រាជ​ធានី​ភ្នំពេញ ៖  បន្ទាប់​ពី​បាន​អញ្ជើញ​ចាក​ចេញ​ពី​ប្រទេស​កម្ពុជា​កាល​ពី​ព្រឹក​ថ្ងៃ​ទី​២២កញ្ញា ម្សិល​មិញ​នោះរួចមក នៅព្រឹក​ថ្ងៃទី​២៣ កញ្ញានេះ សម្តេចនាយក​រដ្ឋមន្រ្តី ហ៊ុន សែន និងគណៈប្រតិភូ​អមដំណើរបានអញ្ជើញ​ចូលរួមក្នុងព្រះរាជពិធី​អភិសេកព្រះរាជ​បុត្រី​ស្តេច​ប្រ៊ុយ​ណេ ដែលបាន​ចាប់​ផ្តើមធ្វើយ៉ាងអធិក​អធមនៅព្រឹក​ថ្ងៃអាទិត្យនេះ ។

យោងតាម​ទូរទស្សន៍ប្រ៊ុយណេ ដែលធ្វើការផ្សាយផ្ទាល់ព្រះរាជ​ពិធីអភិសេកព្រះរាជ​បុត្រីស្តេចប្រ៊ុយណេ បានបង្ហាញ​រូបភាព​យ៉ាង​អធិក​​អធម​ក្នុង​ព្រះបរមរាជវំាងនៃរាជធានីបាន់ដាស៊េរី​បេហ្គាវ៉ាន ដោយមានស្តេចស៊ុល​តង់ ប្រទេស​ប្រ៊ុយណេ​ជាព្រះរា​ជាអធិប​តី និងមានភ្ញៀវសំខាន់ៗជា សមាជិករាជវង្ស និងមេដឹកនាំបណ្តាប្រទេសអាស៊ានចូលរួមផងដែរ ។ ព្រះរាជធីតាហាចា ហាហ្វ៊ីសា​ស៊ូរូរូល  បូល​កៀ ព្រះជន្ម៣២ព្រះវស្សា នៃព្រះមហាក្សត្រហាស់​សាណាល បូលកៀ នៃរាជាណាចក្រប្រ៊ុយ​ណេ បានរៀបអភិសេក​ជាមួយ​​លោក​ផេន​គីរ៉ាន ហាជី មូហាម៉ាត់រូសាយនី អាយុ២៩ឆ្នាំ ជាមន្ត្រី​រាជការ បានផ្តើមធ្វើតាមប្រពៃ​ណី​ទំនៀមទំលាប់សាសនា​អ៊ិស្លាម ។

បន្ទាប់ពីព្រះ​រាជពិធីតាមបែបសាសនាអ៊ិស្លាមបានបញ្ចប់​ទូរទស្សន៍ប្រ៊ុយ​ណេបានបង្ហាញរូបភាពស្តេច​ស៊ុលតង់ ហាស់​សាណាល់ បូលកៀ និង ព្រះ​រាជិនីសាឡេហា បានដើរលើកំរាលព្រហ្មដៃស្តាំកាន់ដៃចៅប្រុសអាយុប្រមាណ៦ឆ្នាំ ដៃឆ្វេងកាន់ឈើច្រត់ក្នុង​សម្លៀក​បំពាក់ជា​ប្រពៃណីស្តេចប្រ៊ុយ​ណេ និងនៅខាងឆ្វេងដៃទន្ទឹមគ្នានោះ គេឃើញ​វត្តមានសម្តេចនាយ​ករដ្ឋមន្រ្តី ហ៊ុន សែន បាន​សំណេះ​សំណាល​សើចញ​ញឹម បង្ហាញពីការអបអរសាទរ និងសិរីមង្គលដល់ព្រះរាជពិធីអភិសេកនេះ ។

ចំណែកដើរនៅខាងក្រោយសម្តេចនាយករដ្ឋមន្រ្តី ហ៊ុន សែន គេក៏ឃើញមានវត្តមានលោកស្រីនាយក​រដ្ឋមន្រ្តីថៃ យីងឡាក់ ស៊ី​ណា​វ៉ាត់ត្រា និង មេដឹកនាំបណ្តាប្រទេសមួយចំនួនទៀត ។ យោងតាមសារព័ត៌មាននានាបានឲ្យដឹងថា ព្រះរាជធីតាហាហ្វ៊ីសា​ដែលរៀបអភិសេកនេះ បានបញ្ចប់ការសិក្សាថ្នាក់បរិញ្ញាប័ត្រគ្រប់គ្រងជំនួញ និងជាព្រះរាជធីតាអង្គទី៥របស់សម្តេចស៊ុលតង់ ហាស់​សាណាល់ បូលកៀ និងព្រះរាជិនីសាឡេហា ។

បច្ចុប្បន្នព្រះរាជធីតាហាហ្វ៊ីសា កាន់ការ​ងារជាមន្ត្រីនៅក្រសួងហិរញ្ញ​វត្ថុ។ចំណែកលោករូ សាយនី ជាស្វាមី ជាមន្ត្រីរាជការបម្រើការ​នៅ​ខុទ្ទកាល័យនាយករដ្ឋមន្ត្រី ។​ លោករូសាយនី និងព្រះរាជធីតា​ហា​ហ្វ៊ីសា​បម្រើការងារក្រោមបង្គាប់បញ្ជារបស់​ព្រះបិតាដែលជា​នាយក​រដ្ឋមន្ត្រី រដ្ឋមន្ត្រីហិរញ្ញវត្ថុ និងរដ្ឋមន្ត្រីក្រសួងការពារជាតិ ៕