ខេត្តតាកែវ ៖ បុរសម្នាក់បានប្រកាច់ស្លាប់ភ្លាមៗនៅនឹងកន្លែងកើតហេតុ ខណៈពេលអង្គុយស៊ីផឹកជាមួយគ្នាយ៉ាងល្អូកល្អឺន និងនិយាយលេងសើចជ្រុលហួសក៏មានការប្រកាន់គ្នាទៅវិញទៅមក ហើយជនដៃដល់ជាភាគីម្ខាងទៀតបានយកគល់ឈើវាយសំពងទៅលើផ្ទៃមុខ ។ ហេតុការណ៍វាយសម្លាប់គ្នាពេលកំពុងស៊ីផឹកនេះ បានកើតឡើងកាលពីថ្ងៃទី២២ កញ្ញា វេលាម៉ោង១១និង១៥នាទីយប់ នៅភូមិក្រាំងលាវ ឃុំរវៀង ស្រុកសំរោង ហើយក្រោយពីវាយជនរងគ្រោះស្លាប់ ជនដៃដល់ក៏បានរត់គេចខ្លួនបាត់ដែរ ។
លោកអនុសេនីយ៍ទោ ស តារា នាយប៉ុស្តិ៍នគរបាលរដ្ឋបាលឃុំរវៀងបានឱ្យដឹងថា ចំពោះករណីនេះគឺលោកទទួលបានព័ត៌មាននៅវេលាម៉ោង១រំលងអធ្រាត្រឈានចូលថ្ងៃទី២៣ កញ្ញា ទៅហើយដែលពេលទទួលបានដំណឹងភ្លាមលោកក៏បានរាយការណ៍បន្តជូនលោកអធិការស្រុករួចដាក់កម្លាំងចុះទៅដល់កន្លែងកើតហេតុភ្លាមៗដែរ ។ នៅពេលទៅដល់ជនរងគ្រោះបានស្លាប់បាត់ទៅហើយ ឯជនដៃដល់រត់បាត់ទៀត ទើបចាត់កម្លាំងមួយផ្នែកឱ្យយាមកន្លែងកើតហេតុ និងមួយផ្នែកទៀតតាមរុករកជនដៃដល់ក្រែងនៅលាក់ខ្លួនក្បែរៗនោះ រហូតដល់ព្រឹកទើបមាននគរបាលបច្ចេកទេសនៃស្នងការដ្ឋានខេត្តចុះទៅពិនិត្យ ។
លោកវរសេនីយ៍ត្រីមឿង សារុន អធិការនគរបាលស្រុកសំរោងឱ្យដឹងថា ជនរងគ្រោះដែលស្លាប់ឈ្មោះជា យ៉េ អាយុ៤៣ឆ្នាំ ជាបុរសពោះម៉ាយ មានកូន៤នាក់ ត្រូវជនដៃដល់យកគល់ឈើវាយត្រូវក្តោងច្រមុះបាក់ខ្ទេច ចង្កា និងថ្ពាល់ខាងឆ្វេងផុងចូលទៅក្នុងចេញឈាមតាមច្រមុះ និងត្រចៀក ស្លាប់ក្បែរកាំជណ្តើរផ្ទះរបស់ជនដៃដល់ ។ ចំណែកជនដៃដល់ឈ្មោះទួន រ៉ាហួហៅប្រុស ភេទប្រុស អាយុ២០ឆ្នាំ ។ តាមការកត់សម្គាល់ ជនដៃដល់ឱ្យតែមានការស៊ីផឹកស្រវឹងតែងតែរករឿងបងប្អូននិងម្តាយជាប់ជានិច្ច ។
