ខេត្តកំពង់ឆ្នាំង ៖ ជនសង្ស័យម្នាក់បានស្លា.ប់នៅនឹងកន្លែងដោយស្នាដៃបក្សពួកម្នាក់បា.ញ់ច្រឡំក្នុងសកម្មភាពប្លន់ទូកដឹកត្រីជនជាតិវៀតណាមមួយកាលពីវេលាម៉ោង១២ និង៤៥នាទីរំលងអធ្រាត្រឈានចូលថ្ងៃទី២៣ កញ្ញា នៅតាមដងទន្លេចំណុចព្រែកសេះ ស្ថិតក្នុងភូមិឫស្សីដង្កួច ឃុំជលសារ ស្រុកជលគិរី ។
ខេត្តកំពង់ឆ្នាំង ៖ ជនសង្ស័យម្នាក់បានស្លាប់នៅនឹងកន្លែងដោយស្នាដៃបក្សពួកម្នាក់បាញ់ច្រឡំក្នុងសកម្មភាពប្លន់ទូកដឹកត្រីជនជាតិវៀតណាមមួយកាលពីវេលាម៉ោង១២ និង៤៥នាទីរំលងអធ្រាត្រឈានចូលថ្ងៃទី២៣ កញ្ញា នៅតាមដងទន្លេចំណុចព្រែកសេះ ស្ថិតក្នុងភូមិឫស្សីដង្កួច ឃុំជលសារ ស្រុកជលគិរី ។
ហេតុការណ៍ប្លន់ទូកដឹកត្រីនោះ ម្ចាស់ទូកក៏បានរងរបួសដែរដោយត្រូវក្រុមចោរចាក់មួយច្បូកមុខ៤ ហើយទូកដឹកត្រីដែលប្លន់បាននោះត្រូវក្រុមចោរបើកដឹកសពបក្សពួករបស់ខ្លួនទៅប្លុងចោលនៅដៃទន្លេសាប ក្នុងឃុំព្រែកតាទែន ស្រុកពញាឮ ខេត្តកណ្តាល ។
តាមការរៀបរាប់របស់ជនរងគ្រោះជាជនជាតិវៀតណាមឈ្មោះហ្វៀង យ៉ាំងយ៉ុង អាយុ៣៣ឆ្នាំ ស្នាក់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ដែលត្រូវក្រុមចោរចាក់មួយច្បូកបណ្តាលឱ្យរងរបួស និងកំពុងសម្រាកព្យាបាលនៅមន្ទីរពេទ្យ បាននិយាយថា គាត់បានបើកកាណូតដឹកត្រីពីភូមិពាមឆ្កោកយកទៅលក់នៅស្រុកជលគិរីជារៀងរាល់ថ្ងៃ ។ នៅថ្ងៃកើតហេតុ គាត់បានដឹកត្រីចំនួន៤០០គីឡូក្រាម ក្នុងនោះមានត្រីឆ្កោកចំនួន៣៥០គីឡូក្រាម និងត្រីគ្រុំចំនួន៥០គីឡូក្រាម ជាមួយប្អូនប្រុសគាត់ម្នាក់ទៀតឈ្មោះង្វៀង យ៉ាំងម៉ក អាយុ១៩ឆ្នាំ ។ បុរសវៀតណាមរូបនោះបានបន្តថា នៅពេលមកដល់ចំណុចព្រែកសេះ ស្រាប់តែមានកាណូតមួយគ្រឿងមានគ្នា២នាក់ចាំស្កាត់ផ្លូវជាស្រេចបានយកច្បូកមុខ៤ចាក់ចំឆ្អឹងជំនីរខាងស្តាំគាត់មួយច្បូកបណ្តាលឱ្យរបួស ។ ពេលនោះដោយសារកាណូតមានល្បឿនលឿន ប្អូនប្រុសគាត់បានបត់កាណូតវិលក្បាលមកក្រោយវិញ រួចបើកបំបុកកាណូតចោរនោះបណ្តាលឱ្យលិចតែម្តង ។
ភ្លាមនោះ ចោរម្នាក់បានហក់ឡើងកាណូតដឹកត្រីគាត់ទាន់ ឯម្នាក់ទៀតធ្លាក់ទឹក ហើយបានស្រវាឡើងកាណូតដឹកត្រីដែរ តែបក្សពួកម្នាក់ដែលឡើងលើកាណូតមុនច្រឡំស្មានថា ជាក្រុមគាត់២នាក់បងប្អូន ក៏បាញ់បណ្តាលឱ្យស្លាប់ភ្លាមតែម្តង ។ ក្រោយមករូបគាត់២នាក់បងប្អូនបានហែលឡើងគោក ហើយជួលកាណូតគេដឹកគ្នាមកកាន់មន្ទីរពេទ្យ ចំណែកកាណូតដឹកត្រីរបស់គាត់ត្រូវបានចោរម្នាក់នោះបើកដឹកសពបក្សពួកយកទៅប្លុងចោលនៅឯស្រុកពញាឮ ខេត្តកណ្តាល ។ បុរសរូបនោះបានបន្តថា គាត់ស្គាល់ក្រុមចោរទាំង២នាក់នោះ ម្នាក់ឈ្មោះញឿង និងម្នាក់ដែលស្លាប់ឈ្មោះយ៉ុង ជនជាតិវៀតណាមទាំង២នាក់ ។
លោកជឹម ប៊ុនធឿន នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ឆ្នាំង ដែលបានទៅស្រាវជ្រាវក្នុងរឿងនេះដល់ស្រុកពញាឮ ខេត្តកណ្តាល បានឱ្យដឹងថា សពជនសង្ស័យត្រូវគ្រាប់កាំភ្លើងមួយគ្រាប់ចំចុងដង្ហើម គឺចម្ងាយពីចុងដោះខាងឆ្វេងប្រមាណ១០សង់ទីម៉ែត្រ និងពីចុងដោះខាងស្តាំប្រមាណ១១សង់ទីម៉ែត្រ ។
តាមព័ត៌មានចុងក្រោយឱ្យដឹងថា ករណីខាងលើមិនមែនជារឿងប្លន់ទេ គឺជារឿងគំនុំដែលពេលនេះសមត្ថកិច្ចកំពុងតាមប្រមាញ់បក្សពួកជនដៃដល់ដែលរត់គេចខ្លួន ៕
ចែករំលែកព័តមាននេះ