត្ថកិច្ចអធិការដ្នាននគរបាលក្រុងព្រៃវែង កសាងសំណុំរឿងបញ្ជូនខ្លួនទៅកាន់ស្នងការដ្នាននគរបាលខេត្ត នៅរសៀលថ្ងៃដដែលនោះតែម្តង ដើម្បីចាត់ការបន្តទៅតាមនីតិវិធីច្បាប់ ។ ដោយឡែកម្ចាស់ផ្ទះសំណាក់កូននាគក៏ត្រូវបានឃាត់ខ្លួនបញ្ជូនទៅកាន់សាលាដំបូងខេត្តដែរ ដោយជាប់ចោទប្រកាន់ពីបទផ្តល់ទីតាំងប្រព្រឹត្តបទល្មើស ហើយផ្ទះសំណាក់នេះត្រូវបានបិទទ្វារលែងឱ្យបើកទទួលភ្ញៀវផងដែរ ។
ប្រភពព័ត៌មានពីសមត្ថកិច្ចដដែលនេះបានឱ្យដឹងទៀតថា នេះគឺជាលើកទី៦ហើយដែលកម្លាំងអធិការដ្ឋាននគរបាលក្រុងព្រៃវែង បានបង្រ្កាបបទល្មើសជួញដូរគ្រឿងញៀននៅក្នុងក្រុងព្រៃវែង ហើយករណីទី៦នេះគឺជាការបង្រ្កាបដែលមានទ្រង់ទ្រាយធំលើកទី២ហើយ ក្នុងភូមិសាស្រ្តក្រុងព្រៃវែង។ សរុបលទ្ធផលនៃការបង្រ្កាបទាំង៦ករណីខាងលើនេះ សមត្ថកិច្ចដកហូតបានវត្ថុតាងមានថ្នាំញៀនចំនួន៦០កញ្ចប់ ទូរសព្ទ័ដៃ២គ្រឿង ម៉ូតូ១គ្រឿង រថយន្តសុីអវី(CR-V)១គ្រឿង ប្រាក់៦១៥.០០០រៀល ឧបករណ៍សម្រាប់ជក់ថ្នាំញៀនមួយចំនួនធំ និងឃាត់ខ្លួនជនសង្ស័យបានចំនួន១១នាក់ ក្នុងនោះស្រី្ត៣នាក់ ៕
ចែករំលែកព័តមាននេះ