លោកអធិការនគរបាលស្រុកបានបន្តទៀតថា មុនពេលកើតហេតុជនដៃដល់និងជនរងគ្រោះបានអង្គុយផឹកស្រាជាមួយគ្នានៅតូបខាងលិចផ្ទះជនរងគ្រោះតាំងពីព្រលប់ លុះរហូតដល់ម៉ោង៩យប់ពួកគេក៏បបួលគ្នាមកផឹកបន្តនៅផ្ទះជនដៃដល់(កន្លែងកើតហេតុ)ទៀត ។ នៅពេលមកដល់ផ្ទះ ជនដៃដល់បានចាប់មេមាន់មួយក្បាលឱ្យបងថ្លៃប្រុសធ្វើម្ហូបក្លែម និងបានផឹកស្រាបន្តអស់មួយលីត្រកន្លះទៀត ។ ពេលផឹកស្រវឹងរៀងៗខ្លួននោះ ជនដៃដល់ក៏បានចាប់ឱបថើបជនរងគ្រោះបណ្តាលឱ្យធ្លាក់ពីលើគ្រែដល់ដី ធ្វើឱ្យមានការខឹងសម្បានឹងគ្នារហូតជនដៃដល់ទៅយកកាំបិតមកចង់អារ.កជនរងគ្រោះម្តងហើយ តែត្រូវបានគេជួយឃាត់ទាន់ក៏ស្ងាត់ទៅវិញ ។ ពេលនោះជនរងគ្រោះអត់ទៅណាទេគឺអង្គុយនៅកន្លែងកើតហេតុនោះ ឯក្រុមគ្រួសារដោយខ្លាចឈ្មោះទួន រ៉ាហួ ប៉ងសម្លាប់ជនរងគ្រោះម្តងទៀតក៏បានចាប់ចងទុកនៅក្រោមផ្ទះ។
បើតាមស្ត្រីឈ្មោះទួន ស្រីទូច អាយុ២៣ឆ្នាំ ជាបងស្រីបង្កើតរបស់ជនដៃដល់និយាយរៀបរាប់ថា ម្តាយនាងឈ្មោះជឹម ផាន់ អាយុ៥៧ឆ្នាំ ជាស្ត្រីមេម៉ាយមានកូន១០នាក់ ឯជនដៃដល់ជាកូនទី៧ ។ នាងជាកម្មកររោងចក្រកាត់ដេរនៅភ្នំពេញ លុះនៅថ្ងៃសៅរ៍នាងនិងប្តីបានមកលេងផ្ទះ ស្រាប់តែយប់ឡើងកើតមានរឿងបែបនេះតែម្តង ។ ពេលចាប់ចងប្អូនប្រុសនោះមិនដឹងថា ហេតុអ្វីបានជាប្អូនដែលស្រវឹងនោះរួចពីចំណងទេ តែក៏មិនទាន់មានបញ្ហាអ្វីដែរ ។ ពេលរួចពីចំណងប្អូនប្រុសនាងបានទៅដេកលើអង្រឹង ចំណែកជនរងគ្រោះដោយសារស្រវឹងត្រឡប់ទៅផ្ទះមិនរួចក៏អង្គុយឡូឡាម្នាក់ឯងធ្វើឱ្យប្អូនប្រុសអត់ទ្រាំមិនបានក៏កាន់ញញួរចេញមកគប់ជញ្ជាំងផ្ទះហើយស្រែកចោទថាឈ្មោះយ៉េ លួចសហាយស្មន់ជាមួយម្តាយរបស់ខ្លួនត្រូវតែសម្លាប់ចោល ។ ពេលស្រែករួចក៏ស្ទុះទៅលើកគល់ឈើប៉ុនកំភួនជើងនៅខាងកើតកាំជណ្តើរវាយជនរងគ្រោះរហូតដល់ស្លាប់ ។
នៅព្រឹកថ្ងៃទី២៣ កញ្ញា នគរបាលបច្ចេកទេសបានមកពិនិត្យធ្វើកោសល្យវិច័យសពដោយមានការចូលរួមពីមេភូមិ មេឃុំ និងគ្រូពេទ្យផងហើយជាលទ្ធផលឃើញថា ជនរងគ្រោះត្រូវជនដៃដល់វាយចំក្តោងច្រមុះបាក់ខ្ទេច ចង្កាបាក់ និងឆ្អឹងថ្ពាល់ខាងឆ្វេងបាក់ដល់ថ្គាម ។ ពេលពិនិត្យរួច សពត្រូវបានប្រគល់ទៅឱ្យក្រុមគ្រួសារធ្វើបុណ្យតាមប្រពៃណី ឯជនដៃដល់ជាឃាតករ ប៉ូលិសកំពុងស្រាវជ្រាវដើម្បីចាប់ខ្លួន ៕
ចែករំលែកព័តមាននេះ