កីឡាករប្រដាល់ហ្វុីលីពីន ម៉ានី ប៉ាក់គីអាវបានប្តេជ្ញាថា ខ្លួននឹងផ្តួលកីឡាករចូអាន ម៉ានូអែល ម៉ាកហ្គេសឱ្យខាងតែបានក្នុងខណៈដែលពួកគេទាំង២នាក់ជួបគ្នាជាលើកទី៤នៅក្រុងឡាសវេហ្គាស សហរដ្ឋអាមេរិកថ្ងៃទី៨ខែធ្នូចុងឆ្នាំនេះ ។ ការប្រកួតចុងក្រោយបំផុតរវាងកីឡាករទាំង២កាលពីខែវិច្ឆិកាឆ្នាំទៅមិញ ប៉ាក់គីអាវវ័យ៣៣ឆ្នាំបានយកឈ្នះដោយពិន្ទុយ៉ាងចម្រូងចម្រាស ។ ចំណែកការជួបគ្នាលើកទី១នៅឆ្នាំ ២០០៤ លទ្ធផលស្មើគ្នា ប៉ុន្តែការជួបគ្នាលើកទី២នៅឆ្នាំ២០០៨ ប៉ាក់គីអាវឈ្នះដោយពិន្ទុជាឯកច្ឆ័ន្ធ ។
ថ្លែងតាមការស្រង់សម្តីដោយ BBC ប៉ាក់គីអាវបានបញ្ជាក់ថា ៖«ខ្ញុំចង់ធ្វើឱ្យការប្រកួតនេះប្រើរយៈពេលខ្លី ។ ខ្ញុំចង់វាយគេឱ្យសន្លប់តែម្តង ។ មានមនុស្សជាច្រើននៅតែសួរថា តើខ្ញុំឈ្នះការប្រកួតលើកនេះបានដែរឬទេ ? ខ្ញុំបានគិតថា រឿងរ៉ាវអាចប្រែប្រួល ហើយខ្ញុំត្រូវតែធ្វើវាម្តងទៀត ។ ជួបគ្នាលើកទី៤នេះ ខ្ញុំនឹងប្រឹងប្រែងហ្វឹកហាត់ឱ្យបានខ្លាំងក្លាបំផុតធ្វើឱ្យវាក្លាយជាការប្រកួតក្នុងប្រវត្តិសាស្ត្រ ។ ខ្ញុំចង់លុបបំបាត់ភាពមន្ទិលសង្ស័យចំពោះលទ្ធផលនៃការជួបគ្នា៣ប្រកួតលើកមុន »។
កាលពីខែមិថុនាកន្លងមកនេះ ប៉ាក់គីអាវបានចាញ់ក្រោមកណ្តាប់ដៃកីឡាករអាមេរិកធីម៉ូធី ប្រែ៊តលីគឺជាការប្រកួតមួយដែលអ្នកទស្សនាជុំវិញពិភពលោកគិតថា ប៉ាក់គីអាវជាអ្នកឈ្នះ ។ ចំពោះទីតាំងហ្វឹកហាត់វិញគឺមិនមែននៅក្នុងប្រទេសហ្វុីលីពីនដូចលើកមុនទេ ។ ជំនួសមកវិញ រូបគេនឹងទៅហ្វឹកហាត់នៅទីក្រុង Hollywood។ដោយឡែកកីឡាករវ័យ៣៩ឆ្នាំម៉ាកហ្គេសវិញគឺជាអតីតម្ចាស់ខ្សែក្រវាត់៣ប្រភេទទម្ងន់ ។ គេតែងតែអះអាងជារឿយៗថា ការជួបគ្នា៣លើកកន្លងមកគឺរូបគេជាអ្នកឈ្នះ ។
គេបានថ្លែងថា ៖«គ្រប់ៗគ្នាបានដឹងថា ខ្ញុំជាអ្នកឈ្នះទាំង៣លើក តែចំពោះចៅក្រមវិញ ខ្ញុំមិនដឹងថា តើមានអ្វីកើតឡើងនោះទេ ។ ជួបគ្នាលើកនេះ ខ្ញុំត្រូវតែគេចឱ្យផុតពីការឱ្យពិន្ទុដោយចៅក្រម »៕
ចែករំលែកព័តមាននេះ