កីឡាករប្រណាំងម៉ូតូ Grand Prixសញ្ជាតអុីតាលីខាស៊ី ស្តូន័រក្នុងពេលថ្មីៗនេះបានព្រលយពាក្យឱ្យដឹងពីបំណងរបស់ខ្លួនទៅថ្ងៃអនាគតក្រោយពីរូបគេចូលនិវត្តពីការប្រណាំងនៅដំណាច់ឆ្នាំដោយបញ្ជាក់ថា ខ្លួននឹងទៅចូលរួមប្រណាំងរថយន្តវិញម្តង ។
ស្តូន័រវ័យ២៦ឆ្នាំបច្ចុប្បន្នទើបតែបានធូរស្បើយពីរបួសបាក់ឆ្អឹងកែងជើងហើយនៅដំណាច់ឆ្នាំនេះនឹងលាឈប់ពីអាជីព ។
ថ្លែងប្រាប់ទូរទស្សន៍អូស្ត្រាលី Channel 7 ស្តូន័របាននិយាយថា៖«ខ្ញុំសង្ឃឹមថា នឹងអាចផ្លាស់ទៅប្រណាំងរថយន្តវិញដ្បិតវាជាសុបិនដែលខ្ញុំចង់បានជាយូរមកហើយ ។ ខ្ញុំមានបំណងចង់ចូលរួមការប្រណាំងរថយន្តប្រភេទ V8 Supercars តាំងពីអាយុ១២ឬ១៤ឆ្នាំមកម្លេះ ។ នៅក្នុងអនាគតដ៏ឆាប់ៗនេះ ខ្ញុំនឹងបានបង្ហាញមុខនៅលើផ្លូវប្រណាំង »។ គេបានបន្តទៀតថា ៖«សូមបញ្ជាក់ថា ទើបតែថ្មីៗនេះទេដែលខ្ញុំចាប់អារម្មណ៍លើកីឡាប្រណាំងរថយន្ត ។ ខ្ញុំត្រូវតែប្រាកដនិយមហើយមើលថាតើខ្ញុំរហ័សរហួនប៉ុនណា តែយ៉ាងណា វាគឺជាកិច្ចការមួយដែលខ្ញុំត្រូវតែធ្វើឱ្យខាងតែបាន »។
ស្តូន័រដែលជាកីឡាករគ្រងជើងឯកពិភពលោកឆ្នាំចាស់បានខកខានការប្រណាំង២លើករួចមកហើយបន្ទាប់ពីរងរបួសបាក់ឆ្អឹងកែងជើងអំឡុងការប្រណាំងកំដៅសាច់ដុំនៅ Indianapolisសហរដ្ឋអាមេរិក ។ ទោះជាយ៉ាងណា គេមានគម្រោងវិលត្រឡប់មកវិញឱ្យទាន់ការប្រណាំងនៅលើទឹកដីកំណើតរបស់ខ្លួននៅថ្ងៃ២៨តុលាខាងមុខដែលរូបគេធ្លាប់បានយកឈ្នះជើងឯក៥ឆ្នាំបន្តបន្ទាប់គ្នា ។ ការចូលរួមរបស់គេលើកនេះក៏បញ្ជាក់បានថា របួសរបស់គេបានជាសះស្បើយហើយផងដែរ ។
គេបានថ្លែងថា ៖«សរសៃទាំងឡាយកំពុងតែជាសះស្បើយជាបន្តបន្ទាប់ហើយ ។ ខ្ញុំទទួលបានការវះកាត់ដ៏ផ្ចិតផ្ចង់បំផុត ។ គ្រូពេទ្យធ្វើការងារបានយ៉ាងល្អបំផុត ។ ដូច្នេះពេលវេលាជាសះស្បើយនៅមិនយូរទេ ប៉ុន្តែនៅមានរឿងមួយទៀតដែលខ្ញុំត្រូវធ្វើផងដែរនោះគឺបញ្ចុះទម្ងន់មុនពេលបើកបរម៉ូតូ ។ ខ្ញុំគិតថា វាពិតជាការងារពិបាកមួយក្នុងការបន្តជ័យជម្នះនៅទីនេះ(អូស្ត្រាលី)ជាលើកទី៦ ។
ស្តូន័រពេលនេះស្ថិតនៅលំដាប់ទី៣លើតារាងជើងឯកពិភពលោកបើទោះណាខកខានការប្រណាំង២លើកហើយក៏ដោយ ។ ពេលនេះគេមាន១៨៦ពិន្ទុ តាមពីក្រោយកីឡាករអេស្ប៉ាញ ចច ឡូរេនហ្សូនិងដានី ប៉េដ្រូហ្សា ៕
ចែករំលែកព័តមាននេះ